Yesu Wuoyo kod Dhako Moro e Bath Soko

YESU okawo thuolo mondo oyuwe e bath soko moro e dala mar Samaria. Jopuonjrene odhi nyiewo chiemo. Dhako ma Yesu wuoyogono obiro umbo pi. Yesu nyise ni: ‘Miya pi amodhi.’

Dhakono wuoro ahinya nikech wachno. Be ing’eyo gimomiyo? En nikech Yesu en Ja-Yahudi, to dhakono en Nya-Samaria. To Jo-Yahudi mang’eny ok ohero Jo-Samaria. Ok ginyal kata wuoyo kodgi! Yesu to ohero ji duto. Kuom mano, owacho ni: ‘Ka da ing’eyo jal makwayi pi modho, dikwaye to domiyi pi machiwo ngima.’

Dhakono dwoke ni, ‘Jaduong’, sokoni tut, to ionge kata ndowo. Ere kama ibiro yudoe pigi machiwo ngima?’

Yesu lerone ni: ‘Ka imodho pi sokoni, riyo podi biro loyi kendo. To pi ma abiro chiwo nyalo miyo ng’ato odag nyaka chieng’.’

Dhakono wachone ni: ‘Jaduong’ miya pigno! Kendo riyo ok bi loya kendo. To ok bi chuna biro kani kendo umbo pi.’

Dhakono paro ni Yesu wuoyo kuom pi ma pile. Yesu to wuoyo e wi adiera mar Nyasaye kod pinyruodhe. Adierano chalo gi pi machiwo ngima. Onyalo miyo ng’ato ngima ma nyaka chieng’.

Yesu koro nyiso dhakono ni: ‘Dhiyo mondo iluong chwori kendo iduogi.’

Odwoko ni: ‘Aonge dichwo.’

Yesu wacho ni: ‘Idwoko kare. To isebedo gi chwo abich, kendo ng’ama idakgo sani ok en chwori.’

Dhakono wuoro, nikech wechego duto gin adier. Ere kaka Yesu nong’eyo wechegi? Ee, en nikech Yesu e Jal Manosingi moor gi Nyasaye, kendo Nyasaye miye wechegi. E kar sechegi, jopuonjre Yesu duogo, kendo giwuoro gimomiyo owuoyo gi dhako ma Nya-Samaria.

Ang’o ma wapuonjore kuom magi duto? Wapuonjore ni Yesu nyiso ng’wono ne ji moa e dhoudi duto. Kendo wan bende onego wabed kamano. Ok onego wapar ni jomoko richo mana nikech gin jo dhoot moro. Yesu dwaro ni ji duto ong’e adiera matero ji e ngima ma nyaka chieng’. To wan bende onego wabed gi dwaro mar konyo ji mondo ong’e adiera.