Somo mar 10

Timbe ma Nyasaye Kwero

Onego ine nade gik ma Nyasaye wacho ni richo? (1)

Timbe mage mag terruok maok kare? (2)

Ere kaka Jakristo onego ne wacho miriambo? (3) goyo ombulu? (3) kuo? (3) gero? (4) tim juok? (5) mer? (6)

Ere kaka ng’ato nyalo weyo timbe maricho? (7)

1. Jotich Nyasaye ohero gik mabeyo. Kata kamano owinjore gipuonjre kwedo gik maricho. (Zaburi 97:10) Mano nyiso ni weyo timbe moko ma Nyasaye ok dwar. Moko kuom timbego gin mage?

2. Terruok: Nindo e kind joma pok okendore, chode, nindo gi chiaye, nindo gi wat, kendo mon manindo gi mon kod chwo manindo gi chwo gin richo madongo kuom Nyasaye. (Tim Jo-Lawi 18:6; Jo Rumi 1:26, 27; 1 Jo Korintho 6:9, 10) Ka dichwo gi dhako ok okendore to gidak kaachiel, onego giwere, ka ok kamano to gikendre kaka chik dwaro.—Jo Hibrania 13:4.

3. Wacho Miriambo, Goyo Ombulu, Kuo: Jehova Nyasaye ok nyal riambo. (Tito 1:2) Joma dwaro mondo oyie kodgi nyaka we miriambo. (Ngeche 6:16-19; Jo Kolosai 3:9, 10) Tuke duto mag goyo ombulu miyo ji bedo jowuoro. Jokristo ok go ombulu moro amora, kaka piem e ng’wech mar faras kata goyo karata. (Jo Efeso 5:3-5) Kendo Jokristo ok kwel. Bende ok ging’iew gik ma ging’eyo ni okwal, kata kawo gik moko ka ok gikwayo.—Wuok 20:15; Jo Efeso 4:28.

4. Mirima, Gero: Mirima malich nyalo kelo timbe mag gero. (Chakruok 4:5-8) Ng’at mager ok nyal bedo osiep Nyasaye. (Zaburi 11:5; Ngeche 22:24, 25) En gima rach chulo kuor kata chulo richo kuom gik maricho ma jomoko timonwa.—Ngeche 24:29; Jo Rumi 12:17-21.

5. Ido Kata tim Juok: Jomoko temo sayo teko mag jochiende mondo gitemgo chango tuoche. Moko bende iro jowasikgi mondo gibed matuo kata mana negogi. Satan emakelo teko mag timo timbegi duto. Kuom mano Jokristo ok onego tim kodgi timbego. (Rapar mar Chik 18:9-13) Bedo machiegni gi Jehova e yo maber ahinya mar ritruok kuom kuong’ ma jomoko nyalo dwaro kuong’owago.—Ngeche 18:10.

6. Mer: Ok rach madho divai kata kong’o matin. (Zaburi 104:15; 1 Timotheo 5:23) To madho kong’o ahinya kod mer rach e wang’ Nyasaye. (1 Jo Korintho 5:11-13; 1 Timotheo 3:8) Madho kong’o ahinya nyalo ketho ngimani kendo hinyo joodi. Bende onyalo miyo idonji mapiyo e tem mamoko.—Ngeche 23:20, 21, 29-35.

7. Ji ma timo timbe ma Nyasaye wacho ni richo “ok nocham gikeni mag pinyruodh Nyasaye.” (Jo Galatia 5:19-21) Ka ihero Nyasaye adier, kendo idwaro mondo imiye mor, inyalo weyo timbegi. (1 Johana 5:3) Puonjri tamruok gima Nyasaye wacho ni rach. (1 Jo Rumi 12:9) Riwri gi ji ma timbegi beyo ne Nyasaye. (Ngeche 13:20) Owete ma Jokristo motegno nyalo konyi moloyo. (Jakobo 5:14) Moloyo duto, tenri kuom kony mar Nyasaye e yor lemo.—Jo Filipi 4:6, 7, 13.

[Picha manie ite mar 20]

Nyasaye okdwar mer, kuo, goyo ombulu, kod timbe mag gero