Jiwo Jowinjo Oti gi Muma

GIMA wadwaro en konyo ji duto ong’e gima Muma ma en Wach Nyasaye, wacho. Buk malerno e mise mar wach mwalando kendo wadwaro ni ji ong’e ni gima wawacho ok en marwa wawegi to en gima owuok kuom Nyasaye. Dwarore ni ji ogen Muma.

E Tij Lendo. Kinde duto sama itimo ikruok mar dhi lendo, yier ndiko achiel kata mokalo kanyo ma ibiro tiyogo e wuoyo gi joma oyie winjo. Kinde duto, ber somo ndiko mowinjore gi gima iwuoyo kuome kata kapo ni ichano mar chiwo gaset kata buk kuom thuolo manok ahinya. Moloyo gimoro amora mwanyalo wacho, Muma nigi teko mang’eny mar chiko jogo ma nigi kido kaka mag rombe. Ka ok nyalre chuth somo Muma, inyalo wacho weche sie ma Muma otiyogo. Kinde Jokristo mokwongo, kopi mag buge modol mag Ndiko ok ne ng’eny ahinya. Kata kamano, Yesu gi jootene ne tiyo nyading’eny gi weche sie mayudore e Ndiko. Wan bende onego watim kinda wamak ndiko moko gi wiwa kendo wati kodgi kaka owinjore e tijwa mar lendo, to seche moko wanyalo mana hulo weche sie mag ndikogo.

Kapo ni inyalo somo Muma sama in e tij lendo, make e yo mamiyo wuon ot oluwre kodi sama isomo. Kapo ni wuon ot nyalo somo Muma mare sama in bende isomo mari, onyalo rwako gik misomo e yo maber moloyo.

Kata kamano, nyaka ing’e ni joloko moko mag Muma nokalo tong’ sama ne giloko Wach Nyasaye. Weche moko ma ne giloko ok winjre e yore duto gi dhok ma ne okwong ndikgo Muma. Loko mang’eny mag Muma me kindegi osegolo nying Nyasaye e Muma, pando gima dhok ma nokwong ndikgo Muma wacho kuom jomotho, kendo pando gima Muma wacho kuom gimomiyo Nyasaye nochweyo piny. Mondo inyis ng’ato kaka osepand wechego, nyalo dwarore ni ipor loko mag Muma mopogore opogore ma ne ondik chon e dhou. Bug Kutoa Sababu kwa Kutumia Maandiko nyiso kaka loko mopogore opogore mag Muma oloko weche moko mapek mayudore e kwan moko matindo ma ihinyo tigo. Ng’ato ang’ata mohero adiera biro mor kuom ng’eyo adiera mag wechego.

E Chokruoge mag Kanyakla. Dwarore ni ojiw ji duto mobiro e chokruok oti gi Muma. Timo kamano konyo e yore mang’eny. Okonyo e miyo jowinjo oket pachgi kuom gima iwuoyoe. Omiyo weche ma jagol-twak wacho onere maler e pach jowinjo. Kendo oguro e pach jo manyien ni adier, Muma e mise mar puonj mwaluwo.

Mondo jowinjo oluwre kodi ka gisomo Muma margi sama isomo ndiko, biro luwore gi kaka ijiwogi. Achiel kuom yore mabeyo moloyo mar jiwogi, en gwelogi achiel kachiel gisom ndiko.

En ting’ mari kaka jagol-twak mondo ing’e ni ndiko mage midwaro jiwo ma jowinjo onego osom kodi. Ber somo ndikogo mabiro konyi gero puonj madongo. Kae to kaluwore gi thuolo mantie, med ndiko moko masiro gima iwacho.

En adier ni hulo Ndiko kata mana gwelo jowinjo mondo osom kodi ndiko moro, ok oromo. Kapo ni isomo ndiko moro kae to idhi e machielo kapok jowinjo oyudo ndiko ma ne otelone mano, mapiyo chunygi biro nyosore ma giwe temo luwore kodi e somo Muma. Ng’i jowinjo. Ka thothgi oseyudo ndikono, some.

Par motelo. Hul ndiko midwaro somo chon moromo kapok isome. Mano miyo ok iketh sa kapod irito jowinjo oyud ndiko. Kata obedo ni wecheni biro bedo manok nikech ichiwo thuolo mondo jowinjo oyud ndiko, mano owinjore nikech ber mabedoe.