Chano Weche Owinjre Malong’o

MONDO ichan weche owinjre malong’o, nyaka ikwong ing’e gimaduong’ midwaro chopo e twak. Be idwaro mana lero ne jomoko wach moro sie—puonj moro, paro moro, kido moro, tim moro, kata yo moro mar ngima? Be gima idwaro timo en puodho kata kwedo paro moro? Be dibed ni idwaro ni ji one gimoro e yo mowinjore kata gikaw okang’ moro? Bed ni ibiro wuoyo gi ng’ato achiel kata gi grup maduong’, mondo itim mano maber, nyaka ing’e gima ging’eyo e wi wachno kendo kaka ginene. Bang’ timo mano, ket wecheni e yo mabiro konyi chopo gimidwaro.

Bug Tich Joote 9:22 wacho ni kane Saulo (Paulo) lendo e Damaski, ‘nodhiero rieko jo Yahudi modak e Damaski, konyisogi ni Yesu e Kristo.’ Ere kaka noketonegi weche owinjre malong’o ma odhiero riekogi? Kaka nenore e weche mondiki e wi tij lendo ma ne Paulo otimo bang’e Antiokia kod Thessalonika, nochako gero wechene kuom geno ma Jo-Yahudi ne nigo kuom Ndiko mag Dho-Hibrania koda kuom yie ma ne gin-go kuom gik ma Ndikogo ne wacho kuom Mesia. Kae to, kotiyo gi Ndikogo, Paulo noyiero kuonde ma ne mulo kit ngima Mesia kod tij Mesia mar lendo. Nohulo weche sie ma ne otigo kuom Mesia kendo nopimo wechego gi gik ma ne otimore e ngima Yesu. Gikone, notieko wachno konyiso gima koro ne nenore maler ni Yesu ema ne en Kristo, kata Mesia. (Tich 13:16-41; 17:2, 3) Ka in bende ilero adiera mag Muma kichanogi mondo giwinjre malong’o, mano nyalo ywayo jowinjo.

Chano Kaka Ibiro Wuoyo. Inyalo ti gi yore mopogore opogore e chano weche owinjre malong’o. Kineno ni owinjore kodi, inyalo tiyo gi yore mopogore opogorego kanyachiel. Ne ane moko kuom yore minyalo tiyogo.

Chano weche kaluwore gi wiye matindo. Mani dwaro ni ipog wecheni e bwo wiye matindo, ka moro ka moro kuom wiyego konyi chopo gimidwaro e twak. Wiye matindogo nyalo bedo ni ema gin puonj madongo makonyi lero wich miwuoyoe. Ginyalo bedo weche achiel achiel manyiso kata kwedo gimoro. Nyalo dwarore ni imed kata ing’ad oko weche moko motudore gi wich miwuoyoe kaluwore gi jowinjo kata gimidwaro chopo.

Ne ane ranyisi kaka inyalo chano weche kaluwore gi wiye matindo. Twak machuok mawuoyo kuom nying Nyasaye nyalo riwo (1) gimomiyo ng’eyo nying Nyasaye dwarore, (2) gima nying Nyasaye en, koda (3) kaka wanyalo miyo nyingno luor.

Nono buge ma “jatichno mogen, kendo mariek” ogoyo mondo otigo e puonjruok Muma gi ji, nyalo konyi ahinya e ng’eyo kaka ichano weche kaluwore gi wiye matindo. (Math. 24:45) Bugegi oting’o wiye mogwaro manyalo konyo jopuonjre ng’eyo puonj ma ng’ato chako ng’eyogo Muma. Buge madongo pogo sula ka sula e wiye matindo. Wich ka wich iko pach japuonjre ne weche maluwo, kendo konye ng’eyo wach maduong’ ma sulano wuoyoe.

Tim koda gima timno kelo. Lero tim koda gima timno kelo en yo machielo minyalo tigo e chano weche owinjre malong’o.

Kapo ni iwuoyo gi grup moro kata gi joma dwarore ni opar matut kuom gima gibiro yudo nikech timgi kata nikech gima gichano timo, tiyo gi yorni ema nyalo konyo. Ngeche sula mar 7 chiwo ranyisi maber ahinya mar timo kamano. Onyiso maler kaka wuowi moro “ma onge gi rieko” donjore gi dhako ma ndhaga (tim) kae to ohinyore malit nikech timno (gima timno kelo).—Nge. 7:7.

Mondo imed jiwo wach, inyalo nyiso pogruok mabedoe, gik maricho mayudo jogo matamore luwo yore Jehova, koda ber ma joma winjo Jehova yudo. Ka roho mar Jehova taye, Musa nonyiso pogruok ma kamano kane owuoyo gi Jo-Israel kapok gidonjo e Piny Manosingi.—Rapar, sula mar 28.

Seche moko, ber chako wuoyo kiyango chal moro (gima timno kelo) kae to inyis gima ne okelo chalno (tim). Kinde mang’eny, mano dwaro ni inyis chandruok moro kae to iluw gi nyiso kaka iloyo chandruogno.

Chandruok koda kaka inyagruok kode. Sama in e tij lendo, ka iwuoyo kuom chandruok moro mamulo ji kae to inyiso kaka inyalo lo chandruogno, ji nyalo bedo gi siso mar winjo. Onyalo bedo gima in iwuon ema ipenje, kata ma wuon ot ema openjo.

Chandruogno nyalo bedo gik ma ji neno kaka ti kendo tho, mahundu, kata mibadhi monya ahinya. Ok bi dwarore ni oler chandruogego matut nikech gin gik manenore ayanga. Wuo machuok kuom chandruok mantieno kae to iti gi Muma e nyiso kaka ibiro tiek chandruogno.

Komachielo, chandruok mantie nyalo bedo ni en mar ng’ato owuon, kaka pek ma janyuol man kende nigo, nyosruok chuny nikech ng’ato tuwo, kata pek ma ng’ato nigo nikech jomoko sande. Mondo ikony e yo maber chuth, nyaka ikwong ibed jal machiko ite maber. Muma chiwo weche makonyo e chandruogegi duto. Kata kamano, dwarore ni oti kod wechego e yo mariek. Ka idwaro ni gima iwacho okony ng’ato gadier, kik iwach gima ok nyalre. Nyis maler kabe weche miwuoyoe gin madhi tieko chandruok moro chuth, gin makonyo kuom kinde machuok, kata gin mana manyiso kaka onyalo nyagore gi chal moro maok bi lokore e piny masani. E yo machuok, ne ni yo milerogo kor wach kitiyo gi Ndiko, oromo siro chuth paro ming’ado kuom wachno. Ka ok itimo kamano, to ng’atno biro neno ni wecheni ok winjrene malong’o kata matin.

Chan weche kaka ne giluwore. Weche moko inyalo chan kaluwore gi kinde ma ne gitimoree. Kuom ranyisi, bug Wuok chano Masiche Apar kaluwore gi kaka ne gitimore. E bug Jo Hibrania sula mar 11, jaote Paulo ochano chwo kod mon ma noketo ranyisi maber e nyiso yie kaluwore gi kinde ma ne gidakie.

Kilero gik ma ne otimore chon kaka ne giluwore, mano nyalo konyo jowinjo ong’e gima nokelo chal moko. Inyalo tiyo gi yorni sama iwuoyo kuom histori masani kata sama iwuoyo kuom gik ma ne otimore e kinde ma ne indiko Muma. Omiyo nyalo bedo ni itiyo gi yore ariyo kanyachiel; chano weche kaka ne giluwore koda nyiso tim moro gi gima timno kelo. Kichano nyiso kaka gik ma Muma koro biro timore kinde mabiro, chano wechego kaka gibiro luwore nyalo miyo obed mayot ne jowinjo oluwre kodi kendo gipar wechego.

Chano weche kaka ne gitimore ok onyiso ni kinde duto nyaka ichak wach e tiende. Seche moko, inyalo chako lero wach moro kaluwore gi kama idwaro ni iywago pach ji. Kuom ranyisi, sama idwaro wuoyo kuom wach moro mosene, inyalo yiero chako wuoyo kuom kinde ma ng’ato ne okalo e tem moro. Bang’ mako pach ji gi wechego, inyalo chano weche kaka ne giluwore ma ochopo kanyo.

Tiyo Mana gi Weche Motudore gi Wach Miwuoyoe. Kata obedo ni ichano wecheni e yo mane, tang’ mondo iti mana gi weche motudore gi wach miwuoyoe. Wach maduong’ miwuoyoe e twak ema onego ochik weche mibiro yiero tiyogo. Bende onego ing’e chal mar jowinjo. Wach moro sie nyalo dwarore ahinya kuom jowinjo moko, to wach achielno ok ochuno ne jowinjo mamoko. Bende nyaka ine ni weche duto mibiro tiyogo gin mabiro konyi chopo gimidwaro. Ka ok kamano, to twak nyalo chweyo maok okonyo kata ka en mamit.

Sama itimo nonro, inyalo yudo weche mamit mang’eny motudore gi wich miwuoyoe. Kuom wechego, onego iti gi maromo nade? Ka ithung’o jowinjo gi weche mang’eny ahinya, ok ibi chopo gimidwaro. Puonj manok moler e yo maber bedo mayot mako moloyo weche mang’eny miwacho aruya aruya. Mano ok nyis ni ok inyal medo weche moko manyalo bero i twak. Kata kamano, kik iwe wechego oum gimaduong’ midwaro chopo. Ne kaka Muma tiyo gi weche ma kamago e yo mariek e bug Mariko 7:3, 4 koda bug Johana 4:1-3, 7-9.

Sama iwuok e puonj moro kidhi e machielo, bed motang’ kik idum apoya nono mamiyo jowinjo lal. Mondo parogo oti maber kanyachiel, nyalo dwarore ni iwach gima tudo puonj ariyogo. Inyalo tiyo gi sentens machuok manyiso tudruok e kind parogo. E dhok mang’eny, nitie weche machuok mitiyogo e nyiso ni ng’ato wuok e paro moro kodhi e machielo.

Tiyo mana gi weche motudore gi wach miwuoyoe kendo chanogi e yo mawinjore malong’o, biro konyi chopo gimidwaro.