SOMO MAR 3

Ere Kaka ne Ochak Ofweny Kendo Adiera mag Muma?

Grup moro mar chwo ma ne puonjore Muma e higni mag 1870 — Jopuonjre mag Muma, higini mag 1870

Ng’ato somo gocho mokwongo mar Ohinga mar Jarito — Gocho mokwongo mar *Ohinga mar Jarito,* 1879

Miyo moro oting’o gaset mar Ohinga mar Jarito kod Amkeni! — *Ohinga mar Jarito* e kindegi

Muma nokoro ni bang’ tho Kristo, jopuonj ma miriambo ne dhi bedoe e kind Jokristo mokwongo, kendo ne gidhi puonjo weche maketho adiera manie Muma. (Tich Joote 20:29, 30) Bang’ kinde, mano e gima ne otimore. Ne gikiko puonj mag Yesu gi puonj mag joma lamo nyiseche manono, ma mano onyuolo Jokristo ma miriambo. (2 Timotheo 4:3, 4) Wanyalo bedo gadier nade ni e kindewagi, wang’eyo e yo makare gima Muma puonjo kuom adier?

Kinde Jehova mar eloe adiera nochopo. Jehova nokoro ni ndalo giko nochopi ma “ng’eyo kit weche [puonj madier] nomedre.” (Daniel 12:4) E higa mar 1870, grup moro matin mar joma ne manyo adiera nofwenyo ni thoth puonj mag kanise ne ok winjre gi Ndiko. Omiyo ne gichako manyo mondo ging’e puonj madier mag Muma, kendo Jehova nogwedhogi kuom konyogi ng’eyo adiera mayudore e Wach Nyasaye.

Chwo ma ne manyo adiera gi chuny maler ne opuonjore Muma adimba. Jopuonjre mag Muma me kinde machon-go ma sani waluwo ranyisi margi ne puonjore gi yo ma wan bende pod watiyogo e kindegi. Ne gigudo paro e wi puonj achiel achiel mayudore e Muma. Kane giyudo kamoro e Muma ma winjo tiende tek, ne gimanyo ndiko mamoko mondo okonygi winjo tiende. Kane giyudo ni puonj moro winjore gi Muma mangima, ne gindike piny. Omiyo, kuom weyo mondo Muma ema olerre owuon, jopuonjrego ne ochako ofwenyo kendo adiera e wi nying Nyasaye koda Pinyruodhe, gimomiyo Nyasaye nochweyo dhano koda piny, chal mar jomotho, koda geno mar chier. Nonro ma ne gitimono noketogi thuolo kuom puonj koda timbe mag dinde mag miriambo.—Johana 8:31, 32.

Kane ochopo higa mar 1879, Jopuonjre mag Muma nofwenyo ni kinde osechopo mar lando adiera ne ji duto. Omiyo e higano, ne gichako goyo gaset mapod wagoyo sani miluongo ni Ohinga mar Jarito Malando Pinyruodh Jehova. Gie sani walando adiera mag Muma e pinje 240 kendo e dhok ma dirom 750. Onge kinde moro amora ma adiera oselandi e okang’ mamalo kama!

Bang’ tho Kristo, ang’o ma ne otimore ne puonj madier mag Muma?
Ang’o mosekonyowa fwenyo kendo adiera mayudore e Wach Nyasaye?