Yo Monego Olamgo Nyasaye

1. En ng’a monego onyiswa yo monego walamgo Nyasaye?

DINDE mang’eny wachoga ni gipuonjo adiera e wi Nyasaye. Kata kamano, mano ok en adier. Dinde puonjoga gik mopogore opogore e wi Nyasaye kod kaka onego olame. Ere kaka wanyalo ng’eyo yo monego walamgo Nyasaye? Jehova kende e ma nyalo nyisowa kaka onego walame.

2. Ere kaka inyalo ng’eyo yo monego ilamgo Nyasaye?

² Jehova omiyowa Muma mondo okonywa ng’eyo yo monego walamego. Kuom mano, puonjri Muma, nimar Jehova dewi ahinya kendo obiro konyi mondo ine ber mar luwo puonjne.​—Isaya 48:17.

3. Nyasaye dwaro ni watim ang’o?

³ Jomoko wacho ni Nyasaye oyie gi dinde duto. Kata kamano, mano ok e gima Yesu nopuonjowa. Yesu nowacho niya: “Kik upar ni ji duto ma luonga ni, ‘Ruoth, Ruoth,’ e ma nodonj e Pinyruodh polo, to mana jo ma timo dwaro mar Wuora manie polo e ma nodonji.” Omiyo, dwarore ni wapuonjre gik ma Nyasaye dwaro kae to watimgi. Mano en gima onego wakaw mapek nikech Yesu noluongo joma ok luw chike Nyasaye ni ‘jo ma timo richo.’​—Mathayo 7:21-23.

4. Yesu nowacho ang’o e wi timo dwaro mar Nyasaye?

⁴ Yesu nowacho ni ok bi bedonwa mayot timo dwach Nyasaye kinde duto. Nowacho kama: “Donjuru e rangach madiny, nikech rangano duong’, kendo yorno lach ma tero ji e kethruok, to ji mang’eny e ma donjoe; to rangach matin kod yo madiny tero ji e ngima, to ji manok e ma nwang’e.” (Mathayo 7:13, 14) Yo madiny, tiende ni yo monego olamgo Nyasaye, e ma tero ji e ngima ma nyaka chieng’, to yo malach, tiende ni yo ma ok kare milamogo Nyasaye, tero ji e tho. Kata kamano, Jehova ok dwar ni ng’ato ang’ata otho. Kuom mano, omiyo ji duto thuolo mar ng’eye.​—2 Petro 3:9.

YO MONEGO OLAMGO NYASAYE

5. Ere kaka inyalo fwenyo joma lamo Nyasaye e yo moyiego?

⁵ Yesu nowacho ni wanyalo fwenyo jogo ma lamo Nyasaye e yo miyiego. Wanyalo fwenyogi ka wanono gik ma giyiego kod gik ma gitimo. Nowacho niya: “Olembgi e ma unung’egigo.” Kendo nomedo wacho kama: “Yien mabeyo duto nyago olemo mabeyo to yien maricho duto nyago olemo maricho.” (Mathayo 7:16, 17) Mano ok nyis ni jogo ma lamo Nyasaye gin joma onge richo. Kata kamano, jotich Nyasaye temo kinde duto mondo gitim gik moyiego. Wadwaro nono gik ma nyalo konyowa fwenyo jogo ma lamo Nyasaye e yo moyiego.

6, 7. Ang’o momiyo joma lamo Nyasaye gadier nyaka gol puonjgi e Muma? Ranyisi mar Yesu puonjowa ang’o?

⁶ Puonj duto nyaka wuog e Muma. Muma wacho niya: “Ndiko duto okudh gi much Nyasaye kendo gikonyo kuom puonjo ji, kuom siemo ji, kuom rieyo gik moko, kendo kuom kwero ji kaluwore gi gik makare, mondo ng’at Nyasaye obed moromo chuth, moikore maber ne tije mabeyo duto.” (2 Timotheo 3:16, 17) Jaote Paulo nondiko ne Jo-Thesalonika kama: “Ka nuyudo wach Nyasaye, ne urwake, ok kaka wach dhano, to kaka wach Nyasaye mana kaka en gadier.” (1 Jo-Thesalonika 2:13) Puonj mag joma lamo Nyasaye gadier wuok e Muma. Ok giti gi pach dhano, kata timbegi, kata gimachielo.

⁷ Onge gima Yesu nopuonjo ma ok otiyo gi Wach Nyasaye. (Som Johana 17:17.) Kinde duto notiyo gi Wach Nyasaye. (Mathayo 4:4, 7, 10) Mana kaka Yesu, Jotich Nyasaye madier golo puonjgi duto e Muma.

8. Ang’o ma Yesu nopuonjo e wi lamo Jehova?

⁸ Jehova kende e ma nyaka walam. Zaburi 83:18 wacho niya: “In ma nyingi Jehova, in kendi e Ng’at Mamalo Chutho e wi piny mangima.” Yesu ne dwaro ni ji ong’e ni Nyasaye mar adier en ng’a, omiyo ne onyisogi nyinge. (Som Johana 17:6.) Yesu nowacho kama: “Jehova Nyasachu e ma onego ulam, kendo en kende e ma onego utine.” (Mathayo 4:10) Kuom mano, wan jotich Nyasaye waluwo ranyisi mar Yesu. Walamo Jehova kende, watiyo gi nyinge, kendo wapuonjo jomoko mondo ong’e nyingno kod gik ma obiro timo ne dhano.

9, 10. Wanyiso jowetewa hera e yo mane?

⁹ Nyaka waher jowetewa gadier. Yesu nopuonjo jopuonjrene mondo gibed gi hera e kindgi. (Som Johana 13:35.) Omiyo, ok onego wadew kama jowetewa aye, kit anyuola ma giaye, bed ni gidhier kata gimewo. Hera ma waherorego kaka owete gi nyimine e gima duong’ monego oriwwa kanyachiel. (Jo-Kolosai 3:14) Kuom mano, ok wabi dhi e lweny ma nyalo miyo waneg ji. Muma wacho niya: “Nyithind Nyasaye kod nyithind Jachien ng’ere maler kuom wachni: Ni ng’at ma ok sik ka timo gik makare en ng’at ma ok oyie ni Nyasaye ochike. Kamano e kaka ng’at ma ok ohero owadgi bende chalo.” Ndikono medo wacho kama: “Onego waherre e kindwa; to kik wabed kaka Kain jal ma ng’at marach ne ochiko, mi nonego owadgi.”​—1 Johana 3:10-12; 4:20, 21.

¹⁰ Watiyo gi thuolowa, tekowa, kod mwanduwa mondo wakony jowetewa. (Jo-Hibrania 10:24, 25) ‘Watimo gik mabeyo ne ji duto.’​—Jo-Galatia 6:10.

11. Ang’o momiyo wayie ni wanyalo yudo warruok mana kokalo kuom Yesu?

¹¹ Nyaka wawinj Yesu nikech wayudo warruok kokalo kuome. Muma wacho niya: “Onge warruok kuom ng’at machielo, nimar onge nying machielo e bwo polo mosechiw ne ji mondo wayudie warruok.” (Tich Joote 4:12) E Sula mar 5 e bugni, ne wapuonjore ni Jehova ne ooro Yesu mondo ochiw ngimane kaka misango mar waro dhano ma luwo chike Nyasaye. (Mathayo 20:28) Jehova oseyiero Yesu mondo oloch kaka Ruoth e wi piny. Mano e momiyo Muma nyisowa ni nyaka wawinj Yesu ka wadwaro dak nyaka chieng’.​—Som Johana 3:36.

12. Ang’o momiyo ok wadonjre gi weche mag siasa?

¹² Nyaka wawere gi siasa. Yesu ne ok odonjore gi weche mag siasa. Ka ne isande, nonyiso Pilato ruodh Jo-Rumi niya: “Pinyruodha ok en mar pinyni.” (Som Johana 18:36.) Wan bende wamakore motegno gi Pinyruodh Nyasaye. Kuom mano, ok wadonjre gi weche mag siasa mag pinyni. Kata kamano, Muma chikowa ni wawinj “joloch,” tiende ni sirkande mag pinyni. (Jo-Rumi 13:1) Waluwo chike mag pinje ma wadakie. Kata kamano, ka moko kuom chikego nyalo miyo waketh chike Nyasaye, wabiro luwo ranyisi mag joote ma noramo ni, “Nyasaye e ma nyaka wawinj nikech en e jalochwa, kar winjo dhano.”​—Tich Joote 5:29; Mariko 12:17.

13. Ang’o ma walando e wi Pinyruodh Nyasaye?

¹³ Wan gadier ni Pinyruodh Nyasaye kende e ma nyalo tieko chandruoge duto manie piny. Yesu nowacho ni “wach maber mar Pinyruoth” ne idhi land e piny mangima. (Som Mathayo 24:14.) Onge sirkand dhano ma nyalo timo gik ma Pinyruodh Nyasaye biro timonwa. (Zaburi 146:3) Yesu nopuonjowa ni wakwa Nyasaye niya: “Pinyruodhi mondo obi. Dwaroni mondo otimre e piny kaka timore e polo.” (Mathayo 6:10) Muma nyisowa ni Pinyruodh Nyasaye biro ketho sirkande duto mag dhano kendo ni “noloch nyaka chieng’.”​—Daniel 2:44.

14. Gin jomage ma lamo Nyasaye e yo moyiego?

¹⁴ Kaluwore gi gik ma wasepuonjore e sulani, inyalo penjori niya: ‘Gin jomage ma puonjgi duto a e Muma? Gin jomage ma puonjo ji nying Nyasaye? Gin jomage ma nyiso jowetegi hera madier kendo moyie ni Nyasaye nooro Yesu mondo owarwa a e richo kod tho? Gin jomage ma ok donjre e weche mag siasa? Gin jomage ma lando ni Pinyruodh Nyasaye kende e ma nyalo tieko chandruoge duto manie piny?’ Gin mana Joneno mag Jehova kende.​—Isaya 43:10-12.

IBIRO KAWO OKANG’ MANE?

15. Gin ang’o ma nyaka watim mondo Nyasaye oyie gi lamowa?

¹⁵ Yie ayiea ni Nyasaye nitie ok oromo. Kata jochiende bende oyie ni Nyasaye nitie. Kata kamano, ok giluw chikene. (Jakobo 2:19) Ka wadwaro mondo Nyasaye oyie gi lamowa, nyaka wayie ni entie kendo nyaka waluw chikene.

16. Ang’o momiyo onego wawere gi dinde mag miriambo?

¹⁶ Nyasaye nyalo yie gi lamowa mana ka wawere gi dinde mag miriambo. Janabi Isaya nondiko niya: “Auru kuome mondo ubed maler.” (Isaya 52:11; 2 Jo-Korintho 6:17) Nyaka wawere gi gimoro amora motudore gi dinde mag miriambo.

17, 18. “Babulon Maduong’” en ang’o, to ang’o momiyo onego wawuog kuome mapiyo?

¹⁷ Din mar miriambo en din ma timo ang’o? En din moro amora ma lamo Nyasaye e yo mopogore gi kaka Muma puonjo. Muma luongo dinde ma kamago duto ni, “Babulon Maduong’.” (Fweny 17:5) Ang’o momiyo? Bang’ Ataro mar pi ma notimore e kinde Noa, puonj mang’eny mag miriambo e wi Nyasaye nochakore e taon mar Babulon. Puonj mag miriambogo nolandore e piny mangima. Kuom ranyisi, joma nodak Babulon nochako lamo grube mag nyiseche adek adek. E kindewagi, dinde mang’eny puonjo ni Nyasaye en nyadidek. Kata kamano, Muma puonjo maler ni nitie mana Nyasaye achiel kende mar adier, ma en Jehova, kendo ni Yesu en Wuode. (Johana 17:3) Gimachielo ma joma nodak Babulon ne oyiego en ni chuny dhano ok tho kendo ni inyalo sande e mach. Mano en miriambo.​—Som Weche Momedore namba 14, kod 17.

¹⁸ Nyasaye osesingo ni machiegnini obiro ketho dinde duto mag miriambo. (Fweny 18:8) Be ineno gimomiyo onego iwuog mapiyo e dinde mag miriambo? Jehova Nyasaye dwaro ni itim kamano mapiyo ka pok olewo.​—Fweny 18:4.

19. Jehova biro guedhi e yo mane ka iyiero tiyone?

¹⁹ Ka iyiero weyo din mar miriambo mondo iti ne Jehova, moko kuom osiepeni kata joodu nyalo wuoro gimomiyo itimo kamano. Ginyalo chako jari, kwedi, kata riembi. Ng’e ni Jehova ok bi weyi. Ibiro bedo e riwruok mar jotich Nyasaye moherore gadier e piny mangima, kendo man gi geno mar dak nyaka chieng’ e piny manyien ma Nyasaye osingo ne joge. (Mariko 10:28-30) Samoro moko kuom osiepeni kod joodu ma kwedi nyalo puonjore Muma bang’e.

20. Ang’o momiyo dwarore ni walam Nyasaye e yo moyiego?

²⁰ Machiegnini, Nyasaye biro tieko gik ma richo duto ma timore e piny, kendo Pinyruodhe biro locho e wi piny mangima. (2 Petro 3:9, 13) Mano nobed kinde maber miwuoro! Ji duto biro lamo Jehova e yo modwaro ni walamego. Omiyo, dwarore ni ikaw okang’ mapiyo sani mondo ilam Nyasaye e yo moyiego.