Fweny ma ne Omi Johana

Ka ne jaote Johana ni e jela e chula mar Patmo, Yesu nonyise fweny moko 16 ma lero gik ma ne dhi timore kinde mabiro. Fwenygo ne olero kaka Jehova ne dhi keto nyinge obed maler, kaka Pinyruodhe ne dhi biro, kod kaka dwache ne dhi timore e piny kaka timore e polo.

E achiel kuom fwenygo, Johana ne oneno Jehova ka obet e kom-loch e polo, ka jodongo 24 morwako lewni ma rochere olworo komeno, kendo girwako ogut osimbo molos gi dhahabu. Ne nitie mil polo e kom-lojno, kendo mor polo bende ne winjore kanyo. Jodongo piero ariyo gang’wen-go ne kulore e nyim Jehova, kendo ne gilame. E fweny machielo, Johana ne oneno oganda maduong’ mar joma oa e pinje mopogore opogore, kendo ma wacho dhok mopogore opogore ka lamo Jehova. Nyarombo ma en Yesu, ne tayogi ka terogi e pi ngima. Bang’e e fweny machielo, Johana noneno Yesu ka chako locho kaka Ruoth e polo ka en gi jodongo piero ariyo gang’wen-ka. E fweny ma noluwo mano, noneno ka Yesu kedo gi thuol mang’ongo ma en Satan kaachiel gi jochiendene. Yesu noriembogi e polo, mowitogi e piny ka.

Kae to Johana ne oneno Nyarombo kod ji 144,000 mowal kochung’ e Got Sayun. Bende, ne oneno malaika moro ka fuyo e wi piny mangima konyiso ji mondo giluor Nyasaye, kendo gimi Nyasaye duong’.

E fweny ma noluwo, ne oneno ka lweny mar Har–Magedon timore. Yesu gi jolwenyge ne oloyo Satan gi joge. E fweny mogik, Johana noneno ka joma ni e polo kod joma ni e piny tiyo kanyachiel gi kuwe e timo dwach Jehova. Satan gi kothe te koro ne osetiek chuth. Ji duto koro ne miyo nying Jehova duong’, kendo giduto ne gilame, bed ni gin e polo kata e piny.