Muma Oting’o Weche Moa Kuom Nyasaye

Jehova osemiyowa mich maber ma en Muma. Oting’o buge 66. Kata kamano, inyalo penjori niya: ‘Muma ne oa kanye? To ere kaka nondike?’ Mondo wayud dwoko mag penjogo, wanon ane kaka Muma nochoponwa.

1. Ka po ni dhano e ma nondiko Muma, ere kaka obedo Wach Nyasaye?

Muma ne ondik gi ji mopogore opogore ma dirom 40. Buk mokwongo ne ondik chiegni higni 3,500 mokalo to buk mogik ne ondik higni ma dirom 1,900 mokalo. Jondikogo nodak e ngima mopogore opogore. Kuom ranyisi, moko kuomgi ne omewo kendo osomo, to moko ne odhier kendo nodak e ngima mapile. To e ma pod weche duto manie Muma otudore adimba. Ere kaka mano nyalore? Nikech Muma en Wach Nyasaye. (Som 1 Jo-Thesalonika 2:13.) Jondikogo ne ok ondiko pachgi. Kar mano, ne giwacho “weche moa kuom Nyasaye kaluwore gi kaka roho maler ne tayogi.”a (2 Petro 1:21) Nyasaye notiyo gi roho mare maler e tayo jondikogo mondo gindik pache.​—2 Timotheo 3:16.

2. Gin jomage ma Muma nyalo konyo?

Nyasaye nowacho ni wach maber manie Muma ne dhi konyo joma wuok e “ogendni duto, gi dhoudi duto, gi dhok duto, kod pinje duto.” (Som Fweny 14:6.) Sani Muma yudore e dhok mang’eny moloyo buk moro amora. Chiegni ni ji duto nyalo yudo Muma. Ginyalo yudo Muma bed ni gidak kanye kata giwacho dhok mane.

3. Ere kaka Nyasaye oserito Muma?

Jondiko mag Muma notiyo gi gik ma ok dag aming’a kaka pien kata otas molos gi togo. Kata kamano, joma ne ohero Muma ne siko ka kopogi mondo kik gikethre mi gilal. Kata obedo ni jotelo kod jotend din moko notemo mondo giketh Muma, nitie joma noikore chiwo ngimagi mondo girit Muma. Onge ng’ato ang’ata kata gimoro amora ma osemono Jehova wuoyo kodwa. Muma wacho niya: “Wach Nyasachwa siko nyaka chieng’.”​—Isaya 40:8.

TIM NONRO

4. Muma nyisowa kama weche manie iye noaye

Tug VIDIO. Som 2 Timotheo 3:16, kae to uwuo e wi penjo ma luwo.

VIDIO: Muma Owuok Kuom Ng’a?​—En Bath Vidio (2:48)

• Ka dhano e ma nondiko Muma, ang’o momiyo iluonge ni Wach Nyasaye?

• Be in gadier ni Nyasaye ne nyalo tayo dhano mondo gindik pache?

5. Muma ne otony ka ne ji otemo kethe

VIDIO: Ne Gigeno Muma​—En Bath Vidio (William Tyndale) (6:17)

• Bang’ nono kaka ji notimo kinda mondo girit Muma, be mano jiwi mondo imed some? Ang’o momiyo iwacho kamano?

Som Zaburi 119:97, kae to uwuo e wi penjo ma luwoni:

• En ang’o ma ne chwalo ji mondo gilok Muma kendo gipoge ne ji kata obedo ni timo kamano ne nyalo miyo oneggi?

6. Muma en buk mondik ne ji duto

Muma oselok kendo opog e dhok mang’eny mohingo buk moro amora. Som Tich Joote 10:34, 35, kae to uwuo e wi penjo ma luwogi:

• Ang’o momiyo Nyasaye dwaro ni olok Muma kendo opoge e dhok mang’eny?

• En ang’o ma mori ahinya e wi Muma?

PUONJ MADUONG’

Muma en Wach Nyasaye kendo ng’ato ang’ata nyalo yude.

Ang’o ma ipuonjori?

• Ere kaka Nyasaye notayo joma nondiko Muma?

• Ang’o ma mori e wi kaka norit Muma, kaka iloke, kendo kaka ipoge?

• Iwinjo nade bang’ fwenyo ni Nyasaye osetemo matek mondo oyud yo monyalo wuoyogo kodi?

MED TIMO NONRO

Som histori mar Muma ma nyiso kaka noloke koa e kitepe machon mobedo Muma ma watiyogo e kindegi.

“Kaka Muma Nochoponwa” (Nenuru!, Novemba 2007)

Ne ane kaka oserit Muma kata obedo ni ne nitiere gik moko adek madongo ma ne nyalo miyo okethre.

“Gimomiyo Muma Osedak Aming’a” (Ohinga mar Jarito Na. 4 2016)

Ne ane kinda ma jomoko notimo mondo gilok Muma kata obedo ni ne giyudo chandruoge.

Ne Gigeno Muma (14:26)

Osekop Muma kendo oseloke nyading’eny. Ere kaka inyalo bedo gadier ni weche manie iye pok olokore?

“Be Dibed ni Weche Manie Muma Osewil Kata Ogueny?” (Sula ma yudore e jw.org)