SULA MAR 10
Ere Kaka Chokruoge mag Joneno mag Jehova Nyalo Konyi?
Be osegagweli e chokruoge mag Joneno mag Jehova? Ka pok idhiga e chokruoge mag Joneno mag Jehova, samoro inyalo winjo kiluor dhi kuno. Inyalo penjori niya: ‘Ang’o ma timorega e chokruogego? Chokruogego konyo nade? Ang’o momiyo onego adhi e chokruogego?’ E sulani, ibiro puonjori kaka dhi e chokruok nyalo konyi bedo machiegni gi Nyasaye kod kaka chokruogego nyalo konyi in iwuon.
1. Ang’o momiyo Joneno mag Jehova chokorega kanyachiel?
Ne ane kaka jandik Muma moro nolero gima duong’ momiyo onego wachokrega gi jowetewa. Nondiko niya: “Abiro pako Jehova e chokruok maduong’.” (Zaburi 26:12) Joneno mag Jehova bende bedoga mamor ahinya sama gichokore gi jowetegi. E piny mangima, giromoga juma ka juma mondo gipak Nyasaye, giwer, kendo gilem. Bende, gidhiga e chokruoge madongo higa ka higa.
2. Ang’o ma ibiro puonjori e chokruogewa?
E chokruogewa, wapuonjorega weche manie Muma kendo ‘ileronwaga tiend wechego e yo maber.’ (Som Nehemia 8:8.) Ka ibiro e chokruogewa, ibiro puonjori e wi Jehova kod kido mabeyo ma en-go. Kaka imedo ng’eyo yo ma Jehova oherigo, e kaka ibiro medo sudo machiegni kode. Bende, ibiro puonjori kaka onyalo konyi mondo idag e ngima maber.—Isaya 48:17, 18.
3. Ere kaka joma iromogo e chokruok nyalo konyi?
Jehova nyisowa niya: “Wadewreuru mondo wajiw hera kod timbe mabeyo, ma ok wajwang’ bedo e chokruogewa kanyachiel.” (Jo-Hibrania 10:24, 25) E chokruogewa, ibiro romo gi joma oherore kendo ma gombo mondo gimed ng’eyo Nyasaye mana kaka in. Ibiro winjo ka gijiwi gi paro mabeyo mowuok e Muma. (Som Jo-Rumi 1:11, 12.) Bende, ibiro romo gi ji mopogore opogore ma mor kata obedo ni ginyagore gi chandruoge moko. Magi gin moko kuom gik momiyo Jehova dwaro ni wachokre kanyachiel ma ok wabare!
TIM NONRO
Non ane gima timorega e chokruoge mag Joneno mag Jehova, kod gimomiyo ber dhi e chokruogego.
4. Chokruoge mag Joneno mag Jehova
Jokristo mokwongo ne romoga kanyachiel mondo gilam Jehova. (Jo-Rumi 16:3-5) Som Jo-Kolosai 3:16, kae to uwuo e wi penjo ma luwoni:
Ere kaka Jokristo mokwongo ne lamoga Jehova?
E kindegi, Joneno mag Jehova bende chokorega kanyachiel mondo gilam Nyasaye.Mondo ing’e gima timorega e chokruogego, tug VIDIO. Bang’ mano, ranguru picha ma nyiso joma ni e chokruok mar kanyakla kae to uwuo e wi penjo ma luwogi:
Gin ang’o ma timorega e Kingdom Hall ma chalre gi gima wasomo e Jo-Kolosai 3:16?
Be nitie gimoro amora momori e wi chokruogewa mineno e picha kata e vidio?
Som 2 Jo-Korintho 9:7, kae to uwuo e wi penjo ma luwoni:
Ang’o momiyo Joneno mag Jehova ok kwaga ji pesa e chokruogegi?
Inyalo nono kaachiel gi japuonjni gima ibiro wuoye e chokruok ma luwo.
Kuom gik moko duto mibiro tim e chokruok, en mane ma mori?
Be ing’eyo?
Ka idhi e jw.org, inyalo yudo kuonde mitime chokruoge kod sa mitimogie e piny mangima.
E chokruogewa, igologa twege, itimoga ranyisi, kendo ineno vidio. Chokruogewa ichako kendo itieko gi wer kod lamo
Nitie seche ma jowinjo nyalo chiwo paro
Orwak ji duto e chokruogewa, gibed joot, joma pok odonjo e kend, joma oti, kata nyithindo
Donjo en nono kendo onge sadaka moro amora ma ichoko
5. Dhi e chokruoge dwaro kinda
Ne ane ranyisi mar joodgi Yesu. Mondo gichop e chokruoge ma nitimoga higa ka higa, ne nyaka giwuoth kilomita 100 kuonde motimo gode kuom odiechienge mang’eny ka giwuok Nazareth nyaka Jerusalem. Som Luka 2:39-42, kae to uwuo e wi penjo ma luwogi:
Be iparo ni dhi Jerusalem ne dwaro kinda?
Ang’o momiyo samoro nyalo dwarore ni itim kinda mondo ichop e chokruok?
Be iparo ni en gima ber dhi e chokruoge kata ka timo kamano ok yot? Ang’o momiyo iwacho kamano?
Muma wacho ni dhi e chokruok en gima duong’ ahinya. Som Jo-Hibrania 10:24, 25, kae to uwuo e wi penjo ma luwoni:
Ang’o momiyo onego wadhi e chokruoge ma ok wabare?
PARO MA JOMOKO NIGO: “Ok ochuno ni idhi e chokruok. Inyalo puonjori Muma kata mana e odi.”
En ranyisi mane manie Muma ma nyiso gima Jehova dwaro ni watim?
PUONJ MADUONG’
Dhi e chokruoge biro konyi mondo imed ng’eyo Jehova, imed bedo osiepne, kendo ilame kanyachiel gi jomamoko.
Ang’o ma ipuonjori?
Ang’o momiyo Jehova jiwowa ni mondo wachokre kanyachiel?
Ang’o mibiro puonjori e chokruoge mag Joneno mag Jehova?
Iparo ni gin ber mage mamoko minyalo yudo sama idhi e chokruoge?
MED TIMO NONRO
To nade ka iluor dhi e chokruok? Ne ane kaka ng’at moro ma bende ne oluor nochako hero chokruoge.
Ne ane kaka rawera moro ne mor ahinya dhi e chokruoge kod gima ne otimo mondo odhi nyime dhi e chokruoge.
Ne ane kaka jomoko neno wach dhi e chokruok.
“Ang’o Momiyo Onego Idhi e Chokruoge Mitimo e Kingdom Hall?” (Sula ma yudore e jw.org)
Ne ane kaka ngima ng’at moro ma ne nie grup mar jomahundu nolokore bang’ dhi e chokruok mar Joneno mag Jehova.
“Onge Kama ne Anyalo Dhiye ma Onge Bunde” (Ohinga mar Jarito, Julai 1, 2014)