SULA MAR 11
Gin Ber Mage Minyalo Yudo Sama Isomo Muma?
Be isegawinjo ka tekni chako timo tich moro maduong’? Mondo tijno kik bed matek ahinya, inyalo poge matindo tindo. Mano be e gima nyalo timore sama idwaro chako somo Muma. Inyalo penjri niya, ‘Achak gi kanye?’ E sulani, wadwaro neno gik moko mayot minyalo timo mondo somo Muma obedni mamit.
1. Ang’o momiyo onego wasom Muma pile?
Ng’at ma somo Muma kata “chik Jehova” pile, biro bedo mamor kendo yorene biro dhi maber. (Som Zaburi 1:1-3.) Inyalo chako some mana kuom dakika moko matin pile ka pile. Kaka imedo ng’eyo Wach Nyasaye, e kaka ibiro medo hero somo Muma.
2. Ang’o ma biro konyi yudo ber sama isomo Muma?
Mondo wayud ber sama wasomo Muma, onego waling’ matin kendo wapar matut kuom gik ma wasomo. Onego wasome kendo ‘paro matut kuome.’ (Joshua 1:8, weche moler piny) Sama isomo Muma, inyalo penjri penjo kaka: ‘Wach ma asomoni puonja ang’o e wi Jehova Nyasaye? Ere kaka anyalo tiyo gi wachni e ngimana? Ere kaka anyalo tiyo gi ndikoni e konyo jomamoko?’
3. Ere kaka inyalo yudo thuolo mar somo Muma?
Be tekniga yudo thuolo mar somo Muma? Ng’enywa yudoga ka ok yotnegi yudo thuolo mar timo kamano. Tem mondo ‘iti maber gi kinde ma in-go.’ (Jo-Efeso 5:16) Inyalo timo kamano kuom keto tenge thuolo mar somo Muma pile ka pile. Jomoko somoga Muma gokinyi to jomoko some godiechieng’ kaka sama gin e lanj. Moko to some gotieno ka pok ginindo. In diher some seche mage?
TIM NONRO
Non gik minyalo timo mondo somo Muma obedni mamit. Puonjri kaka inyalo timo ikruok mondo iyud ber mathoth sama ipuonjri Muma.
Ng’ato nyalo puonjre hero somo Muma mana kaka onyalo puonjre chamo chiemo mopogore opogore
4. Puonjri kaka inyalo somo Muma e yo ma mori
Chako somo Muma nyalo bedo matek. Kata kamano, inyalo puonjri bedo gi “gombo mar” somo Muma mana kaka ng’ato nyalo puonjre hero chamo chiemo moro manyien. Som 1 Petro 2:2, kae to uwuo e wi penjo ma luwoni:
Be iparo ni ka isomo Muma pile ka pile to inyalo chako here kendo bedo gi siso mar some?
Tug VIDIO mondo ine kaka jomoko nochako hero somo Muma, kae to uwuo e wi penjo ma luwo.
Rowere manie vidiono noloyo pek mage?
Ang’o ma nokonyogi dhi nyime somo Muma pile ka pile?
Ere kaka ne gimedo bero yo ma gisomogo Muma?
Paro moko ma nyalo konyi chako somo Muma:
Ti gi Muma molok e yo makare kendo ma winjore mayot. Som Loko mar Piny Manyien ka oyudore e dhou.
Chak gi somo weche ma moriga ahinya. Mondo iyud paro moko ma nyalo konyi, som chat ma wiye wacho ni “Kaka Inyalo Chako Somo Muma.”
Ndik piny kata iket alama kama ichopoe. Ti gi chat ma yudore e bugni, ma wiye wacho ni “Kaka Inyalo Ng’eyo Kama Ichopoe Sama Isomo Muma.”
Ti gi JW Library® app. Inyalo tiyo kode e winjo kata somo Muma kamoro amora kitiyo gi simbi, tablet, kata gimoro machielo.
Ti gi Apendiks manie Loko mar Piny Manyien. Apendiksgo oting’o map, chat, kod kama lero tiend weche moko ma nyalo konyi mondo somo Muma obedni mamit moloyo.
5. Ikri maber ne puonjruok maru mar Muma
Som Zaburi 119:34, kae to uwuo e wi penjo ma luwoni:
Ang’o momiyo onego ilem ka pok ichako somo Muma kata iko puonjruok maru mar Muma?
Ere kaka inyalo yudo ber mathoth sa asaya ma upuonjoru Muma? Sama iiko sula moro e bugni, temie tiyo gi yore ma luwogi:
Som paragraf mokwongo okwongo manie sulano.
Many kendo isom ndiko moketi, kae to item tudogi gi weche misomo e sulano.
Kiew weche madongo ma chiwo dwoko mar penjo ka penjo; timo mae biro konyi ahinya sama unono sulano gi japuonjni.
Be ing’eyo?
Joneno mag Jehova osetiyo gi loko mang’eny mag Muma. Kata kamano, wamor ahinya gi Muma Maler—Loko mar Piny Manyien nikech oloke e yo makare, owinjore maler, kendo otiyo gi nying Nyasaye.—Ne sula ma yudore e jw.org ma wiye wacho ni “Be Joneno mag Jehova Nigi Mumbgi?”
PARO MA JOMOKO NIGO: “Puonjruok Muma tek ahinya. Adich ma ok anyal yudo thuolo mar puonjora.”
Ineno nade wachno?
PUONJ MADUONG’
Mondo iyud puonj mabeyo manie Muma, ket thuolo mar some, lem mondo iwinj tiend weche misomo, kendo itim ikruok ne puonjruok maru mar Muma.
Ang’o ma ipuonjori?
Ang’o ma biro konyi yudo puonj mathoth e Muma?
Gin kinde mage minyalo keto mondo isom kendo ipuonjri Muma?
Ang’o momiyo ber ka itimo ikruok ne puonjruok maru mar Muma?
MED TIMO NONRO
Ne ane paro moko ma nyalo konyi yudo ber mathoth sama isomo Muma.
“Kaka Somo Muma Nyalo Konyi Moloyo” (Ohinga mar Jarito Na. 1 2017)
Ne ane yore adek minyalo somogo Muma.
“Ere Kaka Muma Nyalo Konya?—Kare Mokwongo: Non Mumbi” (Sula ma yudore e jw.org)
Ne ane kaka somo Muma nyalo bedo mamit.
“Ere Kaka Muma Nyalo Konya?—Kare mar 2: Ket Somo Muma Obed Mamit” (Sula ma yudore e jw.org)
Ne ane gik minyalo puonjri kuom joma osebedo ka somo Muma kuom higni mang’eny.