SULA MAR 37
Ang’o ma Muma Wacho e Wi Tich kod Pesa?
Be isegabedo gi parruok e wi tich kata pesa? Seche moko manyo gik ma dwarore e ngima ka koni be walamo Jehova kaka owinjore nyalo bedo matek. Muma miyowa puonj ma nyalo konyowa.
1. Ang’o ma Muma wacho e wi tich?
Nyasaye dwaro ni wabed mamor gi tich ma watimo. Muma wacho ni “onge gima ber ma dhano nyalo timo moloyo . . . bedo mamor nikech tije matek mosetimo.” (Eklesiastes 2:24) Jehova tiyo matek. Sama wan jokinda kaka en, wamore kendo wan bende wabedo mamor.
Tich en gima dwarore ahinya. Kata kamano, ok onego wawe tich obed gima duong’ moloyo lamo Jehova. (Johana 6:27) Jehova singonwa ni ka waketo tiyone obedo mokwongo e ngimawa, to obiro miyowa gik ma dwarore e ngima.
2. Onego wabed gi paro mane e wi pesa?
Kata obedo ni Muma wacho ni ‘pesa konyo,’ osiemowa bende ni pesa kende ok nyal miyo wabed mamor. (Eklesiastes 7:12) Omiyo, Muma jiwowa ni kik waher pesa, to kar mano ‘gik ma wan-go sani mondo oromwa.’ (Som Jo-Hibrania 13:5.) Seche ma gik ma wan-go oromowa, ok wabi siko ka waparore nikech wadwaro gik mamoko momedore. Wabiro temo mondo kik wabed gi gope ma ok ochuno. (Ngeche 22:7) Bende, ok wabi donjo e tuke mag loyo mich e yor hawi kod ohelni ma nyalo miyo ng’ato omew piyo to seche moko ohalano nyalo miyo olal mwandune mang’eny.
3. Ere kaka wanyalo tiyo gi pesa e konyo jomamoko?
Jehova en Nyasaye ma jachiwo, kendo waluwo ranyisi mare ka ‘wabedo jochiwo kendo waikore pogo ne jomamoko gigewa.’ (1 Timotheo 6:18) Wanyalo tiyo gi pesawa e siro tije mag kanyakla kendo konyo joma ochando gik moko, to ahinya ahinya Jokristo wetewa. Gima duong’ ma Jehova ng’iyo en chuny ma wachiwogo, to ok ng’eny mar gima wachiwo. Sama wachiwo gi chunywa duto, wabedo mamor kendo wamoro Jehova.—Som Tich Joote 20:35.
TIM NONRO
Ne ane ber ma wayudo sama wabedo gi paro makare e wi tich kod ber ma wayudo sama gik ma wan-go oromowa.
4. Yo ma itiyogo onego omi Jehova duong’
Osiep manie kindwa gi Jehova, onego okonywa mondo wabed gi paro makare e wi tich. Tug VIDIO, kae to uwuo e wi penjo ma luwogi.
Ang’o ma omori e wi yo ma Jason nenogo tije kod timbe ma en-go kar tich?
Ang’o ma notimo mondo tich kik choch chenro mage mag lamo?
Som Jo-Kolosai 3:23, 24, kae to uwuo e wi penjo ma luwoni:
Ang’o momiyo onego wanon paro ma wan-go e wi tich?
Tich en gima dwarore ahinya. Kata kamano, ok onego wakete obed motelo ne lamo Jehova
5. Wayudo ber sama gik ma wan-go oromowa
Ji mang’eny temoga mondo gibed gi pesa mang’eny. Kata kamano, Muma to nyisowa wach moro mopogore. Som 1 Timotheo 6:6-8, kae to uwuo e wi penjo ma luwoni:
Muma jiwowa mondo watim ang’o?
Pod wanyalo bedo mamor kata ka wan gi gik matin. Tug VIDIO, kae to uwuo e wi penjo ma luwo.
Ang’o momiyo joutego mor kata obedo ni gin gi pesa matin?
To nade ka wan gi gik mang’eny to pod wadwaro momedore? Yesu nowuoyo e wi rach ma mano nyalo kelo. Som Luka 12:15-21, kae to uwuo e wi penjo ma luwoni:
En ang’o ma ipuonjori e wi ranyisi ma Yesu nochiwo?—Ne kwan matindo 15.
Som Ngeche 10:22 kae to ipim gi 1 Timotheo 6:10. Bang’ somogi, unyalo wuoyo e wi penjo ma luwogi:
E kind bedo osiep Jehova kod bedo gi pesa mang’eny, mane maduong’ie moloyo? Ang’o momiyo iwacho kamano?
Gin chandruoge mage ma wanyalo yudo ka kinde duto wamanyo mana pesa?
6. Jehova biro miyowa gik ma wachando
Wanyalo ng’eyo ka be wageno kuom Jehova gadier sama weche mag tich kod pesa chandowa. Tug VIDIO mondo une kaka wanyalo nyagore gi pek kaka mago, kae to uwuo e wi penjo ma luwo.
Gin chandruoge mage ma owadwano noyudo?
Notimo ang’o mondo onyagre gi chandruogego?
Som Mathayo 6:25-34, kae to uwuo e wi penjo ma luwoni:
Jehova singo ni obiro timo ang’o ne joma oketo dwache obed mokwongo e ngimagi?
PARO MA JOMOKO NIGO: “Nyaka ati matek mondo apidh jooda. Ok anyal dhi e chokruoge mag kanyakla juma ka juma.”
En ndiko mane ma konyi bedo gadier ni keto lamo Jehova obed mokwongo e ngimani e yiero maberie mogik?
PUONJ MADUONG’
Tich kod pesa gin gik ma dwarore ahinya. Kata kamano, ok onego gichoch chenrowa mag tiyo ne Jehova.
Ang’o ma ipuonjori?
En ang’o ma nyalo konyowa mondo wabed gi paro makare e wi tich?
Gin ber mage ma wayudo ka gik ma wan-go oromowa?
Inyalo nyiso nade ni in gadier chuth ni Jehova biro rito jotichne?
MED TIMO NONRO
Non ane ka be Muma wacho ni pesa rach.
“Be Pesa e Chakruok mar Richo Duto?” (Sula ma yudore e jw.org)
Non ane kaka inyalo tiyo gi pesani e timo gik ma moro Nyasaye.
“Ang’o ma Muma Wacho e Wi Bedo Jochiwo?” (Sula ma yudore e jw.org)
Be tugo tuke mag loyo mich nyalo kelo ne ng’ato hinyruok?
“Gima Muma Wacho—Tuke mag Loyo Mich e Yor Hawi” (Nenuru!, Mach 2015)
Ne ane gima nojiwo ng’at moro ma ne tugo tuke mag loyo mich kendo ma ne en jakuo mondo olok kit ngimane.
“Nahero Tuke Mipiemie gi Faras” (Ohinga mar Jarito, Novemba 1, 2011)