Penjo Moa Kuom Josombwa

Kapo ni nyathi otho e ich, be nyathino nigi geno mar chier?

Kuom joma pok olalo nyathi e tho, nyalo bedonegi matek ng’eyo lit ma joma oseyudo masira makamano bedogo. Jonyuol moko bedo gi kuyo ahinya. Nitie miyo moro ma nyithinde abich ne otho e ich kapok onyuolgi. Bang’ kinde, ne onyuolo nyithindo ariyo ma yawuowi mangima. Kata kamano, ne oparo lit ma ne obedogo bang’ lalo moro ka moro kuom nyithindego. Kinde duto ma ne ongima, ne osiko koparo nyithinde ma ne otho e ich, kendo noparo higini ma dikoro gin-go dine bed ni gingima. Be Jokristo makamago nigi gimomiyo ginyalo bedo gadier ni ibiro chier nyithindgigo?

Dwoko mayot kuom penjono en mana ni, ok wang’eyo. Muma ok wuo ngang’ achiel kachiel e wi chier mar nyithindo motho e ich. Kata kamano, Wach Nyasaye oting’o puonj moko manyalo mulo penjono kendo manyalo miyowa hoch moromo.

We wanon ane penjo moko ariyo ma nigi tudruok. Mokwongo, e wang’ Jehova, en karang’o ma ngima dhano chakoree—kar mako ich koso kar nyuol? Mar ariyo, Jehova neno nade nyathi mapok onyuol—be onene kaka ng’ato koso onene anena kaka gimoro manitie ei dhako? Puonj manie Muma chiwonwa dwoko moriere kuom penjo ariyogi.

Chik Musa ne nyiso ratiro ni ngima chakore, ok kar nyuol ng’ato, to motelo ne mano. Chikno ne nyiso mano nade? Ne onyiso ni ng’ato monego nyathi mapok onyuol ne inyalo negi. Chikno nowacho kama: “Enochul ngima kar ngima.”a (Wuok 21:⁠22, 23) Kuom mano, nyathi mapok onyuol manie ich, ngima kendo en ng’ato. Ng’eyo adierani osekonyo Jokristo tara gi tara, mondo gikwed tim mar golo ich, kendo gine timno kaka richo maduong’ e wang’ Nyasaye.

En adier ni nyathi mapok onyuolno ngima, to kata kamano Jehova kawo ngima nyathino kaka gima duong’ maromo nade? Chik monyis malo kanyo ne dwaro ni oneg ng’at maduong’ momiyo nyathi mapok onyuol otho. Kuom mano, nenore maler ni ngima nyathi mapok onyuol en gima duong’ ahinya e wang’ Nyasaye. E wi mano, Ndiko mang’eny ei Muma nyisowa ni Jehova neno nyathi mapok onyuol kaka ng’ato. Kuom ranyisi, ka otelne gi roho mar Nyasaye, Ruoth Daudi ne owacho kama kuom Jehova: “Niuma e i mama. . . . Wang’i noneno chakruok mar denda, fuonde duto mag denda nondik e kitapi, kaka nolosgi chieng’ ka chieng’.”—Zab. 139:⁠13-​16; Ayub 31:⁠14, 15.

Jehova bende neno kido makende mag nyathi mapok onyuol, kendo oneno kaka kidogo nyalo miyo nyathi otim gik moko e ndalo mabiro. Kane Rebeka chi Isaka yach rude, Jehova nokoro wach kuom yawuowi ariyo ma ne kedo e iye, kendo mano nyiso ni Jehova ne oseneno kido moko kuomgi ma ne dhi mulo ji mang’eny e ndalo mabiro.—Chak. 25:⁠22, 23; Rumi 9:⁠10-​13.

Sigand Johana Jabatiso bende en mamorowa e lero wachni. Injili mar Luka wacho kama: ‘Kane Elisabeth owinjo mos Mariam, nyathi notugo e iye, kendo roho maler nopong’o Elisabeth.’ (Luka 1:⁠41) Kowuoyo kuom gima ne otimoreni, Luka mabende ne en laktar, ne otiyo gi wach moro e dho-Gik, matiende nyalo bedo nyathi mapok onyuol kata moa nyuol. Ne otiyo gi wach nogono kowuoyo kuom Yesu kapod Yesu ne en nyathi monindo e kund dhok.—Luka 2:⁠12, 16; 18:15.

Bang’ nono wechegi duto koda Ndikogo, be Muma chiwonwa thuolo mar keto pogruok maduong’ e kind nyathi manie ich kod mano ma eka oa nyuol? Nenore ni ok en kamano. To mano bende winjore gi weche ma josayans osefwenyo ndalogi. Kuom ranyisi, jotim nonro osefwenyo ni nyathi manie ich nigi nyalo mar timo gimoro, kaluwore gi gik matimore oko mar i min mare. Omiyo, ok kawwa gi wuoro ni miyo mapek hinyo bedo gi tudruok machiegni ahinya gi nyathi madongo e iye.

Nyithindo inyuolo bang’ dongo e ich kuom ndalo mopogore opogre. Ne ane ranyisini: Miyo moro nyuolo nyathi mangima to ndalone mar nyuol pok oromo, kae to nyathino tho bang’ odiechienge manok. Miyo machielo to ting’o nyathine nyaka chop kinde monego onyuolie, to kata kamano nyathine tho mana kochiegni nyuol. Be miyo mokwongono bedo gi geno ni nyathine ibiro chiero mana nikech ne onyuol ka kindene mar nyuol podi, to miyo mar ariyo to ok bed gi geno makamano?

Kuom mano, ka waketo wachni e yo machuok, kuom adier Muma puonjo ni ngima chakore sama omakie ich, kendo ni Jehova neno nyathi mapok onyuol kaka ng’ato, ma ngimane duong’ e wang’e. Kaluwore gi adierago manie Muma, jomoko nyalo neno ni ok onego wawach ni onge geno mar chier ne nyathi motho kapok onyuole. Kuom adier, ginyalo neno ni paro kamano keto kiawa kuom chung’wa motegno kaluwore gi Muma e kwedo tim golo ich, ma wanyalo wacho ni otenore ahinya kuom puonjgo.

E kinde mokalo, gasedni osepenjo penjo moko manenore ni keto kiawa kabe nobedie chier mar nyithindo motho kapok onyuolgi. Kuom ranyisi, be Nyasaye biro keto ei dhako e Paradis, ngima nyathi ma ne eka oa ochako dongo? Kata kamano, medo puonjruok kaachiel gi paro matut e yor lamo osemiyo Bura Maduong’ ong’ado ni penjo gik makamago ok kony kuom wach geno mar chier. Yesu nowacho kama: “Gik moko duto nyalore kuom Nyasaye.” (Mari. 10:27) Gima ne otimore ne Yesu owuon nyiso kaka wechego gin adier chuth; ne odar ngimane a e polo nyaka e i nyako mapok nong’eyo dichwo—gima kuom adier ok nyalore ngang’ kaluwore gi pach dhano.

Be magi duto nyiso ni kare Muma puonjo ni nyithindo ma tho kapok onyuolgi ibiro chier? Nyaka wajiw kendo ni Muma ok dwok penjono achiel kachiel, omiyo onge tiende dhano ramo ni mano e gima biro timore. Wachni en wach manyalo nyuolo penjo mang’eny mopogore opogre maonge giko. Kuom mano, daber ka ok waketre kuom paro apara. Gima wang’eyo en mae: Wachno nie lwet Jehova Nyasaye, ma kechne ng’eny kendo opong’ gi ng’wono kod hera. (Zab. 86:15) Onge kiawa ni gombo ma en-go en mar tieko lit ma tho kelo, kokalo kuom chier. (Ayub 14:⁠14, 15) Wanyalo bedo gadier ni kinde duto otimo gik makare. Obiro chango adhonde mang’eny ma ngima mar piny marachni keto kuomwa, sama obiro chiko Wuode “mondo oketh tich Satan.”—1 Joh. 3:8.

[Weche moler piny]

[Picha manie ite mar 23]

Jehova biro changowa kuom lit duto mwayudo e ngima