Nyasi ma Jehova Pidhowae Kendo mar Mor
1. Ere kaka Jehova chopo dwach jotichne mar bedo e winjruok maber kode?
1 Jehova chopo dwach jotichne mar bedo e winjruok maber kode e yor hera. Seche ma ji mathoth e piny nigi kech mar ng’eyo Jehova kod dwarone, wan to wachiemo maber ahinya. (Isa. 65:13) Yo achiel ma Jehova pidhowago en kuom chokruoge mag distrikt mitimo higa ka higa. Be itimo ikruok mar bedo e program duto mar Chokruog-Distrik mabiro ma wiye en “Kuongozwa na Roho ya Mungu”? Puonj mabeyo kendo magerowa e winjruokwa gi Jehova oseiki.
2. Ikruok chon ne chokruok oriwo ang’o giri?
2 Tim Chenro Chon: “Chenro mag ng’at matiyo matek kelo ohala.” (Nge. 21:5, Luo, 2003) Kuom mano, e tieko ikruok mitimo mar bedo e odiechienge adekgo duto mag chokruog-distrikt, kik iwe ma ok iwuoyo gi jal mondiki tich kapo ni dwarore mondo ikaw thuolo mar dhi e chokruogno. Be isetimo chenro kapo ni ibiro dwaro kar nindo? Dwarore bende ni ichan chamo chiemb odiechieng’ kaachiel gi oweteni kama itimoe chokruok. Tim chenro mar chopo chon kar chokruok odiechieng’ kodiechieng’, mondo imany kar bet kendo mondo iwer wer michakogo kod winjo lamo michakogo.
3. Gin lewni machalo nade ma onego wachan rwako?
3 Onego wane ni lewni ma wabiro rwako gin mobidhore kendo mowinjore. (1 Tim. 2:9, 10) Chokruog-distrikt miyowa thuolo maber ahinya mar chiwo neno ne jomoko. Ka warwakore e yo manyiso luor seche ma wan e dala mitimoe chokruok kendo rwako baj mag chokruog-distrikt, wabedo mopogore gi joma ok gin Joneno kendo wamiyo joma nenowa bedo gi paro maber.
4. Ang’o mabiro konyowa kaachiel gi joodwa e yudo ber maduong’ kuom programno?
4 Chik Iti Malong’o: Kuom adier, ok wadwar ni wach moro amora kuom puonj mag Jehova kod dwarone mibiro chiwo okalwa! (Nge. 22:17, 18) Luwo jal masomo ndiko ka wasomo Mumbewa kod ndiko piny weche miwacho biro konyowa keto pachwa e program mondo wageng’ gima nyalo galo pachwa. Bang’e godhiambo, wanyalo tiyo gi weche ma ne wandiko piny e wuoyo gi jomoko kuom weche ma ne omorowa e programno. E higini mosekalo osenwang’ ni rowere moko bet kaachiel e chokruok kae to gi goyo mbaka seche ma program dhi nyime kata tiyo gi simbegi e oro wach ne jomoko. Kapo ni wan gi nyithindo, moriwo rowere, biro bedo maber ka wabet kanyachiel kodgi kendo winjo program gi joodwa moloyo weyo nyithindwa bedo gi rowere moko kamachielo.
5. Ere kaka wanyalo medo mor mar chokruog-distrikt?
5 Yud Mor Kuom Riwruok gi Owete: Chiemo bedo mamit ahinya kichame kanyachiel gi osiepe. (Nge. 15:17) E yo machalo kamano, riwruok gi owetewa gi nyiminewa medonwa mor mar chokruok. Kuom mano, seche ma program ok dhi nyime mano kaka en gima ber ahinya, kawo thuolo mar ng’eyo owete gi nyimine kendo yudo mor kuom riwruok gi jowetewa! (Zab. 133:1) Seche ma jakom gwelowa mondo wabed piny ka wer pok ochakore, onego wang’ad mbaka ma ne wagoyo, kendo wabed piny kapok program ochakore.
6. Nyis wach miseneno manyiso kaka wanyalo chiwo neno ne ji e dala mitimoe chokruok.
6 Ti Gi Thuolo Miyudo E Chiwo Neno: Pile chokruog-distrikt miyowa thuolo maber ahinya mar chiwo neno. Thoth joma obiro e chokruok kodhi chiemo e otel bang’ chokruok, joma tiyo kuondego penjo penjo motudore gi wi chokruok monyisi e baj mar chokruok. Mani osekonyo e chako wuoyo kod chiwo neno maber kuom Wach Nyasaye. Moko kuom joma ne openjo ne ogwel e chokruok kendo ne gibiro.
7. Ang’o momiyo onego wadhi e chokruog-distrikt mabiro?
7 Seche mang’eny osetigo e iko program, iko kama ibiro timie chokruogno, iko migepe mopogore opogore mag chokruok, kod iko twege duto. Tije duto mosetim e yor hera e iko program mar yudo puonj mag Jehova kod dwarone nyiso kaka Jehova rito oganda joge maber. Mad wabedie waduto kendo wapuonjre weche mang’eny kaka nyalore! Ka watimo kamano, wabiro ‘wer nikech mor manie chunywa,’ mopogore gi joma nie piny.—Isa. 65:14.
[Sanduk manie ite mar 4]
Weche Miparonwa Kuom Chokruog-Distrikt
◼ Seche mag Program: Program biro chakre sa 3:20 okinyi kuom odiechienge adekgo duto. Rangeye ibiro yawo sa 2:00 okinyi. Sama ichako goyo thumbe, onego mano yud ka waduto wasebet e kombewa mondo omi program ochakre gi luor mowinjore. Program biro rumo sa 10:55 odhiambo chieng’ Tich Abich gi Ngeso, to obiro rumo sa 10:00 odhiambo chieng’ Jumapil.
◼ Kar Mtokni: Kuonde duto ma ibiro timoe chokruog-distrikt to nigi kuonde chunge mtokni ibiro yie ne ji ketoe mtokni ma ok otim chudo, joma okwongo biro ema kwongo nwang’o. Baj mag chokruog-distrikt ema ibiro ti godo kaka gir ng’eyo joma onego omi kar keto mtoka. Joma ong’ol ma dwaro chungo mtokni machiegni gi kuonde ma idonjogo nyalo kwayo kony kuom jorwak welo.
◼ Mako Kom: Inyalo mako kombe mana ni jogo ma wuotho kodi e mtoka achiel kata ne joma idak godo e ot achiel.
◼ Chiemb Odiechieng’: Wakwayi mondo iting’ chiemb odiechieng’ moloyo wuok kar chokruok ni idhi manyo chiemo seche mag yueyo modiechieng’. Ng’ato nyalo tiyo gi gir ting’o chiemo manyalo romo e bwo kome. Gik madongo mag ting’o chiemo, gik molos gi glas, koda kong’o ok oyie ne ng’ato birogo kar chokruok.
◼ Chiwo: Wanyalo nyiso ni wadwoko erokamano ka wagolo chiwo ne tich madhi nyime e piny mangima, kendo wanyalo timo kamano ka wan e Od Romo marwa kata e chokruog-distrikt. Chiwo mag pesa michiwo kitiyo gi chek e chokruog-distrikt onego oketie nying riwruok ma Joneno tiyogodo e pinyu.
◼ Aksident Koda Gik Matimore Apoya: Ka nitie gima otimore apoya madwaro ni mondo ng’ato oyud thieth mapiyo ka en e chokruog-distrikt, nyisuru achiel kuom jorwak welo man machiegni mondo oter wach sano sano ne joma ochung’ne migawono, mondo jal mowinjore moseket one gima inyalo tim mondo ochiw kony madwarore. Joma ochung’ne migawono biro neno kaka ginyalo konyo e wach motimore apoya.
◼ Joma Itgi Ok Winj Mayot: Kwa kony mondo ibed but spika.
◼ Modhi Ma Nigi Suya: Nitie chokruoge moko mag distrikt mitimo kuonde mogeng’ore. Kuom mano, en gima biro nyiso ng’wono ka ok wati ahinya gi modhi magolo suya ahinya, manyalo chando jogo ma nigi tuoche mag kor.—1 Kor. 10:24.
◼ Fom mag Manyo Ji: Fom mar Tafadhali Fuatia Upendezi (S-43) onego oti godo e chiwo weche kuom ng’at moro amora morwako wach bang’ ka oselendne e yo ma ne ok ochan e kinde chokruog-distrikt. Jolendo onego oting’ fomgo achiel kata ariyo sama gidhi e chokruog-distrikt. Fom ma osepong’ iye maber inyalo ter kar Migawo mar Buge kata miyo jagoro bang’ dok e kanyaklau.—Ne Tijwa Mar Pinyruoth, ma Februar 2005, ite mar 6 (Swahili).
◼ Kuonde Chiemo: Mi nying Jehova duong’ kuom tim maber seche ma in kuonde chiemo. Kuonde mang’eny michieme, ji thoro weyo gimoro matin ne jotich, kaluwore gi kaka olosgi.
◼ Otende: (1) Koyie kik imak kuonde nindo mokalo mago ma ibiro tiyogo, kendo kik iwe ji mokalo kwan moketi onind e odno. (2) Kochuno ni nyaka ilok chenro ma ne iseketo mar mako kar nindo, nyis weg otel gie sechego. (3) Kaw gir dhiro osike ei otendno mana ka iikri mar tiyo kode, kendo idwoke mapiyo mondo jomoko bende oti kode. (4) Kik ited e ot kama ok oyienie timo kamano. (5) Ne ni iweyo gimoro matin ne jal malero ot. (6) Kinde duto, nyis nyak mar roho kitudori gi jotich manie otendno. (7) Ka wach moro marach oneno e ot ma omiyino, ne ni inyiso owete ma tiyo Kar Migawo mar Kuonde Nindo sama in e chokruok.