Houru Joma Ywak
1. Ang’o momiyo joma ywak dwaro hoch?
1 Lalo ng’at moher e tho en gima chando chuny ahinya, to moloyo ne jogo ma onge geno mar Pinyruoth. (1 Thes. 4:13) Thoth ji wuoroga ni: ‘Ang’o momiyo ji tho? Ang’o ma timorenegi ka gisetho? Be abiro neno ng’at mahero mosetho kendo?’ Ochiwnwa paro piny kae ma wanyalo tiyogo e hoyo jogo ma waromogo seche mwalendo ma ywak nikech watgi moro kata osiepgi moro otho.—Isa. 61:2.
2. Ka wuon ot onyisowa ni oywago ng’at motho, be kinde duto owinjore kawo thuolo malach e chiwo neno?
2 E Ot ka Ot: Wuon ot nyalo wachonwa ni ng’ato oa tho mana machiegni kuom joode. Be uyude ka okuyo? Be ode opong’ gi wede ma ywago ng’at mothono? E kinde makamago, ok ber kawo thuolo malach e chiwo neno. (Ekle. 3:1, 7) Kamoro wanyalo goyone mos, bang’ mano wamiye trakt, gaset, kata brosua mowinjore kae to waa. Bang’e wanyalo duogo e kinde mowinjorene mondo wamed miye hoch moa e Muma.
3. Ka thuolo oyudore, ndiko mage ma wanyalo nyiso wuon ot ma kuyo?
3 Nitie kinde moko mwanyalo yudo ni e limbe mokwongo wanyalo wuoyo kuom kinde malach. Kata obedo ni mano ok en kinde mar kwedo paro ma ok kare, wanyalo somonegi singo ma Muma chiwo kuom chier. (Joha. 5:28, 29) Kata wanyalo nyisogi gima Muma wacho kuom chal mar joma otho. (Ekle. 9:5, 10) Ranyisi moro mar chier ma ne otimore mayudore e Muma bende nyalo chiwo hoch. (Joha. 11:39-44) Yo machielo nyalo bedo wuoyo kuom weche manyiso geno kuom Jehova ma Ayub, jal ma ne ochung’ motegno ne owacho. (Ayub 14:14, 15) Ka pok waa, wanyalo miye brosua mar Ni Nini Hutupata Tunapokufa?, Mtu Fulani Umpendaye Anapokufa, kata brosua moro mowinjore kata trakt. Kata wanyalo weyone bug Muma Puonjo, wawuo kuom weche manie sula mar 6, kae to wachan mar duogo wuoyo kuom wachno.
4. Thuolo mage mamoko ma wan-go mar chiwo hoch?
4 E Thuolo Mamoko: Kapo ni twak mar yik ibiro gol e Od Romo, be jogo ma ok gin Joneno mag Jehova biro bedoe? Inyalo migi buge mahoyo ji. Weg kuonde moko mikanoe ringre joma otho bende ohero bedo gi buge machiwo hoch ne joot ma yuago jogi motho. Seche moko, lendo mag yik manuang’ore e gasede osechiwo thuolo mar ndiko barua machuok mahoyo joot ma ng’atgi otho. E ranyisi moro, bang’ yudo barua moro ma ne oting’o trakt, jal moro ma chiege ne otho ne odhi kod nyare e od jalendono mopenje ni: “Un ema ne uorona baruani? Kuom adier, daher ng’eyo Muma ahinya!” Jalo kod nyare ne oyie puonjruok Muma kendo ne gichako dhi e chokruok mag kanyakla.
5. Ang’o momiyo onego wamany thuolo mag hoyo jogo makuyo?
5 Eklesiastes 7:2 wacho kama: “Dhiyo e dala ka ma ji yuagoree ber, moloyo dhiyo dala mar mor.” Kinde mang’eny, ng’ama ywagore oikore ne winjo Wach Nyasaye moloyo ng’ama dwaro mana kinde mag mor. Waduto onego wamany thuolo mowinjore mag hoyo jogo ma kuyo nikech tho mar ng’at moher.