Tiyo Tij Lendo Dwaro Nano
1 Kuom higini mokalo 30, jaote Paulo ne oyudo mor kuom kawo tich mar lando wach maber kaka tich maduong’ e ngimane. Mana kaka tich moro amora maber nyalo bedo, tij Paulo mar lendo ne ok obedo ma onge gi chandruoge moko. (2 Kor. 11:23-29) Kata kamano, Paulo ne ok oweyo lendo. (2 Kor. 4:1) Ne ong’eyo ni teko mar nano e chopo tije mar lendo, ne nyalo mana wuok kuom Jehova. (Fili. 4:13) Kaluwore gi ranyisine maber e nano kochung’ motegno, Paulo ne nyalo wacho kama: “Beduru jo ma luwo timna, kaka an bende aluwo tim Kristo.”—1 Kor. 11:1.
2 Kaka Wanyalo Nano: Odiechieng’ kodiechieng’, owetewa mang’eny romo gi akwede, ijarogi, kendo jo utegi, jotich wetegi, kata joskul wetegi ok mor kodgi. (Math. 10:35; Joh. 15:20) Nyalo bedo ni gima kamano timoreni. Seche moko nyalo bedo ni ikedo gi chandruok moro mar tuwo, kata nyalo bedo ni odiechieng’ kodiechieng’ ikedo matek mondo igeng’ tembe kuom yieni, kata gik manyalo moni nano. Wanyalo yudo teko kuom nono ranyisi mag jotich Nyasaye machon kaachiel gi ranyisi mag Jokristo wetewa ma ndalogi ma oseyudo tembe kendo loyo tembego.—1 Pet. 5:9.
3 Wanyalo yudo teko mar siko ka wachung’ motegno e tijwa mar lendo kuom temo matek mondo wane ni ‘waserwako gik lwenje duto mag Nyasaye.’ (Efe. 6:10-13, 15) Lamo bende dwarore mondo omi wanan. Nyasaye miyowa roho mare maler mondo omi wanan e bwo tembe. (2 Kor. 6:4-7) Mondo okonywa locho e kedo gi Satan koda pinye, nyaka waluw weche ma Nyasaye paronwa mamiyo wabedo gi teko mar nano. (Zab. 119:24, 85-88) Mana kaka nyathi ma wuon ohero nyalo somo barup wuon mare nyadinwoya, somo Muma pile ka pile biro jiwo winjruokwa gi Jehova. Wayudo rieko makonyowa e nano kokalo kuom puonjruok mwatimo wan wawegi pile ma ok wabare, kendo mano miyo paro mag Nyasaye chiko gik ma wang’ado timo e ngima kendo konyowa chung’ motegno e nyim Jehova.—Nge. 2:10, 11.
4 Nano Kelo Gweth Mang’eny: Mana kaka ne otimore ne Paulo, nano kwachung’ motegno e tijwa mar lendo moro chuny Jehova, kendo mano miyo wan wawegi, kaachiel gi jomamoko yudo gweth mang’eny. (Nge. 27:11) Mad wang’ad ei chunywa mar nano e tij lendo, nimar timo kamano biro nyiso ni yie marwa “nengone tek ngang’ moloyo dhahabu ma rumo, kata obedo ni itemogo gi mach.”—1 Pet. 1:6, 7.