Gibiro Winjo Nade?
1. Ang’o momiyo tij lendo ok yot kinde moko, to ang’o momiyo onego wanan e tijno?
1 Nikech odiechieng Jehova okayo machiegni ahinya, dwarore mapiyo mondo okonyo joma moko mang’eny mondo ong’e Nyasaye kaachiel gi dwarone kuom dhano. (Joh. 17:3; 2 Pet. 3:9, 10) Timo kamano ok yot kinde moko, nikech ji mang’eny ok dew wach ma walando negi, kata ginyalo jarowa nikech tijwa mar lendo. (2 Pet. 3:3, 4) Kata kamano, wan gadier ni podi nitie jomoko e alworawa mabiro rwako wach maber bang’ winjo. Joma kamago biro winjo nade wach ka onge jalendo?—Rumi 10:14, 15.
2. Ranyisi ma jaote Paulo noketo jiwowa nade?
2 Sama Wayudo Akwede: Nikech ji mang’eny podi dwaro winjo wach Pinyruodh Nyasaye, gimoro ok onego omonwa lendonegi. Dala ma jaote Paulo nokwongo landoe wach maber e Ulaya ne en dala mar Filipi. Kane odonjne Paulo gi Sila gi ketho ma ok ne gitimo, ne ochwadgi kendo ne owitgi e od twech. (Tich 16:16-24) Kata kamano, sand malitno ok ne omiyo Paulo oweyo lendo nikech luoro. Bang’ wuok Filipi, kane olimo dala mar Thessalonika e tije mar misonari, ne ‘otimo chir kuom Nyasaye.’ (1 Thes. 2:2) Donge ranyisi ma Paulo noketo nyiso gimomiyo ok onego “waol ” ?—Gal. 6:9.
3. Gin gik mage manyalo miyo joma ne ok dwar winjo wach olok parogi?
3 Ji mang’eny ma osebedo ka tamore winjo wach maber kuom higini moko, kindegi giyie winjo wach ma walando negi. Chandruoge mag yuto, midekre, tho mar achiel kuom joot, kata gik maricho ma timore e piny osemiyo joma kamago obedo gi lokruok e parogi. (1 Kor. 7:31) Jomoko ma jonyuolgi ne tamo winjo wach, sani gin joma dongo kendo giikore winjo wach. Tijwa mar lendo miyo joma kamago yudo thuolo mar ‘luongo nying [Jehova, NW]’ ka podi kinde nitie.—Rumi 10:13.
4. Ang’o ma jiwowa mondo wa dhi nyime gi tijwa mar lendo ma ‘ok wawe’?
4 ‘Kik Iwe’ Lendo: Herawa kuom Nyasaye kod joma odak e alworawa biro jiwowa mondo wadhi nyime gi tijwa mar lendo kod timo ji jopuonjre ma ‘ok wawe,’ mana kaka Jokristo mokwongo ne ok oweyo. (Tich 5:42) Ji mang’eny e ndalogi ‘parore, kendo yuak nikech weche duto modwanyore ma timore’ e kindegi. (Eze. 9:4) Mano kaka joma kamago yudo geno kod chuny mogonyore bang’ winjo wach maber! Kata ka ji mang’eny otamore winjowa, Ndiko miyo wabedo gadier ni Jehova mor ahinya gi kinda ma wanyiso.—Hib. 13:15, 16.