“Kik Iluor”
1. Pek mage machalo gi ma Jeremia noyudo ma wan bende wanyalo romogo?
1 Kane ochik Jeremia mondo obed janabi, nokwongo obedo maluor. Kata kamano, Jehova nojiwe kama, “kik iluor,” kendo notege e yo mang’won mondo ochop migawo ma nomiye. (Yer. 1:6-10) E ndalowagi bende, luoro nyalo mulo yo mwalendogo. Luoro mar kaka ji biro rwako wach mwalando kinde moko nyalo monowa lendo. Ere kaka wanyalo loyo luoro kaka mano, to gweth mage ma wan wawegi wanyalo yudo kuom timo mano?
2. Ere kaka ikruok nyalo konyowa loyo pek mwaromogo e tij lendo?
2 Ikri Motelo: Ikruok maber nyalo duoko chien luoro ma wan-go. Kuom ranyisi, ka wakwongo wanono weche ma ji nyalo tiyogo e geng’o wach mwalandonegi, wabiro bedo moikore ne chiwo dwoko mowinjore. (Nge. 15:28) Donge nyalo bedo maber ka watiyo gi kinde mag Lamo mar Joot e timo ikruok manyalo konyowa loyo pek mwanyalo romogo e skul kata e tij lendo?—1 Pet. 3:15.
3. Ere kaka geno kuom Jehova konyowa loyo luoro?
3 Gen Kuom Jehova: Gima duong’ mabiro konyowa loyo luoro en geno kuom Nyasachwa. Jehova osingo ni obiro konyowa. (Isa. 41:10-13) Onge yo machielo manyalo konyowa maloyo mano. E wi mano, Yesu nonyiso malong’o ni ka wach moro opoyowa seche mwalendo, roho maler mar Nyasaye biro konyowa dhi nyime gilendo. (Mari. 13:11) Omiyo, kwa Jehova kinde duto mondo omiyi roho mare maler.—Luka 11:13.
4. Gweth mage mwayudo kuom timo kinda e tij lendo kata bed mana ni wanyalo romo gi pek moko?
4 Gweth: Ka wamedo timo kinda e tij lendo kata bed mana ni waromo gi pek moko, wamedo yudo teko mar nyagruok e yo mowinjore gi tembe mwanyalo romogo e kinde mabiro. Nyaka wanyag kido mar chir, ma en gima nyiso ni wan gi roho maler. (Tich 4:31) E wi mano, kaka Jehova medo konyowa loyo luoro ma wan-go, e kaka wamedo jiwo yie kod genowa kuom lwete makelo resruok. (Isa. 33:2) Bende wayudo mor mabiro nikech wang’eyo ni Wuonwa me polo mor gi kinda mwatimo e tije. (1 Pet. 4:13, 14) Kuom mano, kik waluor lando wach maber mar Pinyruoth ka kinde duto wan gi chir ni Jehova riwowa lwedo!