Paro Matut e Yor Lamo Dwarore Ahinya Kuom Jolendo ma Jokinda
1. Ang’o ma nokonyo Yesu mondo kik ogalore owe tich maduong’ ma nokele?
1 Noyudo Yesu oa chango ji kendo golonegi jochiende e odhiambono. Kinyne kane jopuonjrene oyude, ne ginyise kama: “Ji duto dwari,” ka gijiwe mondo odhi nyime gitimo honni. Kata kamano, Yesu ne ok ogalore moweyo tije maduong’ mar lando wach maber. Nodwokogi kama: “Wadhiuru ka moro e mier machiegni, mondo ayal kuro bende; nikech ma e gi ma nokela.” Ang’o ma nokonyo Yesu keto pache duto e tij lendo? Nomondo paro matut e yor lamo. (Mari. 1:32-39) Ere kaka paro matut e yor lamo nyalo konyowa bedo jolendo ma jokinda?
2. Ang’o mwanyalo paroe matut mabiro konyowa siko ka wan jokinda e tij lendo?
2 Paro Matut Kuom Ang’o? Yesu noneno kaka ji ne ‘chandore kendo gike kaka rombe maonge jakwath.’ (Math. 9:36) Kamano bende, wanyalo paro kuom kaka owinjore ahinya ji oyud wach maber. Wanyalo paro matut kuom kinde mwadakieni. (1 Kor. 7:29) Wanyalo paro matut kuom tije mag Jehova kod kite, thuolo maber mar bedo Joneno mag Jehova, kod mwandu mabeyo ma wasepuonjore e Wach Nyasaye ma ji mang’eny e alworawa podi ok ong’eyo.—Zab. 77:11-13; Isa. 43:10-12; Math. 13:52.
3. Wanyalo paro matut e seche mage?
3 Wanyalo Paro Matut Seche Mage? Mana kaka Yesu, jomoko chiewo kogwen seche ma piny pod oling’. Jomoko to yudo ni ber ka giparo matut e seche mag odhiambo kapok gidhi nindo. (Chak. 24:63) Kata ka wadich maromo nade, pod wanyalo yudo kinde mag paro matut. Jomoko to paro matut seche ma gin e mtoka ka gidhi wuoth. Jomoko to tiyo gi thuolo mar gago modiechieng’. Ji mang’eny to yudo ni paro matut kata kuom kinde machuok kapok gichako lendo, konyogi bedo gi kinda kendo lendo gi chir.
4. Ang’o momiyo onego wapar matut?
4 Paro matut e yor lamo biro jiwo gombo ma wan-go e tiyo ne Jehova, biro konyowa neno ni lamo Nyasaye e gima duong’ e ngimawa kendo biro jiwo paro mwaseng’ado mar dhi nyime ka walendo. Yesu ma en Jatich Nyasaye Maduong’, noyudo ber kuom paro matut, kendo wabende wanyalo yudo ber kuom timo kamano.