Luw Ranyisi mar Jonabi—Jona
1. Jona ne nigi kido mage mabeyo?
1 Sama iwinjo kiluongo nying janabi Jona, ang’o mabiro e pachi? Yot mondo jomoko opar ni Jona ne en ng’at ma ngoro kata ma wiye tek. Kata kamano, mano ok adier. Jona ne nigi kido mabeyo kaka bolruok, chir, kod chuny mar chiwruok. Ere kaka wanyalo luwo “ranyisi” mare?—Jak. 5:10.
2. Ere kaka wanyalo luwo ranyisi mar Jona mar bolruok?
2 Bolruok: Kane okwong mi Jona migawo mar dhi Nineve, nobaro mochomo kumachielo. Mano ok onego okawwa gi wuoro ahinya nikech Jo-Assuria nong’ere kaka joma ger, kendo kata dalagi maduong’ ma en Nineve be ne iluongo ni “dala motimo remo.” (Nah. 3:1-3) Kata kamano, bang’ ka Jehova noserieyo Jona, Jona nobolore mi odhi kuma noore. (Nge. 24:32; Jona 3:1-3) Notimo kaka Jehova ne dwaro. (Math. 21:28-31) Mana kaka Jona, wan be onego waland wach maber gi kinda kata kapo ni oriewa kata omiwa alwora ma lendoe ok yot.
3. Be chir kod chiwruok dwarore sama watiyo ne Nyasaye e kindewagi? Ler ane.
3 Chir kod Chuny mar Chiwruok: Kane Jona ofwenyo ni yierone marach ema ne kelo ne jokwang’ yie chandruok, noikore chiwo ngimane mondo kik jogo hinyre. (Jona 1:3, 4, 12) Bang’e, kane en Nineve, nenore ni nowuotho e i dalano nyaka iye-iye komanyo kuonde mowinjore olandie ote ma Jehova nomiye. Ka dine en ngoro, dine ok otimo mago duto. Kuom adier, Jona ne en janabi ma jachir! (Jona 3:3, 4) Be chir ma kamano kod chiwruok dwarore e kindewagi? Ee. Mondo mi walend gi kinda sama ji kwedowa, nyaka wakwa Nyasaye mondo okonywa wabed gi chir. (Tich 4:29, 31) E wi mano, ok wanyal tiyo gi thuolowa kod mwanduwa e tije Nyasaye ka waonge gi chuny mar chiwruok.—Tich 20:24.
4. Ang’o momiyo ber ka wayudo thuolo mar paro matut kuom ranyisi ma jonabi mag Jehova noketo?
4 Sa asaya ma isomo sigand janabi moro mar Jehova, ibiro yudo puonj mathoth ka itemo ketori e chal mar janabino. E seche ma isomono, penjri kama: ‘Dine bed ni an e janabini, dine atimo nang’o? To ere kaka anyalo luwo ranyisi mare?’ (Hib. 6:11, 12) E Tijwa mar Pinyruoth mamoko mabiro, ibiro keti sula mamoko mawuoyo kuom puonj ma wanyalo yudo kuom jonabi mamoko mag Jehova.