Ang’o Momiyo Walendo?
1. En ang’o momiyo walendo?
1 Lando wach maber mar Pinyruodh Nyasaye e tich maduong’ie moloyo ma wanyalo timo e ngimawa e kindegi. Kuom adier, tich achielni miyo wanyiso ni wamako chike ariyo madongo, ma gin hero Jehova to kod hero jowetewa. (Mari. 12:29-31) Hera e gima duong’ ma chwalowa mondo wabed jokinda e tij lendo.—1 Joh. 5:3.
2. Ere kaka tijwa mar lendo nyiso ni wahero Jehova?
2 Hero Jehova: Hera ma waherogo Jehova, ma e Osiepwa maduong’ie moloyo, miyo wanyiso ji adiera kuome. Kuom higini madirom 6,000 kama, Satan osebedo ka wacho miriambo kuom Nyasaye. (2 Kor. 4:3, 4) Mano osemiyo ji obedo gi paro ni Nyasaye wang’o joma richo e mach maok tho, ni Nyasaye en Nyadidek, kendo ni ok odew dhano. Ji mang’eny osekata mana ng’ado ni Nyasaye onge. To mano kaka wagombo puonjogi mondo ging’e adiera e wi Wuonwa me polo! Sama watimo kinda e chiwo neno e wi Nyasaye, wamiyo chunye bedo mamor sidang’ kendo wakonyo e nyiso ayanga ni Satan en jamiriambo.—Nge. 27:11; Hib. 13:15, 16.
3. Ere kaka tijwa mar lendo nyiso ni wahero jowetewa?
3 Hero Jowetewa: Sa asaya ma walendo ne ng’ato, wanyiso ni wahere. Ndalo mag chandruokgi e kinde ma dwarore ni ji owinjie wach maber moloyo kinde moro amora mosekalo. Ji mang’eny chalo gi Jo-Nineve e kinde Jona ma ne ok ‘nyal pogo lwetgi ma korachwich gi lwetgi ma koracham.’ (Jona 4:11) Wach mwalando puonjo ji kaka ginyalo dak e ngima maber kendo mamor. (Isa. 48:17-19) Wach mwalandono miyo ji bedo gi geno. (Rumi 15:4) Nga’to ang’ata mochiko ite ne wachno kendo otimo kaluwore gi gima osewinjo ‘noresi.’—Rumi 10:13, 14.
4. En ang’o ma wi Jehova ok nowilgo ngang’?
4 Mana kaka nyithindo mogeno jonyuolgi nyisogi hera kinde duto to ok mana kadichiel kata atuong’-atuong’, e kaka wan be wanyiso ni wahero Jehova kinde duto, to kod jowetewa bende. Mano emomiyo watiyo gi thuolo moro amora moyudore e chiwo neno, to ok mana kinde ma wachano mar dhi lendo kende. Kendo wabiro dhi nyime lendo maok waweyo. (Tich 5:42) Jehova wiye ok nowil ngang’ gi hera ma wanyiso.—Hib. 6:10.