Luw Ranyisi mar Jonabi—Joel
1. Ere kaka wanyalo luwo ranyisi ma Joel noketonwa mar bolruok sama walendo?
1 Janabi Joel ne en ng’a? Gima owacho kuome en mana ni ne en “wuod Pethuel.” (Joel 1:1) Nikech Joel ne en janabi mobolore, gima duong’ ma nojiwo ne en ote ma Jehova nomiye, to ok tije kaka janabi. Wan bende gima duong’ monego waket e pachwa sama walendo en nyiso ji gima Jehova dwaro kaka oler e Muma, to ok miyore pak wan wawegi. (1 Kor. 9:16; 2 Kor. 3:5) E wi mano, ote ma walando miyowa teko. Gin weche mage ma Joel nokoro manyalo miyo wabed gi geno kod kinda e tij lendo?
2. Bedo ni odiechieng Jehova chiegni onego ojiwwa watim ang’o?
2 ‘Ndalo mar Jehova Chiegni.’ (Joel 1:15): Kata obedo ni wechegi nondiki higni mang’eny mokalo, magi e kinde ma gichopoe e okang’ malach moloyo. Yo ma piny medo bedogo marach kaachiel gi akwede koda ajara ma wayudo e alworawa konyowa neno maler ni giko mar piny marachni osekayo. (2 Tim. 3:1-5; 2 Pet. 3:3, 4) Sama waparo matut kuom wachno, wamedo keto tij lendo obed mokwongo e ngimawa.—2 Pet. 3:11, 12.
3. Kaka masira maduong’ medo sudo machiegni, ang’o momiyo onego walend gi kinda?
3 “Jehova Nobed Kar Buok ni Ogandane.” (Joel 3:16): Ndikoni wacho bende ni piny biro tetni. Mano nyiso okang’ ma Jehova biro kawo mar ng’ado bura e kinde mar masira maduong’. Wan-gi chuny mokuwe nikech wang’eyo ni e kindeno Jehova biro reso jotichne momakore kode. (Fwe. 7:9, 14) Sama walendo gi kinda kendo neno kaka Jehova ritowa kendo tegowa, wamedo bedo gi yie motegno kod sinani ma biro konyowa e kinde masira maduong’.
4. Ang’o momiyo onego warit kinde mabiro ka wan gi chir kod mor?
4 Kata obedo ni jomoko wacho ni bug Joel oting’o mana ote mag midhiero, adiera en ni bugno oting’o bende weche ma miyo jotich Nyasaye geno ni gibiro yudo resruok. (Joel 2:32) Omiyo, warituru kinde mabiro ka wan gi chir kendo wadhiuru nyime lando wach maber mar Pinyruodh Nyasaye gi kinda kendo luwo weche mayudore e Joel 2:23 mawacho ni: “Moruru . . . kendo iluru kuom Jehova Nyasachu.”