Kaka Wanyalo Iko Yore mag Chako Wuoyo gi Ji
1. Ang’o momiyo weche mwachakogo wuoyogo gi ji onego obed moik maber?
1 Mana kaka suya mar chiemo miyo ng’ato siso mar chamo chiemono, e kaka weche ma wakwongo nyiso ng’ato nyalo miye siso mar winjo wach ma waterone mowuok e Ndiko. Tedo chiemo mamit dwaro ikruok maber. Kamano bende, mondo weche ma wachako wuoyogo gi ji okel nyak, nyaka waikgi maber, kata obedo ni wanyalo chako mbaka e yore mopogore opogore. (Nge. 15:28) Iko weche ma wachako wuoyogo gi ji e yo maber oriwo timo ang’o?
2. Ere kaka wanyalo iko weche ma wanyalo chako wuoyogo gi ji e yo maber?
2 Yier Weche Manyalo Mako Pach Ji: Ka weche ma wachako wuoyogo gi ji ok morgi, to ginyalo ng’ado mbaka. Omiyo, sama iikori, par kuom gik manyalo mako pach joma ni e alworau. Dibed ni gigombo bedo gi sirkal maber, bedo gi kuwe e utegi, koso dak maonge lwenje? Kinde mang’eny, ji oheraga chiwo paro; omiyo, ik penjo moro ma biro miyo gichiw pachgi. Donge inyalo tiyo gi paro moro mayudore e Tijwa mar Pinyruoth? Ok rach keto parono e yo mowinjore gi alwarau. Donge unyalo chano mondo utiegruga yore mag chako wuoyo gi ji sama utimo Lamou mar Joot?
3. Ere kaka ng’eyo kido kod timbe joma nie alworawa nyalo konyowa ng’eyo kaka wanyalo chako wuoyo kodgi?
3 Non Kit Ji gi Timbegi: Nitie alwora moko ma ka ilimo ng’ato to igeno ni iwach gima okeli achiel kachiel. Kata kamano, kuonde mamoko to ka wendo ochako achaka wacho gima okele kapok ong’ere gi wuon ot, mano nyalo nyiso ni ok omiyo wuon ot luor. Nitie gwenge moko ma wanyalo tiyoe atiya gi Muma moriere sama wachako wuoyo. (Tich 2:14-17) Kata kamano, kuonde ma ji nie dinde maok oyie gi Muma, kata kuonde ma ji ok ni e din moro amora, nyalo bedo maber ka ichako tiyo gi Muma e limbe maluwo, kar timo kamano e limbeni mokwongo.—Tich 17:22-31.
4. Gin ang’o ma onego wapar sama wayiero weche ma wachako wuoyogo gi ji?
4 Weche Michakogo: Yier wecheni michakogo e yo mariek. Tiyo gi weche machuok mawinjo yot nyalo bedo gi nyak moloyo. Yo ma wachako wuoyogo bende en gima duong’ ahinya. Nyis ilo. Buonj e yo manyiso ni imor gi wuon ot. Tiyo gi paro mochiw kaegi biro miyo weche ma wachako wuoyogo gi ji obed kaka suya mamit, ee, biro yuayo joma ni e alworawa mondo obi ochiem e mesa mar Jehova.—1 Kor. 10:21.