Gik Mwatiyogo e Puonjo Ji Muma
1. Jolendo chalo nade gi funde?
1 Funde jotiyoga gi gik tich mopogore opogore. Nitie gige tich moko minyalo tigo e tich moro makende, to nitie moko ma itiyogo pile. Kinde duto funde molony ok wega ma ok oting’o gige tich ma gitiyogo pile, kendo gilony ahinya e tiyo kodgi. Muma jiwo Jakristo ka Jakristo mondo otim kinda e tij lendo, kendo obed “jatich ma onge gima kuodo wiye.” (2 Tim. 2:15) Gir tich maduong’ie ahinya ma watiyogo en mane? En Wach Nyasaye ma watiyogo e ‘loko ji obed jopuonjre.’ (Mat. 28:19, 20) Kuom mano, onego watim matek mondo wabed molony e ‘tiyo gi wach mar adiera e yo makare.’ Kata kamano, nitie gige tich mamoko mwatiyogo pile e puonjo ji adiera, kendo ma Jokristo duto onego obed molony tiyogo.—Nge. 22:29.
2. Gige tich mwatiyogo ahinya e puonjo ji gin mage?
2 Gik Mwatiyogo Pile e Puonjo Ji: Mopogore gi Muma, gige tich mamoko mwatiyogo gin mage? Gir tich mwatiyogo ahinya e puonjo ji adiera en bug Ang’o ma Muma Puonjo Kuom Adier? Bang’ ka wasetieko puonjore bugno gi japuonjre to wachakoga bug “Ritreuru e Hera mar Nyasaye” mondo okonye tiyo gi puonj mag Muma e ngimane. Omiyo, onego wabed molony e tiyo gi buge ariyogi. Bende, nitie brosua moko ma watiyogo pile. Achiel kuomgi en Wach Maber Mowuok Kuom Nyasaye! ma watiyogo e chako puonjruok mar Muma. Kapo ni walendo e alwora ma ji ok ong’eyo somo maber, kata ma ji wachoe dhok ma bugewa tinie kata onge chuth, wanyalo tiyo gi brosua mar Winj Nyasaye kata Winj Nyasaye Mondo Idag Nyaka Chieng’. Brosua ma watiyogo e konyo jopuonjre mondo ong’e riwruok marwa en Gin Jomage Matimo Dwaro mar Jehova e Kindegi? Bende, wan gi vidio ma nyalo konyowa e loko ji obed jopuonjre, kendo mwanyalo tiyogo e yo molony. Vidiogo gin kaka Ang’o Momiyo Onego Ipuonjri Muma?, Ni Nini Hutendeka Katika Jumba la Ufalme?, kod Je, Mungu Ana Jina?
3. Gocho ma biro mag Tijwa mar Pinyruoth biro konyowa timo ang’o?
3 Gocho ma biro mag Tijwa mar Pinyruoth biro konyowa medo lony marwa e tiyo gi buge ma watiyogago ahinya e puonjo ji adiera. Sama wamedo timo kinda e tiyo gi gige tichgi e yo molony, wabiro nyiso ni waluwo gima Muma wacho niya: “Sik ka inonori iwuon kendo ka inono weche ma ipuonjo. Nan kuom wechegi, nimar kuom timo kamano, iniresri iwuon kendo inires joma winjo weche mipuonjo.”—1 Tim. 4:16.