NGIMAWA KAKA JOKRISTO
Lendo Kod Puonjo, Gin Gik Madwarore Mondo Wakony Ji Obed Jopuonjre
Yesu nochiko jolupne mondo gidhi gilok ji obed jopuonjre. (Mat 28:19) Mae oriwo lendo kod puonjo. Kinde ka kinde onego wapenjre ni, ‘Ere kaka anyalo medo lony e tij lendo kod puonjo?’
LENDO
Kar mondo warit ni ji e ma obi irwa, wan ema nyaka wadhi wamany “jomowinjore.” (Mat 10:11) Sama wan e tij lendo, be watiyo maber gi thuolo ma oneno mondo walend ne ‘joma yudore’? (Tic 17:17) Lidia nobedo japuonjre nikech jaote Paulo ne jakinda e tij lendo.—Tic 16:13-15.
‘Chuo kodhi ma in-go gokinyi, kendo kik igeng’ lueti godhiambo’ (Ekl 11:6)
NEURU VIDIO MA WIYE WACHO NI DHI NYIME LENDO ‘MA OK IWE’—SAMA IN E DIJENI KOD E OT KA OT, KAE TO UDWOK PENJO MALUWOGI:
Ere kaka Samuel nonyiso ni nomanyo thuolo mar pidho kodhi mag adiera ka en e tich?
Ang’o momiyo nyaka wanan sama watiyo gi yore mopogore opogore mag lendo?
Inyalo lando ne jomage wach Pinyruoth sama in e dijeni?
PUONJO
Mondo walok ji obed jopuonjre, onego watim gik mamoko momedore mopogore gi miyogi mana buge. Mondo wakony ji otim dongruok e wach Nyasaye, onego wadog limogi kendo wapuonjre Muma kodgi. (1Ko 3:6-9) To nade kapo ni kinda ma watimo mondo wapuonj ng’ato adiera mag Pinyruoth kelo mana nyak matin? (Mat 13:19-22) Onego wadhi nyime manyo joma chunygi chalo gi “lowo maber.”—Mat 13:23; Tic 13:48.
“An ne apidho, to Apolo ne oolo pi, to Nyasaye ne miyo gidongo” (1Ko 3:6)
NEURU VIDIO MA WIYE WACHO NI DHI NYIME LENDO ‘MA OK IWE’—E LELA KENDO KONY JI OBED JOPUONJRE, KAE TO UDWOK PENJO MALUWOGI:
Ere kaka Solomon gi Mary noolo pi e kodhi mar adiera ma nopidh e chuny Ezekiel gi Abigail?
Dwarowa maduong’ onego obed mane sama walendo ka watiyo gi yore mopogore opogore moriwo nyaka lendo e lela?
Ere kaka wanyalo medo kinda e puonjo jomoko adiera?