Rowere, Dhiuru Nyime Timo Dongruok Bang’ Kosebatisu

1. Gin dongruok mage ma rowere mang’eny osetimo?

HIGA ka higa, ibatisga rowere mang’eny. Be osebatisi? Ka en kamano, oweteni gi nyimineni ma Jokristo mor kodi ahinya kendo Jehova bende mor kodi! (Nge. 27:11) Chop sani, par ane dongruok misetimo. Isebedo kipuonjori Muma, samoro kuom higni moko. Puonjruok misebedo kitimo osekonyi bedo gadier ni Muma en Wach Nyasaye. To moloyo mano, puonjruok mari osekonyi ng’eyo Jehova ma e Jal ma notayo jondik Muma, kendo isehere ahinya. Hera miherogo Jehova osemiyo ichiworine mobatisi kaka achiel kuom jotichne. To mano doko yiero maber misetimo!

2. Ang’o ma wabiro nono e sulani?

² En adier ni kinde ma ne pod itemo matek mondo ichop e batiso, niromo gi gik mopogore opogore ma notemo yieni. Kata kamano, kaka higni medo kalo e kaka ibiro romo gi tembe mamoko ma samoro pok niromogago. Satan biro temo matek mondo hera miherogo Jehova odog chien kendo iwe tiyone. (Efe. 4:14) Kik iyie gima kamano otimre. En ang’o ma nyalo konyi siko kimakori gi Jehova kendo rito singruok ma nitimo kode mar tiyone nyaka chieng’? Nyaka idhi nyime timo dongruok, tiende ni ‘kedo matek’ mondo ibed Jakristo motegno. (Hib. 6:1) Ang’o ma nyalo konyi timo kamano? Mano e penjo ma wabiro nono e sulani.

ANG’O MA NYALO KONYI TIMO DONGRUOK MONDO IBED JAKRISTO MOTEGNO?

3. En ang’o ma Jokristo duto onego otim bang’ kosebatisgi?

³ Bang’ kosebatiswa, waduto dwarore ni watim gima jaote Paulo nonyiso Jokristo wetene ma ne ni Efeso. Nojiwogi ni gidhi nyime timo dongruok mondo gibed Jokristo ‘motegno chuth.’ (Efe. 4:13) E yo machielo, notemo nyisogi ni, ‘Dhiuru nyime timo dongruok.’ Wanyalo winjo tiend gima Paulo ne temo wacho ka wanono yo ma nopimogo timo dongruok mondo wabed Jokristo motegno, gi nyathi ma dongo. Jonyuol morga ahinya sama ginyuolo nyathigi. Kata kamano, nyathino ok bi siko ka tin nyaka chieng’. Bang’ kinde, obiro dongo mobed ng’ama duong’ kendo ‘weyo timbe mag nyathi.’ (1 Kor. 13:11) Mano bende e gima timorega ne Jakristo. Bang’ kosebatiswa, nyaka wadhi nyime timo dongruok. Wane ane gik ma nyalo konyowa timo kamano.

4. En kido mane ma biro konyi dhi nyime timo dongruok mondo ibed Jakristo motegno? Ler ane. (Jo-Filipi 1:9)

⁴ Med hero Jehova. En adier ni ihero Jehova. Kata kamano, pod inyalo timo dongruok mondo imed here. Ang’o ma nyalo konyi timo kamano? Jaote Paulo nyisowa achiel kuom gik monego watim e Jo-Filipi 1:9. (Som.) Paulo nolemo mondo hera ma Jo-Filipi noherogo Jehova “osik ka medore moloyo.” Omiyo, wan bende wanyalo timo dongruok e yo ma waherogo Jehova. Wanyalo timo kamano kuom bedo gi “ng’eyo malong’o kod nyalo mar pogo weche e yo makare.” Kaka wamedo ng’eyo Jehova, e kaka wabiro medo here kendo geno kido ma en-go kod yo motimogo gik moko. Wabiro timo dongruok mi wahere e okang’ ma koro wasin gi gimoro amora ma nyalo chwanye. Bende, wabiro temo matek mondo wang’e dwache kendo timo kaka odwarono.

5-6. Ang’o ma wanyalo timo mondo wamed hero Jehova? Ler ane.

⁵ Wanyalo medo hero Jehova ka wang’eyo Wuode Yesu Kristo e yo maber. To mano en nikech Yesu luwo kit Wuon-gi e okang’ makare chuth. (Hib. 1:3) Yo maber moloyo mar ng’eyo Yesu en nono buge ang’wen mag Injili. Ka pok ibedoga gi chenro mar somo Muma pile ka pile, donge inyalo chako timo kamano? Sama isomo weche ma wuoyo e wi Yesu, tem ane nono kido ma ne en-go. Ne en ng’at ma chopo ire yot kendo nohero nyaka nyithindo matindo. (Mar. 10:13-16) Ne en thuolo gi jopuonjrene kendo ne ginyalo wacho pachgi sama ne gin kode ma ok giluoro gimoro amora. (Mat. 16:22) Yesu noluwo ranyisi mar Wuon-gi e wi wachno. Jehova bende en Nyasaye ma chopo ire yot ahinya. Wanyalo wuoyo kode e lamo, kendo sama walemo, wanyalo nyise gimoro amora manie chunywa ka wan gadier ni ok obi kawowa marach. Oherowa kendo odewowa ahinya.​—1 Pet. 5:7.

⁶ Yesu neno ne ji lit. Jaote Mathayo nondiko kama: “Ka noneno oganda, nokechogi nikech ne isandogi malit, kendo ne gidiwo mana ka rombe ma onge jakwath.” (Mat. 9:36) Jehova to winjoga nade sama wachandore? Yesu nowacho kama: “Ok en gima long’o ne Wuora manie polo mondo kata mana achiel kuom jo matindogi olal.” (Mat. 18:14) Donge ng’eyo mano moro chunywa ahinya? Kaka wamedo ng’eyo Yesu e yo maber, e kaka hera ma waherogo Jehova biro medore.

7. Ere kaka bedo gi Jakristo motegno nyalo konyi?

⁷ Inyalo dhi nyime medo hero Jehova kendo timo dongruok e winjruokni kode ka ibedo machiegni gi Jokristo motegno manie kanyaklau. Donge iseneno kaka gimorga? Ok giywagga ang’e nikech ne giyiero tiyo ne Jehova. Penjgi mondo ginyisi weche ma giseromogo e tij Jehova. Sama dwarore ni itim yiero moro maduong’, wuo kodgi mondo ging’adni rieko ma nyalo konyi timo yiero maber. Par ni “weche dhi maber ka nitie jong’ad rieko mang’eny.”​—Nge. 11:14.

8. Ang’o minyalo timo ka po ni in gi kiawa e wi puonj moko mag Muma?

⁸ Lo kiawa ma in-go. Kaka ne wasewacho e paragraf mar 2, Satan biro temo chochi mondo kik idhi nyime timo dongruok e winjruokni gi Jehova. Achiel kuom yore monyalo timogo kamano en miyo ibed gi kiawa kuom puonj moko mag Muma. Kuom ranyisi, inyalo romo gi joma wacho ni gik moko nosieko kendgi ma ok ochuegi. Samoro mano puonj ma pok nobiroga e pachi nyaka nene. Kata kamano, nikech koro ichako bedo ng’ama duong’, ibiro winjo kipuonjo wachno e skul. Gik mipuonji e skul e wi wachno nyalo nenore ka gima gin adier. Kata kamano, nyalo bedo ni joma puonjo wechego pok nonono gik ma nyiso ni nitie Jachuech. Par ane puonj ma wayudo e Ngeche 18:17. Ndikono wacho kama: ‘Ng’at mokwongo kelo wach nenore makare, nyaka ng’at machielo obi ma non wechene.’ Kar yie ayiea gi weche mipuonjo e skul, ber nono puonj ma yudore e Muma ma en Wach Nyasaye. Tim nonro e bugewa ma lero Muma. Wuo gi owete gi nyimine ma chon ne paro ni gik moko nosieko kendgi. Penjgi gimomiyo ne gibedo gadier ni nitie Jachuech moherowa. Mbaka ma chalo kamano nyalo konyi mondo iket pachi kuom weche madier.

9. Ang’o mipuonjori kuom Melissa?

⁹ Nyaminwa moro miluongo ni Melissa noyudo ber mathoth kuom timo nonro e wi tich.b Owacho kama: “E skul, ipuonjowaga ni gik moko nosieko kendgi, kendo sama ipuonjo wachno, chaloga mana ka gima en puonj madier. Mokwongo okwongo, ne ok adwar timo nonro nikech naneno ni ka atimo kamano to ne dhi miyo achak yie ni gik moko nosieko kendgi adier. Kata kamano, nawacho e chunya ni Jehova to dwaro ni kik walame alama ma ok wang’eyo gimomiyo walame. Omiyo, nachako timo nonro e wi wachno. Nasomo buk miluongo ni Je, Kuna Muumba Anayekujali? Bende, nasomo brosua mar Uhai​—Ulitokana na Muumba? kod Penjo Abich e Wi Kaka Ngima Nochakore. Bugego nokonya ahinya. Nawacho e chunya ni, ‘Di ne ang’e, di ne achako chon.’”

10-11. Ang’o ma nyalo konyi kwedo timbe maricho? (1 Jo-Thesalonika 4:3, 4)

¹⁰ Kwed timbe maricho. E higni ma rawera koro chako bedo ng’ama duong’, gombo mag nindruok medorega ahinya, kendo yot donjo e timbe mag terruok. To mano e gima Satan dwaro. Ang’o ma nyalo konyi siko ka in gi timbe mabeyo? (Som 1 Jo-Thesalonika 4:3, 4.) Sama iwuoyo gi Jehova e lamo, nyise kaka iwinjo e chunyi, kendo kwaye mondo omiyi teko mar timo gik makare. (Mat. 6:13) Par ni Jehova dwaro konyi, to ok ng’adoni bura. (Zab. 103:13, 14) Bende, somo Wach Nyasaye nyalo konyi. Melissa ma ne wasewuoyo kuome motelo notimo kinda mondo okwed paro maricho. Owacho kama: “Somo Muma pile nokonya ahinya mondo kik aol gi timo gik mabeyo. Timo kamano noparona ni an ng’at Jehova kendo ni en e ma dwarore ni ota ngimana.”​—Zab. 119:9.

¹¹ Kik item loyo tembe kendi. Wuo gi jonyuolni e wi gik ma chandi. Ok yotga ahinya wuoyo e wi weche kaka mago, kata kamano, ber timo kamano. Melissa wacho kama: “Nalemoga ka akwayo Jehova mondo omiya chir, kae to nawuoyo gi wuonwa e wi weche ma ne chanda. Bang’ mano, nawinjoga ka koro chunya oyueyo. Nang’eyo ni Jehova ne morga koda ahinya.”

12. Ang’o ma nyalo konyi timo yiero mabeyo?

¹² Luw puonj mag Muma. Mosmos, ibiro chako timo yiero iwuon. Kata kamano, ng’e ni nitie gik mang’eny ma pod ikia. Ang’o ma biro konyi mondo itim yiero ma ok bi ketho osiep manie kindi gi Jehova? (Nge. 22:3) Nyaminwa moro ma nyinge Kari lero gima nokonye timo yiero makare. Nofwenyo ni ok ochuno ni Jokristo motegno obed gi chike ma tayogi e weche duto. Owacho kama: “Ne dwarore ni ang’e puonj mag Muma ma ne nyalo taya, kar makora amaka gi chike.” Sama isomo Muma, penjri kama: ‘Ang’o ma wach ma asomoni puonja e wi yo ma Jehova nenogo gik moko? Be nitie puonj moro amora e weche ma asomogi ma anyalo tiyogo e ngimana? Ka en kamano, en ber mane ma anyalo yudo ka atiyo gi puonjno?’ (Zab. 19:7; Isa. 48:17, 18) Ka isomo Muma kendo paro matut kuom puonj manie iye, biro bedoni mayot timo yiero ma moro Jehova. Kaka imedo timo dongruok, e kaka ibiro fwenyo ni ok ochuno ni ibed gi chike ma tayi e weche duto, nikech ibiro ng’eyo paro ma Jehova nigo e wi gik moko.

13. Mako osiep gi joma ohero Jehova nyalo konyi nade? (Ngeche 13:20)

¹³ Mak osiep gi joma ohero Jehova. Mana kaka waseneno motelo, kimako osiep gi joma ohero Jehova, ibiro bedo Jakristo motegno. (Som Ngeche 13:20.) Nyaminwa moro ma nyinge Sara nochako lalo mor ma ne en-go. Kae to gimoro notimore ma nokonye chako bedo mamor kendo. Owacho kama: “Nachako bedo gi osiepe mabeyo. Ne watimoga puonjruok mar Ohinga mar Jarito juma ka juma gi nyaminwa moro ma rawera. Osiepna moro machielo nokonya ng’eyo kaka nanyalo chiwo paro e chokruok. Osiepenago nomiyo achako kawo puonjruok mara kod lamo e yo mapek. Nachako bedo gi winjruok maber gi Jehova, to mano nomiyo abedo mamor kendo.”

14. Ang’o ma nokonyo Julien bedo gi osiepe mabeyo?

¹⁴ Ang’o ma nyalo konyi yudo osiepe ma biro miyo ibed gi timbe mabeyo? Owadwa Julien ma sani en jaduong’-kanyakla wacho kama: “Ka ne an rawera, namakoga osiep gi joma nadhigago lendo. Osiepenago ne gin jokinda, kendo ne gikonya fwenyo kaka nanyalo yudo mor e tij lendo. Nachako bedo gi chenro mar tiyo ne Nyasaye kuom thuolona duto. Bende, nafwenyo ni nitie gik mang’eny ma ne baya nikech najamako osiep mana gi mbesena lilo. Bang’e, nabedo nyaka gi osiepe ma ne tiyo Bethel. Ranyisi margi nokonya yiero yore mabeyo mag manyo mor, to mano nokonya medo sudo machiegni gi Jehova.”

15. Paulo nonyiso Timotheo ni otang’ gi osiepe ma chal nade? (2 Timotheo 2:20-22)

¹⁵ To nade kifwenyo ni nitie ng’ato e kanyaklau ma ok en osiep maber? E kanyakla mar Jokristo mokwongo, Paulo nong’eyo ni ne nitie Jokristo moko ma winjruokgi gi Nyasaye ne ok ber, omiyo, nonyiso Timotheo ni otang’ kodgi. (Som 2 Timotheo 2:20-22.) Wageno ahinya osiep manie kindwa gi Jehova. Ok onego wayie mondo ng’ato ang’ata oketh winjruok ma wasebedo ka watiyo matek mondo wabedgo gi Wuonwa manie polo.​—Zab. 26:4.

ERE KAKA BEDO GI CHENRO MOTUDORE GI TIJE NYASAYE NYALO KONYI TIMO DONGRUOK?

16. Gin chenro kaka mage minyalo bedogo?

¹⁶ Ket chenro ma nyalo konyi. Ket chenro ma nyalo tego yieni kendo konyi bedo Jakristo motegno. (Efe. 3:16) Kuom ranyisi, inyalo keto chenro mar timo puonjruok ma mari iwuon kod somo Muma pile. (Zab. 1:2, 3) Kata, inyalo medo kinda e lemo pile, kendo timo kamano koa e chunyi. Samoro nyalo dwarore ni imed bedo gi ritruok e yoreni mag manyo mor kod kaka itiyo gi thuoloni. (Efe. 5:15, 16) Ka Jehova oneni kitimo kinda mondo itim dongruok, obiro mor kodi ahinya.

17. Ere kaka konyo jomamoko nyalo konyi?

¹⁷ Konyo jomamoko bende biro konyi timo dongruok mondo ibed Jakristo motegno. Yesu nowacho niya: “Chiwo kelo mor mang’eny moloyo kawo.” (Tich 20:35) Ibiro yudo ber mang’eny kitiyo gi thuoloni kod tekoni e konyo jomamoko. Kuom ranyisi, inyalo keto chenro mar konyo jo kanyaklau ma hikgi oniang’ kod ma tuore. Inyalo konyogi e tije kaka dhinegi e chiro, kata inyalo konyogi ng’eyo tiyo gi simbegi ma nyasani kod tabledegi. Ka po ni in owadwa, inyalo keto chenro mar bedo jakony-tich mondo imed konyo owete gi nyimine. (Fil. 2:4) Bende, inyalo nyiso ni ihero dhano weteni kuom landonegi wach maber mar Pinyruoth. (Mat. 9:36, 37) To ka po ni nyalore, ket chenro mar tiyo ne Jehova kuom thuoloni duto.

18. Ere kaka tiyo ne Nyasaye kuom thuoloni duto nyalo konyi timo dongruok?

¹⁸ Tiyo ne Nyasaye kuom thuoloni duto nyalo yawoni yore mopogore opogore mag timo dongruok. Kuom ranyisi, kibedo painia, inyalo yudo thuolo mar dhi e Skul mar Joland-Injili mar Pinyruoth. Bende, inyalo gweli mondo iti e Bethel kata konyo e gero utewa mag lamo. Nyaminwa Kaitlyn ma en painia ma rawera wacho kama: “Lendo kanyachiel gi owete gi nyimine molony nokonya ahinya timo dongruok bang’ ka nosebatisa. Ranyisi margi nomiyo amedo kinda e timo puonjruok mara mar Muma, kendo namedo lony e puonjo.”

19. Gin gueth mage mibiro yudo kaka imedo timo dongruok?

¹⁹ Kaka imedo timo dongruok e weche Nyasaye, e kaka ibiro medo yudo gueth mang’eny. Ok ibi ketho tekoni e luwo gik ma ok bi konyi. (1 Joh. 2:17) Ok ibi yudo lit mang’eny ma ji bedogago bang’ timo yiero maricho. Kar mano, weche biro dhini maber kendo ibiro bedo gi mor madier. (Nge. 16:3) Ranyisi maber miketo biro jiwo Jokristo weteni duto, bed ni gin rowere kata hikgi ng’eny. (1 Tim. 4:12) To maduong’ie moloyo, ibiro bedo gi chuny mokue, kendo ibiro yudo mor madier, ma gin gueth ma ng’ato yudoga sama omoro Jehova kendo en gi winjruok machiegni kode.​—Nge. 23:15, 16.