Ang’o ma Muma Wacho e Wi Dak Kanyachiel ka Pok Ukendoru?

Dwoko ma Muma chiwo

Muma wacho ni Nyasaye dwaro ni ‘wawere gi terruok.’ (1 Jo-Thesalonika 4:3) Wach motigo e Muma ni “terruok” oriwo chode, nindruok e kind chwo gi chwo kata e kind mon gi mon, kod nindruok e kind joma ok okendore.

• Ang’o momiyo Nyasaye dwaro ni dichwo gi dhako okendre ka pok gidak kanyachiel?

• To nade dak kanyachiel ka pok ukendoru kutemo neno ka be unyalo dak adier?

• Ere kaka joma okendore nyalo tego kend margi?

Ang’o momiyo Nyasaye dwaro ni dichwo gi dhako okendre ka pok gidak kanyachiel?

• Nyasaye e ma nochako chenro mar kend. Ne ochako ngima mar kend ka ne oriwo dichwo gi dhako mokwongo. (Chakruok 2:22-24) Ne ok odwar ni dichwo gi dhako odag kanyachiel ka ok gikendore.

• Nyasaye ong’eyo gima ber ne dhano. Ne odwaro ni kend obed gima siko kama dichwo gi dhako mokendore konyo kendo rito joot duto. Ne ane ranyisini. Mana kaka kambi nyalo loso buk moro matin manyiso kaka onego oti gi gimoro, e kaka Nyasaye bende nyisowa gik ma wanyalo timo mondo kend odhi maber. Joma luwo chike mag Nyasaye yudo ber kinde duto.​—Isaya 48:17, 18.

  

• Nindruok gi ng’at ma ok ikendorigo nyalo kelo hinyruok mathoth. Kuom ranyisi, onyalo miyo ng’ato oyud ich ma ok ochan, tuoche, kata chuny monyosore.a

• Nyasaye ne omiyo dichwo gi dhako nyalo mar nyuol kokalo kuom nindruok. Nyasaye neno ngima kaka gima duong’ kendo nyalo mar nyuol en mich makende. Nyasaye dwaro ni wanyis ni wageno michno ka wachiwo luor ne chenro moketo mar kend.​—Jo-Hibrania 13:4.

To nade dak kanyachiel ka pok ukendoru kutemo neno ka be unyalo dak adier?

Mondo kend odhi maber, ok ochuno ni ng’ato “otem” dak gi nyawadgi mondi e ka gine ka be ginyalo dak adier. Kar mano, kend dhi maber mana ka dichwo gi dhako mokendore oketo chunygi duto e kendgi kendo ka giduto gitemo mondo gitiek chandruok manyalo betie e kend margino.b Dak kanyachiel mana kusekendoru tego kend.​—Mathayo 19:6.

Ere kaka joma okendore nyalo tego kend margi?

Onge kend ma onge chandruok. Kata kamano, dichwo gi dhako nyalo bedo gi kend maber mana ka giluwo puonj manie Muma. Magi e moko kuom puonjgo:

• Ket dwach jaodi obed motelo ne magi.​—1 Jo-Korintho 7:3-5; Jo-Filipi 2:3, 4.

• Herreuru kendo umiru luor.​—Jo-Efeso 5:25, 33.

• Puonjri kaka inyalo rito lewi.​—Ngeche 12:18.

• Hori kendo iikri ng’wono ne nyawadu mapiyo.​—Jo-Kolosai 3:13, 14.