Be Onego Akwa Ng’wono?

Ang’o ma di ne itimo ka po ni iyudori e chal moket kae gi?

1. Japuonj odhawoni nikech gima ne itimo e klas.

   Be onego ikwaye ng’wono​—kata ka iparo ni odwa dhawoni mokalo tong’?

2. Osiepni moro ofwenyo ni ne iwuoyo kuome marach.

   Be onego ikwa osiepnino ng’wono​—kata ka gima ne iwacho kuomeno en adier?

3. Iyi owang’ sama iwuoyo gi wuonu kae to idwoke marach.

   Be onego ikwa wuonu ng’wono​—kata ka ineno ni ne ochwanyi?

Dwoko makare ne penjo adekgo duto en ‘Ee.’ Kata kamano, ang’o momiyo ber wacho ni, “Ago mos,” kata ka ineno in e ma ochwanyi.

• Ang’o momiyo ber kwayo ng’wono?

• Yo maber mar kwayo ng’wono

• Gik ma mbeseni wacho

Ang’o momiyo ber kwayo ng’wono?

• Kwayo ng’wono nyiso ni ng’ato pache long’o. Sama iyie ni ne itimo kata wacho gimoro marach, mano nyiso ni itemo matek mondo ibed gi kido ma biro konyi ka ibedo ng’at maduong’.

  “Bolruok kod horruok nyalo konyowa kwayo ng’wono kendo chiko itwa ne gima nyawadwa dwaro wachonwa.”​—Rachel.

• Kwayo ng’wono kelo kue. Sama ng’ato wacho ni “Ago mos,” mano nyiso ni dwache maduong’ en loso kue to ok nyiso ni en kare to ng’a machielo jaketho.

  “Kata ka po ni ineno ni ok in jaketho, pod tim kinda mondo ilos kue. Wacho ne nyawadu ma ichwanyo ni ‘Ago mos’ ok bi mayi gimoro, kendo timo kamano nyalo miyo winjruokni gi osiepnino odhi nyime.”​—Miriam.

• Kwayo ng’wono miyo ng’ato winjo maber. Siko ka waywago ang’e nikech ne wachwanyo ng’ato gi wechewa kata timbewa, en osigo mapek ma nyalo turowa. Kata kamano, bang’ kwayo ng’wono, chalo ka gima osigo mapek ogol e gokwa.a

  “Nitie seche moko ma ne awuoyo marach ne minwa kata wuonwa. Nawinjo marach, kendo ne tekna kwayo ng’wono. Kata kamano, ka ne akwayo ng’wono, ne awinjo maber nikech ne adwoko kue e ot.”​—Nia.

  

Be kwayo ng’wono en gima tek? Ee! Nyako moro miluongo ni Dena, ma osekwayo min-gi ng’wono nyadinwoya nikech nodwoke marach wacho kama: “Ok yot wacho ni, ‘Ago mos.’ Chal mana ka gima gimoro deyo dwondi ma kata weche ok nyal wuok e dhogi!”

Yo maber mar kwayo ng’wono

• Ka nyalore, to dhi iwuon ikwa ng’wono wang’ gi wang’. Kwayo ng’wono wang’ gi wang’ miyo ng’at machielo thuolo mar neno ni kuom adier idwaro kue. Oro ote machuok kikwayo ng’wono ok ber ahinya kopim gi dhi wang’ gi wang’. Kata ka ioro ote machuok miketo nyaka alama mar emoji mar ng’at mokuyo, mano pod chal ka gima ng’wono mikwayo ok wuog e chunyi.

  Tim kama: Ka ok nyalreni kwayo ng’wono wang’ gi wang’, inyalo temo goyo simo kata ndiko kad. Bed ni iyiero tiyo gi yo mane, yier wecheni maber.

  Puonj ma Muma chiwo: “Chuny ng’at makare paro matut ka pok odwoko wach.”​—Ngeche 15:28.

• Kwa ng’wono ma ok odeko. Ka obudho ka pok uloso wach e kindu, biro nenore ka gima mano ne en ketho maduong’, kendo winjruok mari gi ng’at ma ichwanyono biro medo bedo marach.

  Tim kama: Chan gima idwaro chopo​—kuom ranyisi inyalo ng’ado kama: ‘Abiro kwayo ng’wono kawuono.’ Yier kinde mowinjore gi kwayo ng’wono, kae to itim mana kaka ne ichano.

  Puonj ma Muma chiwo: “Los weche piyo.”​—Mathayo 5:25.

• Kwa ng’wono gadier. Wacho ne ng’ato ni, “Ago mos ni nineno marach” ok en kwayo ng’wono! Nyako moro ma nyinge Janelle wacho niya, “Ng’at ma ne ichwanyo biro miyi luor ka oneno ka iyie gi ketho duto ma ne itimo.”

  Tim kama: Kwa ng’wono e yo man thuolo. Kik iwach ni, “Abiro goyoni mos ne gima ne atimo mana ka in be igoyona mos ne gima nitimona.”

  Puonj ma Muma chiwo: “Waluwuru gik ma loso kuwe.”​—Jo-Rumi 14:19.