Be Nitie Kinde ma Chandruoge mag Yuto Norum?
E pinje mopogore opogore, thoth ji ng’anyoga nikech gineno ni ibuonogi kodok korka weche mag yuto. Chandruok ma kamano nomedore ka ne tuo mar korona omako piny momiyo ji obedo mana e udi. Ji ne ok nyal yudo gik moromo, kae to bende weche mag thieth nonyiso kaka nitie pogruok maduong’ e kind joma omewo gi joma odhier.
Be chieng’ moro chandruoge mag yuto ma waneno sanigi norum? Ee, en kamano. Muma lero gima Nyasaye biro timo mondo otiek chandruoge ma waromogo sani.
Chandruoge motudore gi weche mag yuto ma Nyasaye biro tieko
Chandruok: Dhano pok otimo gimoro amora ma nyalo tieko chandruoge ma ji nigo.
Kaka Nyasaye biro tieko chandruogno: Nyasaye biro golo sirkende duto mag dhano, kae to obiro chungo sirkande miluongo ni Pinyruodh Nyasaye. Ibiro chunge e polo kendo obiro locho e wi piny.—Daniel 2:44; Mathayo 6:10.
Ber ma biro bedoe: Nikech Pinyruodh Nyasaye biro locho e wi piny duto, obiro tayo ji e yo makare chuth. Onge ng’ato ang’ata ma nobed jachan kata ma biro bedo gi rem mar pesa. (Zaburi 9:7-9, 18) Kar mano, gibiro bedo mamor gi tich lwetegi kendo gibiro dak maber gi joodgi ka gin gi mor. Ndiko singonwa kama: “Gibiro gero ute kendo ginidagie, gibiro pidho puothe mzabibu kendo chamo olembegi. Ok giniger ute mondo jomamoko e modagie, kendo ok ginipur mondo jomoko nono e mocham.”—Isaya 65:21, 22.
Chandruok: Dhano ok nyal geng’o gik maricho kod masiche mamiyo gidong’ ka gidhier kata mamiyo ok ginyal yudo gik mochuno e ngima.
Kaka Nyasaye biro tieko chandruogno: Nyasaye biro tiyo gi Pinyruodhe mondo ogol gik mamiyo ji luoro kata mamiyo gidak ka gionge arita maber.
Ber ma biro bedoe: E bwo Pinyruodh Nyasaye, jo mahundu ma nyalo monjo ji kata ma nyalo mayogi mwandugi ok nochak obedie. Lwenje, nok mar chiemo, kod tuoche ma landore gin gik ma ok nochak opar kendo. (Zaburi 46:9; 72:16; Isaya 33:24) Nyasaye wacho kama: “Joga nodag e piny mokuwe, kendo ginidag gi mor ma onge koko.”—Isaya 32:18.
Chandruok: Ji mang’eny wuondo jowetegi nikech ich-lach kod timbe mag guondo.
Kaka Nyasaye biro tieko chandruogno: Joma biro bedo e bwo Pinyruodh Nyasaye biro hero jowetegi kendo ok gibi dwaro gik ma konyogi mana giwegi.—Mathayo 22:37-39.
Ber ma biro bedoe: E Pinyruodh Nyasaye, ji biro luwo ranyisi mar Nyasaye kuom hero jowetegi kendo ‘ok ginimany mana gik ma kelonegi ber giwegi.’ (1 Jo-Korintho 13:4, 5) Muma wacho kama: “Ok ginikel hinyruok moro amora kata ketho goda maler, nimar ng’eyo mar Jehovaa nopong’ piny duto mana kaka pige pong’o nam.”—Isaya 11:9.
Muma nyiso ni wadak e ndalo mag giko mar piny marachni, kendo machiegnini, Nyasaye biro chopo singone mar tieko chandruoge mag pesa kod mag yuto.b (Zaburi 12:5) Gie sani, puonj mag Muma nyalo konyi nyagori gi chandruoge miromogo nikech pek mag yuto. Kuom ranyisi, inyalo somo sula ma wacho ni “Jinsi ya Kuishi Ukiwa na Pesa Kidogo” kod “Maoni Yenye Usawaziko Kuhusu Pesa.”
a Muma wacho ni Jehova en nying Nyasaye.—Zaburi 83:18.
b Mondo ing’e gimomiyo inyalo geno Muma, som sula ma wacho ni “Muma e Buk Migeno ma Wanyalo Yudoe Adiera.”