Be Opira mar World Cup Nyalo Riwo Ji Gadier?—Ang’o ma Muma Wacho?

Ji ma kwan-gi dirom billion abich kama biro neno tuke mag FIFA World Cup ma biro chakore Novemba 20 nyaka Desemba 18, 2022. Thoth ji paroga ni tuke kaka mago nyalo chopo weche moko mabeyo moloyo mana kelo ji kanyachiel mondo gine opira.

• “Tuke nigi teko mar kelo lokruok e piny. Gin gi teko mar miyo ji geno. Gin gi teko mar riwo ji kanyachiel e yo makende ahinya.”​—Nelson Mandela, president machon mar South Africa.

• “Opira mar adhula . . . riwoga ji kanyachiel gadier, nikech omiyoga ji winjo ka gin gi geno, mor, kendo en thuolo ma jaber ma nyiso kaka dhano ohero jowetegi nikech giduto gin gi paro achiel kod dwaro achiel.”​—Gianni Infantino, president mar FIFA.a

Be kuom adier, opira mar World Cup, kata tugo moro amora nyalo chopo weche mowachgo? Be nitie geno moro amora ni chieng’ moro dhano biro bedo gi kuwe kod winjruok maber e kindgi?

Be onyalo riwo ji kuom adier?

World Cup ma higani osemiyo ji oparo weche mamoko moloyo mana opich adhula. Osekelo ywaruok e weche mag siasa kod weche mamoko motudore gi ratiro mag dhano, buono ji, kaachiel gi pogruok mantie e weche mag yuto.

To pod nitie ji mathoth ma wachoga ni tuke moriwo pinje mang’eny kaka World Cup keloga ne ji mor. Bed ni ji nigi paro mane e wi tuke kaka mago, adier en ni tukego ok nyal riwo ji kanyachiel gadier. Kar mano, kinde mang’eny ginyisoga paro kod timbe mag ji ma Muma nokoro ni ne dhi bedo maricho e “ndalo mag giko.”​—2 Timotheo 3:1-5.

Gima biro riwo ji gadier

Muma nyiso gima biro riwo ji duto e piny ngima. Osingo ni ji duto e piny biro dak e bwo sirkal mar polo, ma en “Pinyruodh Nyasaye.”​—Luka 4:43; Mathayo 6:10.

Ruodh Pinyruodhno ma en Yesu Kristo biro neno ni kuwe obedo e piny ngima. Muma wacho kama:

• “Jo makare biro dhi maber, kendo kuwe biro bedo mogundho.”​—Zaburi 72:7.

• “Obiro reso jachan ma ywakne . . . Obiro golonegi gik ma diyogi kaachiel gi timbe mahundu.”​—Zaburi 72:12, 14.

Kata mana e kindegi, puonj mag Yesu osemiyo ji ma wuok e pinje 239 obedo e riwruok madier. Gisepuonjore ma giweyo sigu. Mondo iyud weche momedore, som sula mopogore opogore manie gaset ma wiye wacho ni “Ang’o Minyalo Timo Mondo Kik Ibed gi Sigu gi Ng’ato Ang’ata?”