Gimomiyo Wanyalo Bedo gi Geno e Higa mar 2023—Ang’o ma Muma Wacho?

Sama wachako higa mar 2023, waduto wageno ni weche biro dhinwa maber kaachiel gi joutewa. Ang’o momiyo wanyalo bedo gi geno ma kamano?

Muma miyowa geno

Muma nyisowa wach maber ni chandruoge ma waromogo gin mana mag kinde machuok, kendo ni machiegnini ibiro tiekgi chuth. Kuom adier, weche manie Muma ‘ne ondik mondo opuonjwa, mondo kokalo kuom hoch moa e Ndiko, wabed gi geno.’​—Jo-Rumi 15:4.

• Mondo ing’e gik ma Nyasaye osingonwa e Muma, som sula ma wiye wacho ni, “Tumaini Bora la Wakati Ujao.”

Geno ma nyalo konyi sani

Geno ma Muma miyowa inyalo pim gi “nanga mar meli mosiro ngimawa.” (Jo-Hibrania 6:19) Genono nyalo konyowa ahinya. Onyalo konyowa nyagore gi chandruoge ma waromogo, bedo gi paro mowinjore, kendo yudo mor mosiko. Kuom ranyisi:

• Ne ane kaka geno manie Muma nokonyo ng’at moro ma ne nyagore gi tim moro marach ma nosedonjo e rembe. Ne vidio ma wiye wacho ni, Najok gi Kit Ngimana.

• Ne ane kaka geno manie Muma nyalo konyowa sama watwa kata osiepwa moro otho. Ne vidio ma wiye wacho ni, Hoch ne Joma Wedegi Kata Osiepegi Otho.

Teg geno mari

Ji mang’eny geno ni gik mabeyo biro timore e ngimagi, kata kamano, ok gin gadier ka be genogino biro chopo. Gik ma Muma osingo to biro chopo gadier. Ang’o momiyo? En nikech singo manie Muma owuok kuom Jehova,a ma en Nyasaye “ma ok nyal riambo.” (Tito 1:2) Jehova kende e ma nigi teko mar chopo singoge duto; onyalo timo “gimoro amora mohero.”​—Zaburi 135:5, 6.

Wagombo ahinya ni iyud ber kuom geno ma Muma chiwo. Inyalo tego geno mari kuom ‘nono Ndiko adimba.’ (Tich Joote 17:11) Mondo ing’e kaka inyalo timo mano, tem ane chenrowa mar puonjruok mar Muma ma onge chudo. Bed gi geno sama ichako higa mar 2023!