Lweny Biro Rumo Karang’o?—Gima Muma Wacho

Bang’ ka Jo-Iran nomonjo piny Israel Ngeso, April 13, 2024, António Guterres, jagoro maduong’ mar Riwruok mar Pinje nowacho niya: “Ma e kinde mar duoko chien ywaruok kod lweny. Ma e kinde mar nyiso kido mar ritruok e okang’ ma malo.”

Lweny ma dhi nyime sani e pinje mag Middle East nyiso gima timore e piny mangima.

“Nyaka ne Lweny mar Ariyo mar Piny Ngima timre, sani lwenje osemedore ahinya kendo mano kelo chandruok ne ji bilion 2 ma en akwota mar kwan mar ji duto e piny.”​—United Nations Security Council, Januar 26, 2023.

Kuonde ma lwenje nitie oriwo pinje kaka Israel, Gaza, Siria, Azerbaijan, Ukraine, Sudan, Ethiopia, Niger, Myanmar, kod Haiti.a

Lweny biro rumo karang’o? Be jotelo mag piny nyalo kelo kuwe? Ang’o ma Muma wacho?

Piny mopong’ gi lweny

Ywaruoge ma nitie e kindewagi nyiso ni lwenje duto chiegni rumo. Lwenjegi chopo weche ma nokor e Muma e wi kinde ma wadakiegi. Muma luongo kindegi ni “giko mar ndalo.”​—Mathayo 24:3.

• “Unuwinj wach lwenje kod humb lwenje. . . . Oganda noked gi oganda kendo pinyruoth noked gi pinyruoth.”​—Mathayo 24:6, 7.

Som sula ma wiye wacho ni “Ni Nini Ishara ya ‘Siku za Mwisho’?” mondo ine kaka lwenje ma timore sani chopo gima Muma nokoro.

Lweny ma biro tieko lwenje duto

Muma nokoro ni lwenje biro rumo. Mano biro timore e yo mane? Ok obi timore nikech kinda mar dhano, to obiro timore kokalo kuom lweny mar Har–Magedon, ma en “lweny mar odiechieng’ maduong’ mar Nyasaye Manyalo Duto.” (Fweny 16:14, 16) Bang’ lwenyni, Nyasaye biro chopo singo mare mar miyo dhano duto odag gi kuwe nyaka chieng’.​—Zaburi 37:10, 11, 29.

Mondo iyud weche momedore e wi lweny mar Nyasaye ma biro tieko lwenje duto, som sula ma wiye wacho ni “Har–Magedon En Ang’o?”