Zaburi 46:10—“Ling’uru, Kendo Ng’euru ni An e Nyasaye”

“Bed mos kendo ng’e ni an e Nyasaye. Ogendni biro miya duong’; piny duto biro miya duong’.”​—Zaburi 46:10, Loko mar Piny Manyien.

“Ling’uru, kendo ng’euru ni an e Nyasaye: Anayudi duong’ ma malo e kind ogendini, Anayudi duong’ ma malo e piny.”​—Zaburi 46:10, The Bible in Luo 1968.

Tiend Ndiko mar Zaburi 46:10

Nyasaye jiwo ji duto mondo olame kendo giriw lwedo ratiro ma en-go mar locho e wi piny. Ji duto ma dwaro dak nyaka chieng’ nyaka yie ni en gi teko mar locho.​—Fweny 4:11.

“Bed mos kendo ng’e ni an e Nyasaye.” Loko moko mag Muma keto weche mokwongo mag ndikono ni “ling’uru.” Mano osemiyo ji mang’eny obedo gi paro ma ok owinjore ni mano en chik ma dwaro ni ji okuwe mos kata oling’ e kanisa. Kata kamano, e dho Hibrania, wach molok ni “bed mos kendo ng’e ni an e Nyasaye,” en wach ma Jehovaa Nyasaye jiwogo ji duto. Okwayo ji mowuok e ogendni duto ni giwe kwede kendo ging’e ni en kende e ma owinjore olame.

Weche machal gi mago bende yudore e Zaburi 2. E ndikono, Jehova wacho ni obiro kawo okang’ ne joma kwede. To komachielo, joma riwo lwedo lochne ogeno kuome mondo otagi, kendo omigi teko kod rieko. Gimor kendo giwinjo ka gin gi arita maber nikech ‘gimanyo kar buok ire,’ to ahinya-ahinya e kinde mag chandruok.​—Zaburi 2:9-12.

“Ogendni biro miya duong’; piny duto biro miya duong’.” E kinde mokalo, ne omi Jehova duong’ ka ne otiyo gi tekone e rito joge. (Wuok 15:1-3) E kinde ma biro, ibiro miye duong’ e okang’ malach moloyo sama ji duto manie piny biro bolore ne lochne kendo lame.​—Zaburi 86:9, 10; Isaya 2:11.

Weche Molworo Ndiko mar Zaburi 46:10

Buk moro wacho ni Zaburi 46 “en wer ma pako Nyasaye nikech tekone kod nyalo ma en-go mar rito joge.” Ka ne jotich Nyasaye wero Zaburi 46, ne ginyiso ni gigeno ni Jehova ne dhi ritogi kendo konyogi. (Zaburi 46:1, 2) Wechego ne paronegi ni Jehova ne ni kodgi kinde duto.​—Zaburi 46:7, 11.

Mondo gimed geno teko mar Jehova mar ritogi, weche manie zaburino nojiwogi ni gipar tije madongo mag Jehova. (Zaburi 46:8) Zaburino nonyiso achiel kachiel nyalo ma en-go mar tieko lwenje. (Zaburi 46:9) E kinde Muma, ne chal ka gima Jehova notieko lwenje ka ne orito joge mondo jowasikgi kik hinygi. Kata kamano, Muma singonwa ni machiegnini, obiro timo kamano e okang’ malach ka obiro tieko lwenje chuth e piny mangima.​—Isaya 2:4.

Be Jehova pod konyo jotichne e kindegi? Ee. Mano e momiyo jaote Paulo nojiwo Jokristo ni gigen kuom Jehova mondo okonygi. (Jo-Hibrania 13:6) Weche ma yudore e Zaburi 46 miyo wamedo bedo gadier ni Nyasaye nyalo ritowa. Gikonyowa neno Nyasaye kaka ‘kar bwokwa kendo tekowa.’​—Zaburi 46:1.

Ne vidio machuokni ma nyiso weche ma yudore e bug Zaburi.