Chiwo Kony e Kinde Masiche e Higa 2022—Nyiso Hera mar Owete Kokalo Kuom Tim

Muma nokoro ni e ndalowagi, “gik ma kelo luoro” kaka lwenje, yiengni mag piny, tuoche ma landore, kod gik mamoko kaka mago ne dhi betie. (Luka 21:10, 11) Wechego nomedo chopo kare e higa mar tijwaa mar 2022. Kuom ranyisi, lweny ma dhi nyime e piny Ukraine osechocho ngima ji tara gi tara. E pinje mang’eny, ngima ji bende e ka ne chako dok e wang’e nikech tuo mar korona ma nokwako piny ngima. E wi mano, masiche ma timore apoya nochocho ngima ji mang’eny, kuom ranyisi, ne nitie yiengni mar piny ma notimore e Haiti, kod kodh yamo mager ma nogoyo Central America, Philippines, kod pinje man yo wuok chieng’ e Afrika. Ere kaka Joneno mag Jehova nokonyo joma masiche kaka mago nochocho ngimagi?

E higa mar tijwa mar 2022, riwruogwa nochiwo kony ne joma noyudo masiche ma notimore kuonde moko 200! Kony duto ma nochiw koriw to romo dola milion 12.b Ne ane kaka pesa ma nochiw nokonyo kuonde moko ariyo ma masiche notimoree.

Yiengni mar Piny ma Notimore Haiti

Tarik 14 Agost higa 2021, yiengni moro maduong’ mar piny notimore yo milambo mar piny Haiti. Gima lit en ni Joneno mag Jehova adek notho e masirano. Ne gin nyiminewa ariyo kod owadwa moro. Joma notony ne nyaka nyagre gi kuyo ma ne gin-go nikech gigegi mang’eny nokethore, kendo wedegi bende notho e masirano. Owadwa moro miluongo ni Stephane wacho kama: “Ji mang’eny notho, kendo e taon mangima, ne iyikoga ji juma ka juma kuom dweche ma dirom ariyo moluwore.” Owadwa machielo miluongo ni Éliézer wacho kama: “Joneno mag Jehova mang’eny ne onge udi, lewni, wuoch, kod gik mamoko mochuno e ngima. Kuom dweche mang’eny, ji mathoth nodak gi luoro nikech yiengni mamoko matindo tindo ma ne timore bang’ yiengni maduong’no.”

Riwruogwa nochiwo kony mapiyo ahinya. Ofiswa ma Haiti nochiwo kony mokalo tan 53 mag chiemo, hembe, tandarua, matrese, kod chaja mag simu ma tiyo gi sola. E wi mano, e higa mar tijwa mar 2022, nitie ute mokalo 100 ma moko kuomgi noger manyien, to moko nolos kuonde ma nokethore e igi. Dola mokalo milion achiel notigo e chiwo kony.

Owetewa gi nyiminewa mor sidang’. Lorette wacho kama: “Yiengnino noketho odwa chuth kod ohandwa. Ne waonge gi gima dwacham. Kata kamano, riwruok mar oganda Jehova nokonyowa, kendo ne gimiyowa gik ma ne wachando.” Micheline wacho kama: “Yiengnino noketho ot ma nadakie gi yawuota ariyo. Onge gima nanyalo timo mak mana lemo ka akwayo Jehova mondo okonya, kendo nodwoka kotiyo gi riwruok mare. Sani wan gi ot ma jaber kendo motegno. Aseng’ado e chunya ni abiro timo duto manyalo mondo ago ne Jehova erokamano.”

Jotelo mag sirkal noneno kaka ne wachiwo kony. Jatend taon mar L’Asile nowacho kama: “Agoyonu erokamano kuom chiwo kony e yo mapiyo ahinya. Apwoyou nikech luor ma nuchiwo ne sirkal. Amor ni ok udich gi pesa. Kar mano, udich gi konyo ji. Hera e ma chwalou mondo uchiw kony.”

Kodh Yamo Mager Miluongo ni Ana Nogoyo Malawi kod Mozambique

Tarik 24 Januar higa 2022, kodh yamo moro mager miluongo ni Ana nogoyo Mozambique kae to ogoyo Malawi bende. Kodhno nochue gi yamo mager ma ne ringo kilometa 100 kuom sa achiel. Noketho weyni mag sitima, olalo mang’eny, kendo nokelo ohula maduong’.

Kodh yamono nochocho ngima Joneno 30,000 e piny Malawi kod Mozambique. Owadwa Charles ma ne en achiel kuom joma ne chiwo kony wacho kama: “Ka naneno kaka owetewa ne chandore kod kaka ne giselalo gigegi mang’eny, nawinjo malit ahinya. Nakia kaka dakonygi.” Gima rach kendo ma notimore, en ni ohula noketho chiembgi kod chambgi ma ne nie puothegi. Ute ji mathoth ne okethore. Gima lit en ni jaod owadwa moro kod nyige ariyo notho e masirano ka ne yie ma nodhi resogi onimo.

Kodh yamono ne lich ahinya. Ka nochopo sa abiriyo otieno, jood Sengeredo ma ne ni Nchalo e piny Malawi nowinjo ka pi wuo matek. Aoche ariyo nopong’ moo! Owadwa Sengeredo nong’ado ni nyaka giwuog e odgino. Mano ne en yiero makare nikech matin nono bang’ mano, odgino nogore piny. Pi noyweyo moko kuom gik ma ne gin-go, to moko nokethore. Ne gidhi e Od Romo ma kinde mang’eny ne kawogiga dakika 30 kiwuok odgi, to chieng’no wuodhno nokawogi seche ariyo. Ne gichopo ka giol kendo ka gitimo pi lilo, to gima ber en ni ne gichopo ka gingima.

Ofisewa man Malawi gi Mozambique nochako chiwo kony mapiyo. Ne ginyiso jorit-alwora kod jodong-kanyakla ni onon gik ma owete gi nyimine nochando, kendo gimigi chiemb chuny kod jip ma dwarore. Noket Komiti Makonyo e Kinde Masiche mondo ochung’ ne tij chiwo kony, kendo komitigo nochako chiwo chiemo kod gik mamoko mapiyo ne owetewa. Dola mokalo 33,000 notigo e ng’iewo chiemo kod gik mamoko, kendo dola mokalo 300,000 notigo e loso ne owetego ute manyien, kendo loso kuonde ma nokethore e ute mamoko.

Komitigo notiyo gi chiwo e yo maber, to mano ne dwarore nikech nengo gik moko oseidho ahinya. Kuom ranyisi, e dweche abiriyo mokwongo e tijgi mar chiwo kony, owete ma ne ng’iewo gik moko noyudo ka nengo mok kuon, ma en chiemo ma ji ohero ahinya Malawi, oidho gi pasent 70 kama. Nengo mafuta bende noidho ahinya. Owetego nong’iewo chiemo kod gige gedo ma ne yudore e alworano mang’eny dichiel. Mano nomiyo ong’adnegi nengo mag gik ma ne ging’iewogo, kendo ne ok gitiyo gi pesa mang’eny e ting’o gigo.

Tij chiwo kony e yo ma kamano nomulo chuny jotich Jehova ahinya. Owadwa Felisberto ma a Mozambique, nowacho kama: “Pok anenoga riwruok ma chiwore kamano. Ne gichiwo gige gedo, ne gikowo gigo, ne gichiwo jogedo, chiemo, kendo ne gitayowa e yor hera. Tij chiwo konyno ne en ranyisi maber mar hera mar owete ma Yesu nowuoye e Johana 13:34, 35.” Ester ma en chi-liel ma a Malawi, kendo ma ode nokethore wacho kama: “Nakia gima datim nikech naonge gi pesa ma nanyalo gerogo ot machielo. Omiyo, ka ne owete ogerona ot, nawinjo mana ka gima asechopo e Paradiso.”

Kaka piny manyien medo sudo machiegni, e kaka wabiro medo romo gi masiche mamoko madongo. (Mathayo 24:7, 8) Wagoyonu erokamano ahinya kuom chiwo magu, kendo wan gadier ni jotich Jehova biro dhi nyime yudo kony sama giromo gi masiche. Yore mag golo chiwo oler e websaitwa mar donate.jw.org. Erouru kamano kuom chiwo magu.