Samuel Mokwongo
29 Jo-Filistia+ nochoko jolwenjgi duto e dala mar Afek, to jolweny mag Israel ne ogoyo kambi but thidhiya man Jezreel.+ 2 Jotend Jo-Filistia ne kalo kanyo ka gin e grube mag ji mia-mia kod aluf-aluf. Kendo Daudi gi joge kaachiel gi Akish+ ne luwo bang’gi. 3 To jodong Jo-Filistia ne openjo niya: “Ang’o ma Jo-Hibraniagi timo kae?” Akish ne odwokogi kama: “Ma en Daudi jatij ruoth Saulo ma Ja-Israel. Osedak koda kuom higa achiel gi bathe+ to pok ayudo ketho moro amora kuome chakre ne oring obi ira nyaka kawuono.” 4 To jodong Jo-Filistia igi nowang’ kode mi ginyise niya: “Nyis ng’atno odog ka ma oaye.+ Nyise odog ka ma ne isepogone. Kik iyiene odhi kodwa e lweny nono to obiro lokore kodwa sa ma wakedo.+ Koso iparo ni nitie yo maber monyalo losogo winjruok gi ruodhe mopogore gi miye wiye jolwenjwa? 5 Donge ma e Daudi ma ne ji werne kendo mielne ka wacho niya:
‘Saulo osenego ji alufe,
To Daudi osenego ji aluf pieche gi pieche’?”+
6 Omiyo, Akish+ noluongo Daudi mi onyise kama: “Akuong’ora gi nying Jehova ni in jaadier kendo daher kawi kaachiel gi joga mondo wadhi waked e lweny,+ nimar pok ayudo ketho moro amora kuomi chakre nibi ira nyaka kawuono.+ Kata kamano, jodongo e ma ok oyie kodi.+ 7 Omiyo, dog gi kuwe, kendo kik itim gimoro amora ma biro chwanyo jodong Jo-Filistia.” 8 To Daudi nopenjo Akish kama: “Adog nikech ang’o? Atimo ang’o? En ketho mane miseyudo kuoma ndalo duto ma asedak kodi? Ang’o momiyo ok idwar ni adhi kodi mondo waked gi wasiki?” 9 Akish nodwoko Daudi niya: “An ang’eyo ni in ng’at maber mana ka malaika mar Nyasaye.+ To jodong Jo-Filistia e ma owachona ni, ‘Kik iyiene mondo odhi kodwa e lweny.’ 10 Omiyo, kiny imond kogwen kendo iwuog gi jotij ruodhi ma ne ibirogo.”
11 Omiyo, Daudi gi joge ne omondo chiewo gokinyi mi gidok e piny Jo-Filistia. Jolweny mag Filistia to nodhi Jezreel.+