Weche mag Ndalo Mokwongo

13 Daudi nowuoyo gi jotelo ma ne oket e wi jolweny aluf achiel-achiel gima ne oket e wi jolweny mia-mia kod jotelo mamoko duto.+ 2 Eka Daudi nowacho ne oganda Israel niya: “Ka uneno ni en gima ber kendo ni en gima long’o ne Jehova Nyasachwa, to waoruru wach ne owetewa modong’ e alwora duto mag Israel kod ne jodolo gi Jo-Lawi modak e mier+ man gi kuonde kwath mondo gibi giriwre kodwa 3 mondo wadhi wakel Sandug Singruok+ mar Nyasachwa.” Ne owachonegi kamano nikech ne ok oserit Sandugno maber e kinde Saulo.+ 4 Oganda duto ne oyie gi wachno nikech wachno ne bernegi giduto. 5 Kuom mano, Daudi nochoko Jo-Israel duto chakre aora* man Misri nyaka Lebo-hamath*+ mondo gidhi Kiriath-jearim gikel Sandug Singruok mar Nyasaye madier.+

6 Daudi kaachiel gi Jo-Israel duto nodhi nyaka Kiriath-jearim man Baala+ e piny Juda mondo gikel Sandug Singruok mar Jehova Nyasaye madier mobet e wi* jokerubi,+ ka ma oluong gi nyinge. 7 Ne gigolo Sandug Singruok mar Nyasaye e od Abinadab ka giting’e e gari manyien,+ to Uza gi Ahio e ma ne chiko garino.+ 8 Daudi gi Jo-Israel duto ne miel gi mor e nyim Nyasaye madier ka giwer kendo gigoyo nyatiti, gige thum ma nigi tonde migwelo, oyieke,+ nyidwonge+ kod turmbeta.+ 9 To ka ne gichopo kar dino mar Kidon, Uza notero lwete mosiro Sandug Singruok nikech dhok ne chiegni goye piny. 10 Gikanyono, mirimb Jehova nobedo mager gi Uza mi nonege nikech ne otero lwete mosiro Sandug Singruok+ mar Nyasaye. Uza ne otho e nyim Nyasaye kanyo.+ 11 To Daudi iye nowang’ nikech Jehova nobedo gi mirima gi Uza. Omiyo, kanyo osebed kiluongo ni Perez-uza* nyaka sani.

12 Omiyo, Daudi nobedo maluor nikech Nyasaye madier e odiechieng’no mopenjore kama: “Ere kaka dakel Sandug Singruok mar Nyasaye madier e dalana?”+ 13 Daudi ne ok okelo Sandugno e Dala Daudi ka ma nodakie, to nochiko mondo oter sandugno e od Obed-edom Ja-Giti. 14 Sandug Singruok mar Nyasaye madier ne obedo e od Obed-edom Ja-Giti kuom dweche adek, kendo Jehova ne guedho Obed-edom kod joode duto.+