Orwaki e Skul mar Tij Nyasaye

E PINJE mokalo 200, ji tara gi tara yudo tiegruok juma ka juma e Skul mar Tij Nyasaye. Moko kuom jogo, eka nyocha oa donjo e skundno, to moko kuomgi osebedo ka tiegore e skundno kuom higini mogwaro. Skundno itimo kuonde mopogore opogore mokalo 107,000 e piny mangima. Kata bed ni idak kanye, in bende inyalo donjo e skundni. Ji mopogore opogore tiegore e skundni nono maonge chudo, gibed jo higini adi, giwuok e oganda mane, kata ne gisomo maromo nade.

Kane ochak skundno e kanyakla mag Joneno mag Jehova e higa 1943, ne owach kama kilero gimomiyo ne ichake: “Mondo otieg ‘jogo duto moluoro Nyasaye,’ mosewinjo kendo oketo yie kuom Wach Nyasaye, ‘mondo gipuonj jomoko’ . . . gichop dwaro achiel ma en . . . bedo moikore chuth nyiso geno ma gin-go ei chunygi.” (Course in Theocratic Ministry, ite mar 4) Mano e gima pod skundno dwaro chopo nyaka chil kawuono.

Kuom adier, en ang’o maber moloyo mwanyalo timo gi mich mar wuoyo ma Nyasaye nomiyowa? Muma dwoko penjono kama: “Gik moko duto man gi muya opak Jehova.” (Zab. 150:6) Ka watimo kamano, wamiyo chuny Wuonwa me polo obed mamor. Wanyiso maler ni wadwoko erokamano gi chunywa duto kuom hera koda ber duto monyisowa. Mano emomiyo ijiwo Jokristo mondo ‘ochiw pile ne Nyasaye misango ma en pak mawuok kaka olemo e dhok mahulo nyinge’! (Hib. 13:15) Mondo wakonyi imed lony e tiyo gi mich mar wuoyo ma Jehova omiyi mondo ipakego, warwaki mondo idonj e Skul mar Tij Nyasaye.

Kata obedo ni skundni jiwo ahinya lony e somo e nyim ji, lony e wuoyo, koda lony e puonjo, mago kende ok e ber mayudore e Skul mar Tij Nyasaye. Kaka imedo tiegori e skundno, e kaka ibiro medo lony e somo, ng’eyo chiko iti, paro weche misomo, timo puonjruok, timo nonro, nono weche kendo chanogi, goyo mbaka, dwoko penjo, koda ndiko piny gik manie pachi. Muma wuon koda buge malero Muma ema itiyogo e timo puonjruok, chiwo paro, kendo golo twege e programno. Kaka imedo puonjori adiera mabeyo mayudore e Wach Nyasaye, e kaka ibiro medo bedo gi paro kaka mag Nyasaye. Mano kaka timo kamano nyalo konyi e yore duto mag ngimani! Konyiso kaka Wach Nyasaye kelo ber miwuoro, jasomo miluongo ni William Lyon Phelps mapuonjo e yunivasiti moro nowacho niya: “Ng’ato molony chuth gi puonj mag Muma, ema inyalo wachi gadier ni osomo. . . . An gadier ni ka ng’ato ong’eyo Muma, kata ka ok odhi e kolej, en gi gimaber moloyo ng’at ma ne odhi e kolej to ok ong’eyo Muma.”

Gima Onego Itim Mondo Skundni Okonyi Chuth

En adier ni mondo iyud konyruok chuth sama itiegori e Skul mar Tij Nyasaye, nyaka itim kinda kaka japuonjre. Jaote Paulo nojiwo Timotheo Jakristo wadgi niya: “Par wechegi, ket chunyi kuomgi chuth, mondo ji one dongo mari e yore duto.” (1 Tim. 4:15) Inyalo kawo okenge mage mondo chenroni okonyi chuth?

Tem ahinya mondo idhi e Skul mar Tij Nyasaye juma ka juma. Ti maber gi bugni, miluongo ni Tiegri e Skul mar Tij Nyasaye. Ndik nyingi kama oketni e ite mokwongo. Kinde duto ting’ bugni sama idhi e skul. Bende, bugni nigi thuolo kama inyalo ndikoe weche matin. Kapo ni isomo weche moko ei bugni miparo ni biro konyi, inyalo kiewogi. Sama skul dhi nyime, inyalo ndiko weche minyalo tiyogo e thuolo moweni e dir bugni.

Sama itimo ikruok ne migepe mag skul juma ka juma, kik wiyi wil ni buk mwatiyogo moloyo en Muma. Gima duong’ monego ikwong timo, en somo sula mag Muma monego osom e jumano. Gimachielo ma bende nyalo konyi ahinya en somo motelo weche mochan mibiro puonjruok e programno.

Sama skul dhi nyime, jowinjo nyalo yudo thuolo mag chiwo paro. In bende tem ichiw paro. Chiwo paro e yo ma kamano biro konyi ahinya paro gik mipuonji, kendo tiyo kodgi e ngimani mapile.

En adier ni kinde ka kinde, jopuonjre duto biro yudo migepe mag golo twege kod mag timo ranyisi e nyim kanyakla. Ti maber gi thuolo ma kamago. Tim kinda mondo itim dongruok e lony moro amora mar wuoyo momiyi mondo itiegrie. Ibi konyi gi paro kaka inyalo medo timo dongruok. Yie irwak paro momiyi mondo okonyi. Ndik e bugi weche mineno ni nyalo konyi timo dongruok. To nikech ok yot mondo in iwuon ine nyawo magi kaka jomoko nenogi, paro koda puonj michiwoni e yor hera kitiyo gi Muma, nyalo konyi timo dongruok maber. Mano en adier kata mana ne jogo mosebedo e skundni kuom higini mogwaro.—Nge. 1:5.

Be diher medo timo dongruok mapiyo moloyo? Mano nyalore to mana ka itimo kinda iwuon. Som motelo weche mibi wuo kuomgi e twege duto mag jopuonjre. Kapo ni biro dwarore ni ng’ato ochiwre mondo ogol twak moro, nyalo bedoni mayot timo kamano, to mano biro miyo imed lony. Sama jomoko golo twegegi, chik iti malong’o mondo iwinj kaka gilero weche. Wapuonjore kuom jowetewa.

E wi mano, kanyalore, inyalo medo timo dongruok mapiyo kuom puonjori bugni in iwuon motelo. Bang’ puonjruok sula 15 maluwogi, pod dhi nyime gi puonjruok e sula mawacho ni: “Program mar Timo Dongruok Ibed Jagol-Twak Kendo Japuonj Molony,” machakore e ite mar 78. Mokwongo, som moro ka moro kuom puonjgo, kendo tiegri kaka onyis e giko puonjgo. Ti kod puonj miyudogo e tij lendo. Mano nyalo konyi ahinya timo dongruok kaka jagol-twak kendo japuonj mar Wach Nyasaye.

Tiegruok e Skul mar Tij Nyasaye biro miyo ibed ng’at moikore timo gima duong’ moloyo madwarore e ngima. Nikech Nyasaye ema omiyowa ngima, pako Nyasaye e gima duong’ mowinjore watim gi ngimawa. Jehova Nyasaye owinjore opak e yo molony chuth. (Fwe. 4:11) Puonj mwayudo e skundni konyowa timo kamano nikech ipuonjowa mondo wapar e yo maliw, wati gi rieko, kendo waler adiera mabeyo miwuoro mayudore ei Wach Nyasaye e yo malong’o chuth.