Ang’o ma Anyalo Timo Mondo Abed Achiel Kuom Joneno mag Jehova?

Okenge ma dwarore ni ng’ato okaw mondo obed achiel kuom Joneno mag Jehova oler e weche Yesu ma yudore e Mathayo 28:19, 20. Ndikono lero gik ma ng’ato nyaka tim kodwaro bedo japuonjre Kristo, moriwo wuoyo kata chiwo neno e wi Jehova.

Okang’ mokwongo: Puonjri Muma. Yesu nonyiso jolupne ni ‘gilok ji obed jopuonjrene, ka gipuonjogi.’ (Mathayo 28:19, 20) Muma, to ahinya-ahinya puonj mag Yesu ma yudore e iye, lero gik minyalo timo mondo idag e ngima maber mopong’ gi mor. (2 Timotheo 3:16, 17) Waikore konyi mondo ipuonjri Muma kokalo kuom chenro ma wan-go mar puonjo Muma, ma ok ichulo gimoro amora.​—Mathayo 10:7, 8; 1 Jo-Thesalonika 2:13.

Okang’ mar 2: Ti gi gik mipuonjori. Yesu nowacho ni jopuonjrene onego ‘otim gik moko duto ma nochiko.’ (Mathayo 28:20) Mano nyiso ni ok ipuonjri Muma mana mondo ing’e weche manie iye kae to iweyo gi kanyo. Nyalo dwarore ni itim lokruoge moko madongo e pachi kod timbeni mondo oluwre gi puonj mag Muma. (Tich Joote 10:42; Jo-Efeso 4:22-29; Jo-Hibrania 10:24, 25) Kae to, joma timo kaka Yesu nochiko biro luwo ranyisine kuom chiwo ngimagi mondo giti ne Jehova Nyasaye.​—Mathayo 16:24.

Okang’ mar 3: Dhi e batiso. (Mathayo 28:19) Muma pimo batiso kod yik. (Pim gi Jo-Rumi 6:2-4.) Sama ibatis ng’ato, chalo ka gima otho e yorene machon, kendo ochier e kit ngima manyien. Kuom mano, batiso mari en yo mar nyiso e lela ni isekawo okenge ariyo mokwongo ma Yesu nowacho, kendo ni koro ikwayo Nyasaye mondo okonyi ibed gi chuny ma onge bura e nyime.​—Jo-Hibrania 9:14; 1 Petro 3:21.

Ere kaka abiro ng’eyo ni koro to aikora ne batiso?

Wuo gi jodong-kanyakla. Gibiro wuoyo kodi mondo gine ka be iwinjo tiend batiso, itiyo gi gik mipuonjori, kendo isechiwo ngimani ne Nyasaye, ma onge ng’ama ochuni.​—Tich Joote 20:28; 1 Petro 5:1-3.

Be okengegi dwarore kuom nyithind Joneno bende?

Ee. Muma nyisowa ni wapidh nyithindwa ka ‘warieyogi kendo wapuonjogi kaka Jehova dwaro.’ (Jo-Efeso 6:4) Kata kamano, ka gisedongo, gin e ma nyaka koro giyier ka be gibiro puonjore Muma, yie gi gik ma gipuonjore, kendo tiyo gi gigo e ngimagi, e ka inyalo batisgi. (Jo-Rumi 12:2) Tiende ni, e weche lamo, ng’ato ka ng’ato nyaka tim yierone owuon.​—Jo-Rumi 14:12; Jo-Galatia 6:5.