Gen Kuom Jehova Kaka Samson Notimo

1-2. Ang’o momiyo onego wapuonjre kuom ranyisi mar Samson?

ANG’O ma biroga e pachi sama iwinjo nying Samson? Samoro iparo kaka ne en ng’at ma nigi teko mang’eny ahinya. Mano en adier. Kata kamano, notimo yiero moro marach ma nokelone chandruoge mang’eny. Jehova noketo pache kuom gik mabeyo ma Samson notimo, kendo noketo wechego e Muma mondo opuonjwa.

² Jehova notiyo gi Samson e timo gik malich miwuoro mondo oresgo Jo-Israel. Higni mang’eny bang’ ka Samson nosetho, Jehova notayo jaote Paulo mondo ondik nying Samson e list mar joma nonyiso yie motegno. (Hib. 11:32-34) Ranyisi mar Samson nyalo jiwowa. Nogeno Jehova kata e kinde ma ne weche tek. We wanon ane kaka ranyisine nyalo jiwowa kendo puonjowa.

SAMSON NOGENO KUOM JEHOVA

3. Jehova nomiyo Samson migawo mane?

³ Ne onyuol Samson e kinde ma Jo-Filistia ne locho e wi Jo-Israel kendo ne gisandogi malit. (Bura 13:1) Jo-Filistiago nomiyo Jo-Israel oyudo chandruoge mang’eny. Jehova noyiero Samson mondo ‘ores Jo-Israel e lwet Jo-Filistia.’ (Bura 13:5) Mano ne ok en migawo mayot. Ne dwarore ni Samson ogen kuom Jehova mondo otim migawono e yo maber.

4. Ere kaka Jehova noreso Samson e lwet Jo-Filistia? (Jong’ad Bura 15:14-16)

⁴ Ne ane ranyisi ma nyiso ni Samson nogeno kuom Jehova kod kaka Jehova nokonye. Nitie kinde moro ma jolweny mag Jo-Filistia nodhi mako Samson ka ne en e alwora mar Lehi, ma nenore ni ne nie piny Juda. Luoro nomako Jo-Judago, kendo ne ging’ado ni ne gidhi chiwo Samson ne jowasikgi. Ne gitueye gi tonde ariyo manyien kae to gitere ir Jo-Filistia. (Bura 15:9-13) Kata kamano, “roho mar Jehova ne omiyo Samson teko” mi tondego nochot. Kae to “noneno chok-lemb punda mapod numu” mokwanye, kendo notiyo gi chogono e nego Jo-Filistia 1,000.—Som Jong’ad Bura 15:14-16.

5. Ere kaka Samson nonyiso ni nogeno Jehova ka notiyo gi chok-lemb punda e nego jowasike?

⁵ Ang’o momiyo Samson notiyo gi chok-lemb punda, to mano ok en gima ng’ato ne nyalo tiyogo sama en e lweny? Onge kiawa ni Samson nong’eyo ni nonyalo loyo Jo-Filistiago mana kogeno kuom Jehova, to ok nikech gir lweny moro amora ma nonyalo tiyogo. Samson notiyo gi gima ne nyalo yudore mayot mondo otimgo dwach Jehova. Kuom adier, nikech Samson nogeno Jehova, Jehova noguedhe mi oloyo Jo-Filistiago!

6. Ranyisi mar Samson nyalo puonjowa ang’o sama watimo migepewa?

⁶ Wan bende Jehova nyalo konyowa mondo wachop migepewa, moriwo nyaka migepe ma nyalo nenore ni tek. Nyasaye nyalo konyowa e yo ma ne ok wapar kata. Bed gadier ni mana kaka Jehova nokonyo Samson, obiro konyi timo dwache, tek mana ni igene.—Nge. 16:3.

7. En ranyisi mane ma konyowa ng’eyo gimomiyo onego wakwa Jehova mondo otawa?

⁷ Thoth owete gi nyimine ma timo tij gero utewa mag lamo osenyiso ni gigeno Jehova. E kinde mokalo, owetewago ne goroga kendo gero thoth Ute Romo manyien kaachiel gi ute mamoko mitiyogo e tij Nyasaye. Nikech medruok ma osebedo ka timore e riwruok mar oganda Jehova, ne dwarore ni otim lokruok. Owete ma tayo nokwayo Jehova mondo otagi kendo ne gitemo tiyo gi yore moko manyien, kaka ng’iewo ute moseger kae to gilosogi. Owadwa Robert mosebedo ka konyo e migawo mar gedo kuom higni moko wacho kama: “Mokwongo okwongo, ne ok yot ne owete moko rwako lokruok ma notimno. Yorno nopogore ahinya gi yo ma ne wasebedo ka watimogo gik moko kuom higni mang’eny. Kata kamano, owete noyie timo lokruok kendo osenenore ayanga ni Jehova guedho lokruogno.” Mae en mana ranyisi achiel ma nyiso kaka Jehova tayo joge mondo gitim dwache. Kinde ka kinde, waduto onego wapenjre kama: ‘Be akwayoga Jehova mondo otaya kendo bedo moikore timo lokruok moro amora ma dwarore mondo atine e yo maberie moloyo?’

SAMSON NOTIYO MABER GI GIK MA NE JEHOVA OMIYE

8. Kinde moro ka ne riyo oloyo Samson, notimo ang’o?

⁸ Samoro isesomo kaka Samson notimo gik mamoko malich miwuoro. Kuom ranyisi e kinde moro ka ne en kende, nokedo gi sibuor monego sibuorno, kae to bang’e nonego chwo 30 mag Jo-Filistia ma ne a e dala mar Ashkelon. (Bura 14:5, 6, 19) Samson nong’eyo ni notimo gigo duto nikech Jehova e ma nokonye. Wachno nonenore ayanga e kinde moro ka ne riyo oloye bang’ nego Jo-Filistia 1,000. Ang’o ma notimo? Kar manyo pi en owuon, nokwayo Jehova mondo okonye.—Bura 15:18.

9. Ere kaka Jehova nokonyo Samson sama ne riyo oloye? (Jong’ad Bura 15:19 kod weche moler piny)

⁹ Jehova nokonyo Samson kuom timo hono mi noyudo pi ma nonyalo modho. Ka ne Samson osemodho pigno, “tekone ne oduogo.” (Som Jong’ad Bura 15:19 kod weche moler piny.) Nenore ni soko mar pigno pod ne nitiere higni moko bang’e ka ne Jehova otayo janabi Samuel mondo ondik bug Jong’ad Bura. Nyalo bedo ni sokono noparo ne Jo-Israel ma nonene ni ka gigeno kuom Jehova sama gin gi chandruok, to obiro konyogi.

10. Ang’o ma dwarore ni watim mondo Jehova okonywa? (Ne picha bende.)

¹⁰ Wan bende dwarore ni wakwa Jehova mondo okonywa, bed ni wan gi nyalo mage kata wasetimo migepe mage e tije. Onego wabolre kendo wayie ni weche nyalo dhinwa maber mana ka wageno kuom Jehova. Mana kaka Samson noyudo teko bang’ modho pi ma ne Jehova omiye, e kaka wan bende wabiro yudo teko sama wachamo chiemb chuny ma Jehova omiyowa.—Mat. 11:28.

11. Ere kaka wanyalo nyiso ni wageno Jehova? Chiw ane ranyisi.

¹¹ Ne ane ranyisi mar Aleksey, ma en achiel kuom owete mosenano nikech sand mager ma giyudo e piny Russia. Ang’o mosekonye chung’ motegno e bwo chal matek kamano? En gi jaode, giseloso chenro maber mar timo gik motudore gi weche Nyasaye. Owacho kama: “Atemoga matek mondo amakra gi chenrona mar timo puonjruok ma mara awuon kaachiel gi somo Muma pile. Okinyi kokinyi, an gi jaoda wanonoga ndiko ma chieng’no kae to walamo kanyachiel.” Ranyisi mar Aleksey puonjowa ang’o? Kar geno kuom tekrewa wawegi, onego wagen kuom Jehova. Wanyalo timo mano nade? En kuom timo gik ma gero yiewa, kaka bedo gi chenro maber mar puonjruok ma marwa wawegi kod timo gik mamoko motudore gi lamo. Kae to Jehova biro guedho kinda ma watimo mondo watine. Notego Samson, to wan bende wanyalo bedo gadier ni obiro tegowa. 

SAMSON NE OK OWEYO TIMO DWACH JEHOVA

12. En yiero mane marach ma Samson notimo, to ere kaka yierono nopogore gi yiero mamoko ma nosegatimo?

¹² Samson ne en dhano morem mana kaka wan, omiyo, nitie kinde moko ma nonyalo timo yiero moko maricho. Nitie yiero moro ma notimo ma nokelone masira. Bang’ tayo Jo-Israel kuom kinde, ‘ne omako osiep gi nyako moro ma nyinge Delila ma ne odak but Aora Sorek.’ (Bura 16:4) Ka ne pok omako osiep gi Delila, noyudo osesingo ne nyako moro ma Nya-Filistia ni nodhi kende, kendo “Jehova e ma ne tayo wachno” nikech nomanyo “thuolo mar kedo gi Jo-Filistia.” Kinde moko bang’e, Samson nodhi e od dhako moro ma ne en ochot ma nodak e dala mar Gaza e piny Jo-Filistia. Ka ne en kuno, Jehova nomiye teko mopudho rangeye mag dalano kendo ting’ogi e goke, modhi kodgi mabor. Mano ne nyalo miyo omonj dalano e yo mayot. (Bura 14:1-4; 16:1-3) Osiep ma ne nie kind Samson gi Delila to nopogore nikech nenore ni Delila ne en Nya-Israel.

13. Ang’o ma Delila notimo mondo ondhog Samson?

¹³ Delila noyie kawo pesa mang’eny kuom Jo-Filistia mondo ondhog Samson. Dibed ni Samson nohero Delila ahinya ma koro ne ok onyal fwenyo gima rach ma Delila ne dwaro timone? Samoro nyalo bedo kamano. Kata kamano, gima wang’eyo en ni Delila ne siko ka thung’o Samson gi wach mondo onyise kama ne tekone ae. Gikone, Samson nonyise. Mano nomiyo kuom kinde, nolalo teko ma ne en-go kod winjruok maber ma ne en-go gi Jehova.—Bura 16:16-20.

14. Ang’o ma notimore ne Samson nikech nogeno Delila?

¹⁴ Samson noyudo chandruoge malit nikech nogeno Delila kar geno Jehova. Jo-Filistia nomako Samson mi gigolo wengene. Ne gitueye e jela moro ma ne ni Gaza, dala ma kinde moko nosegamuko rangeyene, kendo ne gikete mondo obed jareg cham e jela. Kae to chieng’ moro ne gikele e nyasi moro ma ne gitimo mondo ginyiere. Ne gichiwo misengni mang’eny ne nyasachgi miluongo ni Dagon, nikech ne giparo ni en e ma nochiwonegi Samson. Ne gigolo Samson e jela mi gikele e nyasino “mondo otugnegi,” tiende ni, omigi nyiero.—Bura 16:21-25.

15. Ere kaka Samson nonyiso ni nogeno Jehova kata bang’ timo yiero marach? (Jong’ad Bura 16:28-30) (Ne picha manie nyim gaset.)

¹⁵ Samson notimo yiero marach, kata kamano, ne ok oweyo tiyo ne Jehova. Nomanyo thuolo mar chopo migawo ma ne Nyasaye omiye mar kedo gi Jo-Filistia. (Som Jong’ad Bura 16:28-30.) Noywak ne Jehova kama: “Yie achul kuor kuom Jo-Filistiagi.” Nyasaye madier nowinjo kwayo mar Samson, kendo nodwokone teko. Mano nomiyo Samson onego Jo-Filistia mang’eny moloyo kinde moro amora.

16. Ang’o ma wapuonjore kuom yiero marach ma Samson notimo?

¹⁶ Kata obedo ni Samson noyudo chandruoge malit nikech yiero marach ma notimo, ne ok oweyo tiyo ne Jehova. Ka po ni watimo yiero moro marach kendo omiwa siem kata walalo migawo moro ma ne wan-go, ok onego wawe tiyo ne Jehova. Par ni, Jehova ok jwang’waga. (Zab. 103:8-10) Kata obedo ni wajoketho, Jehova pod nyalo miyowa teko mar timo dwache mana kaka notimo ne Samson.

17-18. Ranyisi mar Michael jiwi nade? (Ne picha bende.)

¹⁷ Ne ane ranyisi mar owadwa moro miluongo ni Michael. Ne en jakony-tich kendo painia mapile. Kata kamano, notimo yiero moro marach ma nomiyo olalo migepe ma ne en-go e kanyakla. Owacho kama: “Chop kindego, weche ne dhina maber ahinya e tij Jehova. Kae to apoya nono, nalalo migepe ma ne an-go kendo nachako neno ni onge gima nanyalo timo e tij Jehova. Nang’eyo ni Jehova ne ok nyal jwang’a, kata kamano, nawuoro ahinya ka be winjruokna kode ne dhi bedo maber kaka chon, kata ka be nanyalo tiyone kaka natiyonega chon.”

¹⁸ Gima ber en ni Michael ne ok oweyo tiyo ne Jehova. Omedo wacho kama: “Nachako loso winjruokna gi Jehova kuom wuoyo kode e lamo pile, puonjruok Muma, kendo paro matut kuom gik ma ne apuonjora.” Bang’ kinde, Michael nochako yudo migepe kendo e kanyakla. Sani koro en jaduong’-kanyakla kendo painia mapile. Owacho kama: “Kony kod jip moa kuom jodongo nomiyo aneno ni Jehova pod ohera. Sani koro anyalo timo migepe ma an-go e kanyakla gi chuny maler. Wachni nopuonja ni Jehova biro ng’wono ne ng’ato ang’ata moloko chunye gadier.” Wanyalo bedo gadier ni Jehova biro tiyo kodwa kendo obiro guedhowa kata ka watimo ketho moro, tek mana ni watimo duto ma wanyalo mondo warie yorewa kendo wadhi nyime gene.—Zab. 86:5; Nge. 28:13.

19. Ere kaka ranyisi mar Samson ojiwi?

¹⁹ E sulani, wasenono moko kuom gik madongo ma notimore e ngima Samson. Ne ok en ng’at makare, kata kamano, ne ok oweyo tiyo ne Jehova kata obedo ni notimo yiero marach kuom mako osiep gi Delila. Bende, Jehova ne ok ojwang’e. Notiyo kode e yo malich miwuoro. Jehova ne pod nene kaka ng’at ma nigi yie motegno, to mano e momiyo noketo nyinge e list mar joma nomakore kode miwuoyo kuomgi e bug Jo-Hibrania sula mar 11. To mano kaka wamor ng’eyo ni watiyo ne Wuonwa manie polo, moherowa, kendo ma gombo tegowa sama wawinjo ka waonge teko! Kuom mano, mana kaka Samson, mad wasikuru ka wakwayo Jehova mondo ‘oparwa kendo omiwa teko.’—Bura 16:28.