SULA MAR 26
Ang’o Momiyo Gik Maricho Timore Kendo Ji Chandore?
Sama masira moro otimore, ji penjorega penjoni: “Ang’o momiyo gima kamano otimore?” Wamor ahinya ni Muma miyowa dwoko makare mar penjono.
1. Ang’o ma Satan notimo ma nomiyo richo ochako betie e piny?
Satan Jachien nong’anyo ne Nyasaye. Satan ne dwaro ni oloch e wi dhano, to mano e momiyo nowuondo jonyuolwa mokwongo Adam gi Hawa mondo giriwe lwedo e ng’anyo ne Nyasaye. Satan notimo mano kuom wuondo Hawa. (Chakruok 3:1-5) Nomiyo Hawa ochako paro ni nitie gimoro maber ma Jehova nopandone. Notemo wacho ni dhano ne dhi bedo gi ngima maber ka ok giluwo chike Nyasaye. Satan nowacho miriambo mokwongo ka ne onyiso Hawa ni ne ok odhi tho. Mano e momiyo Muma luongo Satan ni “jamiriambo kendo wuon miriambo.”—Johana 8:44.
2. Adam gi Hawa noyiero timo ang’o?
Jehova nomiyo Adam gi Hawa gik mang’eny ahinya. Nonyisogi ni ne ginyalo chamo olembe mag yiende duto manie puodho mar Eden, mak mana olemb yath achiel kende. (Chakruok 2:15-17) Kata kamano, ne gichamo olemb yath ma ne okwergino. Hawa “ne opono olemb yadhno mochako chamo.” Bang’e, Adam “bende ne ochamo” olemono. (Chakruok 3:6) Giduto ne giketho chik Nyasaye. Nikech Adam gi Hawa ne gin joma kare chuth, ne ginyalo timo kaka Nyasaye nonyisogi. To nikech ne giyiero mar ketho chik Nyasaye, ne gitimo richo kendo kwedo loch Nyasaye. Yiero ma ne gitimono ne okelonegi chandruoge mang’eny.—Chakruok 3:16-19.
3. Yiero ma Adam gi Hawa notimo nokelo ne dhano ang’o?
Ka ne Adam gi Hawa oketho chik, ne gibedo joricho kendo richono ne olandore kuom nyikwagi duto. Muma wacho kama e wi Adam: “Kaka richo nodonjo e piny kokalo kuom ng’ato achiel, kendo tho nobiro kokalo kuom richo, tho nolandore kuom ji duto.”—Jo-Rumi 5:12.
Nitie gik mang’eny momiyo wachandore. Seche moko wachandore nikech yiero moro marach ma ne watimo. Samoro to wachandore nikech yiero maricho ma jomamoko otimo. To seche moko wanyalo yudo chandruok nikech bedo kama ok owinjore e seche ma ok owinjore.—Som Eklesiastes 9:11.
TIM NONRO
Non ane gimomiyo Nyasaye ok e ma kelnwa richo kod chandruok ma waneno e piny e kindewagi, kod kaka owinjo sama wachandore.
4. En ng’a ma kelonwa chandruok?
Ji mang’eny paro ni Nyasaye e ma chiko pinyni. Be mano en adier? Tug VIDIO.
Som Jakobo 1:13 kod 1 Johana 5:19, kae to uwuo e wi penjo ma luwoni:
Be Nyasaye e ma kelonwa gik maricho kod chandruok?
5. Ne ane gik ma loch Satan osekelo ne dhano
Som Chakruok 3:1-6, kae to uwuo e wi penjo ma luwogi:
En miriambo mane ma Satan nowacho?—Ne kwan matindo 4 kod 5.
Satan nonyiso nade ni nitie gimoro maber ma Jehova nopando ne dhano?
Kaluwore gi gima Satan nowacho, be ochuno ni Jehova e ma oloch e wi dhano eka gibed mamor?
Som Eklesiastes 8:9, kae to uwuo e wi penjo ma luwoni:
Ang’o mosebedo ka timore kuom kinde ma Jehova ok osebedo ka locho e wi pinyni?
Adam gi Hawa ne gin jo makare chuth kendo ne gidak e Paradiso. Kata kamano, ne giwinjo Satan ma ging’anyo ne Jehova
Bang’ ng’anyono, piny nopong’ gi richo, chandruok, gi tho
Jehova biro tieko richo, chandruok, kod tho. Dhano biro bedo jo makare chuth kendo gibiro dak e Paradiso
6. Kaka Jehova winjo sama wachandore
Nyasaye winjo nade sama wachandore? Ne ane gima Ruoth Daudi kod jaote Petro nowacho. Som Zaburi 31:7 kod 1 Petro 5:7, kae to uwuo e wi penjo ma luwoni:
Ng’eyo ni Jehova neno chandruogewa kendo odewowa miyo iwinjo nade?
7. Nyasaye biro tieko chandruoge duto mag dhano
Som Isaya 65:17 kod Fweny 21:3, 4, kae to uwuo e wi penjo ma luwoni:
Ang’o momiyo en gima hoyowa ng’eyo ni Jehova biro tieko chandruoge duto ma dhano osebedogo?
Be ing’eyo?
Ka ne Satan owacho miriambo mokwongo, noketho nying Jehova. Ne odwaro ni ji one Jehova kaka jaloch ma ok oherogi kendo ma ok ja adiera. E kinde ma Jehova biro tieko chandruoge duto mag dhano, obiro miyo nyinge duong’. Mano tiende ni obiro nyiso ni loch mare e loch maberie mogik. Keto nying Jehova obed maler en wach maduong’ ahinya.—Mathayo 6:9, 10.
PARO MA JOMOKO NIGO: “Nyasaye temowaga gi chandruok mondo ong’e ka be yiewa otegno.”
In ineno nade?
PUONJ MADUONG’
Satan Jachien, Adam, gi Hawa e joma nokelo richo e piny. Jehova winjo malit sama wachandore kendo machiegnini, obiro tieko chandruoge duto.
Ang’o ma ipuonjori?
En miriambo mane ma Satan Jachien nonyiso Hawa?
Ng’anyo mar Adam gi Hawa osehinyowa e yo mane?
Wang’eyo nade ni Jehova dewowa sama wachandore?
MED TIMO NONRO
Ne ane kaka Muma lero gima richo en.
Som weche momedore e wi wach ma Satan Jachien ne osiekogo e puodho mar Eden.
“Ang’o Momiyo Nyasaye Oweyo Chandruok Mondo Obedie?” (Ohinga mar Jarito, Januar 1, 2014)
Ne ane dwoko mar penjo moro mosechando ji mang’eny.
Ne ane gima ng’at moro nofwenyo e wi chandruoge ma noneno e alwora ma nodakie.