20, 21. (a) Ler ane gima Elija noneno ka nochung’ e dho bur e Got Horeb. (b) Yore ma Jehova nonyisogo tekone nopuonjo Elija ang’o?

²⁰ Ang’o ma Jehova notimo mondo okony Elija loyo luoro koda parruok ma ne en-go? Malaikano nonyiso Elija mondo ochung’ e dho burno. Elija notimo kaka nonyise ka ok ong’eyo gima ne dhi timore. Yamo mager notugore! Yamono nobiro gi koko maduong’ komuko gode kendo baro kite madongo dongo. Tem neno ka Elija umo wang’e to konchiel omako nangane matek ma koro yamo fwadho. Bende, nikech piny nochako yiengni, ne nyaka otem ahinya mondo kik ogore piny. To kata ka mago pok orumo, mach moro maduong’ nowuok momiyo oringo odok e bur mondo kik majno wang’e.—1 Ruo. 19:11, 12.

²¹ Muma nyisowa ni Jehova ne onge e i yamo magerno, noonge e i yiengni pinyno, kendo ne oonge e i mach maduong’no. Elija nong’eyo ni Jehova ok en nyasaye manono kaka Baal ma ne jotichne mofuwo pako ni en nyasaye makelo koth. Jehova e Soko mar teko duto mayudore e chwech. Kata kamano, en gi teko mang’eny ahinya moloyo gimoro amora ma ne ochweyo. Kata mana polo wuon ok rome! (1 Ruo. 8:27) To honnigi nokonyo Elija nade? Ng’e ni ne oluor. Honnigo nokonyo Elija ng’eyo ni nikech Jehova Nyasaye ma wuon teko duto ne ni kore, ne onge gimomiyo nonego oluor Ahab kod Jezebel.—Som Zaburi 118:6.

22. (a) Ere kaka “dwol matin mokuwe” nojiwo Elija ni ok en ng’at manono? (b) Nyalo bedo ni ‘dwol matin mokuweno’ ne en mar ng’a? (Ne weche moler piny.)

²² Bang’ mach, piny noling’ thi, kae to Elija nowinjo “dwol matin mokuwe.” Dwolno nobiro mar ariyo mojiwo Elija mondo owuo kendo, ma Elija ochako owacho kendo duto ma ne nie chunye.a Nyalo bedo ni mano nomedo gonyo chuny Elija. Onge kiawa ni Elija nomedo yudo hoch kuom weche ma ne ‘dwol matin mokuweno’ onyise. Jehova nonyiso Elija ni omor kode kendo ni ne ok en ng’at manono. Jehova notimo kamano e yo mane? Nyasaye ne onyise chenrone mar kedo gi lamo mar Baal e piny Israel kuom kinde malach. Ne nenore maler ni tij Elija ne ok en kayiem nimar Nyasaye ne dhi nyime chopo dwache mar tieko lamo mar Baal. E wi mano, Nyasaye pod ne dwaro tiyo gi Elija e chopo dwacheno, omiyo ne ooro Elija gi ote moko ma ne onego ochiw ne Jo-Israel.—1 Ruo. 19:12-17.