Dewo chalgi medoni mor iwuon. Be isega konyo ng’ato ting’o gimoro mapek mohewe? Ka en kamano, nyaka bed ni ne imor nikech ne ichiwo ne ng’ato kony madwarore. Kamano bende, jogo ma gin jonyuol achiel, chur gi ting’ mohewo ng’ato achiel. Ka ikonyogi kaka dwarore, ibiro neno adiera mag weche mayudore e Zaburi 41:1: “Ojahawi jalo ma keto chunye koparo jo modhier.”

Nyalo nenore ni gima yot en mana penjo jal ma en janyuol achiel ni, “Anyalo konyi e yo mane?” Kata kamano, penjono ok mi ng’ato onyisi gigo machande gadier. Mana kaka ne owach motelo, Zaburi 41:1 jiwo ni ber ng’ato ‘oket chunye opar’ jomoko. Nonro moro lero ni wach ma otigo ka e dho-Hibrania, tiende en “paro matut kuom weche ma korgi tek mondo omi ng’ato otim gimoro e yo mariek.”