SULA MAR 57
To Nade Kitimo Richo Maduong’?
Kata obedo ni ihero Jehova ahinya, kendo itemo matek mondo kik itim gimoro amora ma nyalo chwanye, seche moko pod inyaloga timo richo. Kata kamano, nitie richo moko madongo ahinya moloyo mamoko. (1 Jo-Korintho 6:9, 10) Sama itimo richo moro maduong’, ng’e ni Jehova pod oheri; oikore ng’wononi kendo konyi.
1. En ang’o ma nyaka watim mondo Jehova ong’wonnwa?
Joma ohero Jehova winjoga malit ahinya sama gifwenyo ni gitimo richo moro maduong’. Kata kamano, Jehova hoyogi gi weche ma ne osingo ne joge ka ne owacho kama: “Kata obedo ni richou kwar ka remo, ginibed ma rachar ka pe.” (Isaya 1:18) Jehova biro ng’wononwa ka waloko chunywa mi waweyo richo. Ere kaka wanyalo loko chunywa? Wanyalo timo kamano ka waweyo richono nikech lit ma wawinjo e chunywa, kendo wakwayo Jehova mondo ong’wonnwa. Kae to watem matek mondo wawere gi paro maricho, kata tim moro ma ne omiyo wadonjo e richo kendo wadhi nyime dak kaluwore kod chike maler mag Jehova.—Som Isaya 55:6, 7.
2. Ere kaka Jehova tiyo gi jodong-kanyakla mondo gikonywa sama watimo richo?
Ka watimo richo moro maduong’, Jehova nyisowa ni ‘waluong jodongo.’ (Som Jakobo 5:14, 15.) Jodongogo ohero Jehova ahinya kendo gihero joma tiyo ne Jehova. Osetieggi mi ging’eyo kaka ginyalo konyowa mondo walos winjruokwa gi Jehova kendo.—Jo-Galatia 6:1.
Ere kaka jodongo nyalo konyowa ka watimo richo moro maduong’? Jodongo ariyo kata adek, biro tiyo gi Muma mondo giriewa. Bende gibiro jiwowa kendo nyisowa gik monego watim mondo kik wadonj e richo kendo. Kae to gibiro nyisowa gik ma ok wabi timo e kanyakla, nyaka winjruokwa gi Jehova obed motegno. Ka ng’ato otimo richo to otamore loko chunye, jodongo biro gole e kanyakla mondo timbene maricho kik keth jomamoko.
TIM NONRO
Non ane kaka inyalo medo goyo erokamano kuom kony ma Jehova miyowa sama watimo richo moro maduong’.
3. Sama wahulo richowa, mano konyowa loso winjruok maber gi Jehova
Wachwanyo Jehova sama watimo richo moro amora, omiyo owinjore wahulne richowa. Som Zaburi 32:1-5, kae to uwuo e wi penjo ma luwoni:
Ang’o momiyo onego wahul richowa ne Jehova kar temo pandogi?
Sama wakwayo jodongo mondo okonywa bang’ ka wasehulo richowa ne Jehova, mano miyo wawinjo maber e chunywa. Tug VIDIO, kae to uwuo e wi penjo ma luwo.
Ere kaka jodongo nokonyo Canon mondo oduog ir Jehova?
Onego wanyis jodongo adiera duto ma ok wapandogi gimoro amora nikech gidwaro mondo gikonywa. Som Jakobo 5:16, kae to uwuo e wi penjo ma luwoni:
Ang’o momiyo jodongo nyalo konyowa e yo mayot ka ok wapandogi gimoro amora?
Hul richoni, nyis jodongo adiera duto ma ok ipandogi gimoro amora, kendo rwak kony ma Jehova chiwo
4. Golo ng’ato e kanyakla konyo ng’at motimo richo kod kanyakla
Ka ng’ato otimo richo moro maduong’ to otamore luwo chike mag Jehova, igole e kanyakla kendo ok wanyal dhi nyime tudore kode. Som 1 Jo-Korintho 5:6, 11, kae to uwuo e wi penjo ma luwoni:
Mana kaka thowi landore e i mogo duto modwal, ere kaka tudruok gi jaricho modagi lokore nyalo miyo timne marach olandre e kanyakla?
Jodong-kanyakla manyo kendo konyo joma ogol e kanyakla nikech giluwo ranyisi mar Jehova mar nyiso ng’wono ne joricho. Ji mang’eny ma ne ogol e kanyakla oseduogo nikech kata obedo ni kum ma ne omigino ne lit, mano nokonyogi mondo gilok chunygi. —Zaburi 141:5.
Ere kaka yo ma Jehova timonego joricho nyiso ni ong’ado bura e yo mowinjore, ong’won, kendo en gi hera?
5. Jehova ng’wononwa sama waloko chunywa
Yesu notiyo gi ranyisi ma konyowa ng’eyo kaka Jehova winjo sama ng’ato oloko chunye. Som Luka 15:1-7, kae to uwuo e wi penjo ma luwoni:
Wach ma ndikono wuoye puonji ang’o e wi Jehova?
Som Ezekiel 33:11, kae to uwuo e wi penjo ma luwoni:
Ang’o ma dwarore ni watim mondo wanyis ni waloko chunywa?
Mana kaka jakwath, Jehova dewo ahinya rombene
PARO MA JOMOKO NIGO: “Aluor ni ibiro gola e kanyakla ka ahulo richona ne jodongo.”
Ang’o ma inyalo nyiso ng’at ma nigi paro ma kamano?
PUONJ MADUONG’
Ka watimo richo moro maduong’, Jehova biro ng’wononwa ka wawinjo malit nikech richono kendo waikore weyo richono.
Ang’o ma ipuonjori?
Ang’o momiyo ber mondo wahul ne Jehova richowa?
Ang’o monego watim mondo Jehova owenwa richowa?
Ka watimo richo moro maduong’, ang’o momiyo onego wamany kony kuom jodongo?
MED TIMO NONRO
Ne ane kaka Jehova nonyiso ng’at moro ng’wono mana kaka inyisowa e Isaya 1:18.
Ere kaka jodongo temoga mondo gikony joma otimo richo madongo?
“Kaka Jodongo Nyiso Joricho Hera kod Ng’wono” (Ohinga mar Jarito, Agost 2024)
Ne ane kaka inyisoga hera kod ng’wono ne joricho motamore loko chunygi.
“Kaka Jodongo Nyalo Konyo Joma Ogol e Kanyakla” (Ohinga mar Jarito, Agost 2024)
Som sula ma wiye wacho ni “Ne Dwarore ni Aduog Ir Jehova,” mondo ine gimomiyo ng’at moro ma ne oweyo adiera, ne neno ni Jehova e ma ne okonye mondo oduog e kanyakla.