Loso Gik Moko Kikopo Tiende Olele

Nitie gik mathoth ma ji nyalo puonjore ka ginono le mamoko bende. Kuom ranyisi, olele nigi nyalo mar lak e kor ot moidh modhi e wi ceiling kendo moko kanyo ka wiye ochomo piny. Nyalo ma olele nigono nong’ere kata e kinde ma ne indiko Muma. (Ngeche 30:28) En ang’o ma konyega moko e yo ma kamano?

Olele nigi nyalo mar wuotho kuonde ma poth kaka e wi kio, nikech en gi gik moko moumo tiendene ma chalo gi yier. Lith tiendege onge gi gam, kar mano gin gi teko moro makende. Teko manie tiendenego kod ma ni kama onyono riwore kendo miyo omoko nikech teko moro miluongo ni van der Waals. Kinde mang’eny, teko mag gravity oloyoga teko ma kamago, kendo mano e momiyo dhano ok nyal idho kor ot mana kuom mako kor ot gi lwete kaka olele jatimo. Gik ma chalo gi yier manie tiend olelego nyalo miyo onyon kama lach. Sama gigo oriwore, mano konyega moko motegno e kor ot.

Nonrono nyalo konyowa nade? Inyalo kop yo molosgo tiende olele mondo olosgo gimoro moro minyalo tigo kar Velcro.a Gaset moro miluongo ni The Economist nowuoyo kuom jatim nonro moro ma nowacho ni gik “molos kikopo tiende olele inyalo tigo mondo okony e weche mag thieth to ahinya-ahinya kama ok dwa tiye gi gam mar thieth.”

Tiende olele ok bedga mochido, kama onyono be ok dong’-ga kochido, kendo onyalo liero kamoro amora mak mana e plastik moro molos gi “Teflon.” Onyalo mol kendo choro tiendege ma ok otiyo gi teko mang’eny. Jotim nonro loso gik moko ka gikopo kaka olos tiende olele.