Be Joneno mag Jehova Gin Jokristo Madier?

Wan kaka Joneno mag Jehova, wan gadier ni wan Jokristo madier. Nikech ang’o? Ne ane gima siro puonj ma wayiego, nying ma miyo wabedo mopogore gi dinde mamoko, kod hera ma waherorego.

1. Puonj mag Joneno mag Jehova otenore kuom ang’o?

Yesu nowacho niya: ‘Wach Nyasaye en adiera.’ (Johana 17:17) Mana kaka Yesu, Joneno mag Jehova osebedo ka siro puonjgi duto gi Wach Nyasaye. Ne ane kaka wasebedo ka watimo kamano. Chiegni higa mar 1870, grup moro mar jopuonjre Muma nochako nono Muma adimba. Ne gisiro puonjgi gi Muma, kata bed mana ni gik ma ne giyiego nopogore gi gik ma ne ipuonjo e kanise. Kae to ne gichako nyiso jomamoko gik mabeyo ma ne gisepuonjore e Muma.a

2. Ang’o momiyo waluongore ni Joneno mag Jehova?

Jehova luongo jotichne ni jonenone nikech giwacho adiera e wiye. (Jo-Hibrania 11:4–​12:1) Kuom ranyisi, e kinde machon, Nyasaye nonyiso joge niya: “Un jonenona.” (Som Isaya 43:10.) Yesu bende iluongo ni “Janeno Migeno.” (Fweny 1:5) Omiyo, e higa mar 1931 ne wachako luongore ni Joneno mag Jehova. Wamor ahinya ni iluongowa gi nyingno.

3. Ere kaka Joneno mag Jehova nyiso hera mana kaka Yesu?

Yesu nohero jopuonjrene ahinya kendo nonenogi mana kaka joodgi. (Som Mariko 3:35.) Joneno mag Jehova bende gin kaka joot manie piny ngima. Mano e momiyo waluongorega ni owete gi nyimine. (Filemon 1, 2) Bende, waluwo chik ma wacho niya: “Beduru gi hera ne riwruok duto mar owete.” (1 Petro 2:17) Joneno mag Jehova nyiso hera ma kamano e yore mang’eny. Kuom ranyisi, gikonyo Jokristo wetegi manie piny mangima sama giyudo chandruok.

TIM NONRO

4. Wasiro puonj magwa gi Muma

Jehova nokoro ni ne idhi fweny adiera mag Muma. Som Daniel 12:4, kae to uwuo e wi penjo ma luwoni:

• En ang’o ma ne dhi ‘bedo mogundho’ e kind jotich Nyasaye sama gidhi nyime nono Muma?

Ne ane kaka grup moro mar jopuonjre Muma ne onono Wach Nyasaye. Charles Russell ne en achiel kuomgi. Tug VIDIO, kae to uwuo e wi penjo ma luwoni:

VIDIO: Fwenyo Adiera mag Muma Kendo (7:45)

• Ere kaka Charles Russell gi Jopuonjre Muma wetene ne onono Muma?

Be ing’eyo?

Nitie kinde moko ma wasegaloko puonj ma wayiego. Nikech ang’o? Mana kaka chieng’ medo rieny mos mos kendo miyo alwora moro nenore maler, e kaka Nyasaye bende medo konyowa ng’eyo adiera manie Wachne mos mos. (Som Ngeche 4:18.) Omiyo, kata obedo ni Muma ok lokre, waikorega timo lokruok e puonj ma wayiego kaka wamedo winjo tiend weche manie iye e yo maler.

5. Wadak kaluwore gi nyingwa

VIDIO: Nying Manyiso Gima Watimo (2:40)

• Ang’o momiyo owinjore oluongwa ni Joneno mag Jehova?

Ang’o momiyo Jehova oseyiero ji mondo obed joneno mage? Osetimo mano mondo gichiw neno ni en e Nyasaye madier, nikech nitie miriambo mang’eny ma osewach kuome. Ne ane miriambo moko ariyo ma osewach e wi Nyasaye.

Dinde moko puonjo jolupgi ni Nyasaye dwaro ni giti gi kido kata sanamu e lamo. Be mano en adier? Som Tim Jo-Lawi 26:1, kae to uwuo e wi penjo ma luwogi:

• Ndikono puonjowa ang’o? Jehova neno nade kido kata sanamu ma ji tiyogo e lamo?

Jotend dinde moko puonjo ni Yesu en Nyasaye. Be mano adier? Som Johana 20:17, kae to uwuo e wi penjo ma luwogi:

• Ndikono puonjowa ang’o? Be Yesu gi Nyasaye gin ng’ato achiel?

• Ng’eyo ni Jehova oseoro Jonenone mondo gipuonj adiera e wi Nyasaye kod Wuode miyo iwinjo nade?

6. Waherore

Muma pimo Jokristo gi fuonni mopogore opogore mag del. Som 1 Jo-Korintho 12:25, 26, kae to uwuo e wi penjo ma luwogi:

• Jokristo madier onego otim ang’o sama jowetegi oyudo chandruok?

• Neno kaka Joneno mag Jehova oherore osefwenyoni ang’o?

Sama Joneno mag Jehova oyudo chandruok, Joneno wetegi manie piny mangima chiworega konyogi mapiyo. Mondo ine kaka gitimo mano, tug VIDIO, kae to uwuo e wi penjo ma luwo.

VIDIO: Kodh Yamo Mager Miluongo ni Matthew Noketho Piny Haiti (5:29)

• Kony ma Joneno mag Jehova chiwoga e kinde masira nyiso nade ni giherore?

PUONJ MADUONG’

Joneno mag Jehova gin Jokristo madier. Wan kaka joot manie piny mangima ma siro puonjgi duto gi Muma kendo ma lando adiera e wi Jehova.

Ang’o ma ipuonjori?

• Ang’o momiyo ne wachako luongore ni Joneno mag Jehova?

• Ere kaka wanyisoga ni wadewo jowetewa?

• Be iparo ni Joneno mag Jehova gin Jokristo madier?

MED TIMO NONRO

Puonjri weche momedore e wi histori mar Joneno mag Jehova.

Joneno mag Jehova​—Yie ma Nigi Tim, Kare Mokwongo: Kaka ne Wawuok e Mudho 1:00:53

Ne ane ranyisi achiel ma nyiso kaka Joneno mag Jehova oseelo puonj mag miriambo.

Jotich Nyasaye Pako Nying Jehova (7:08)

Yud dwoko mar penjo moro amora ma in-go e wi Joneno mag Jehova.

“Penjo ma Ji Jopenjo e Wi Joneno mag Jehova” (oyudore e jw.org)

Stephen ne ger gi joma wuok e ogendni mamoko kendo ne osin kodgi. Non ane gima nofwenyo kuom Joneno mag Jehova ma nokonye mondo otim lokruok.

“Ne Adak e Ngima Marach” (Ohinga mar Jarito, Julai 1, 2015)