Penjo Moa Kuom Josombwa

Be Eklesiastes 5:8 wuoyo kuom jotelo mag dhano kende koso owuoyo kuom Jehova be?

Ndikono wacho kama: “Kik iluor ka ineno ka isando jo modhier e pinyu, kendo itamogi e ratichgi, nimar jatelo ka jatelo nigi ng’at moloye gi duong’ kendo jotelogo duto bende nigi jo ma oloyogi gi duong’.”​—Ekl. 5:8.

Ka wang’iyo ndikoni gi pach dhano, nenore ka gima owuoyo mana kuom jotelo mag sirkal kende. Kata kamano, ka waparo kuome matut, wafwenyo ni onyisowa wach moro kuom Jehova ma hoyowa ahinya.

Eklesiastes 5:8 wuoyo kuom jatelo ma sando jo modhier kendo otamogi ratichgi. Jatelono onego opar ni nitie ng’ama chielo moloye gi duong’ e sirkal ma bende rango gik motimo. Kendo nyalo bedo ni nitie kata jomamoko ma nigi duong’ moloyo ma bende range. Gima lit en ni e loch dhano, jotelo duto gin jo mibadhi​—mirango kod ma rango jowetegi, kendo jatelo ka jatelo nitie kaka odiyo raia.

To kata bed ni jotelogo timonwa gik maricho e okang’ ma romo nade, pod wanyalo yudo hoch kuom ng’eyo ni Jehova rango nyaka jotelo mag sirkal. Wanyalo kwayo Nyasaye mondo okonywa, kendo wanyalo bolo ting’ magwa kuome. (Zab. 55:22; Fil. 4:6, 7) Wan gadier ni “wang’ Jehova ng’iyo piny ngima mondo onyis tekone ne jogo ma lame gi chunygi duto.”​—2 We. 16:9.

Kuom mano, Eklesiastes 5:8 paronwa gima timore e sirkande mag dhano. Kata mana jatelo maduong’ manade pod nigi ng’ama otelone. To gima duong’ moloyo en ni ndikono paronwa ni Jehova e Jatelo maduong’ moloyo ng’ato ang’ata, Jaloch mar piny gi polo. Sani Jehova locho kokalo kuom Wuode Yesu Kristo ma e Ruoth e Pinyruodh Nyasaye. Nyasaye Manyalo Duto ma rango gik moko te ma ji timo en Nyasaye ma ok ma ji ratichgi. Ohero gik makare, to Wuode bende en mana kamano.