Be Iikori Timo Lokruok?
1. Gin lokruoge mage ma nyalo dwarore ni watim kaka piny medo lokore?
1 Piny siko ka lokore. Nikech mano, kinde duto dwarore ni wan be walok yore ma watiyogo e tijwa mar lendo, chenrowa, kod kaka wachako mbaka gi ji. Be iikori timo lokruok ma kamago?
2. Ang’o momiyo nyaka waikre timo lokruok ka wadwa ni wadhi riat gi riwruok mar oganda Jehova?
2 Yore mag Lendo: Kinde duto, kanyakla mar Jokristo osebedo ka oikore timo lokruok e yore mag lendo kaluwore gi gik ma timore e piny. Kuom ranyisi, kane Yesu okwongo oro jopuonjrene e tij lendo, nochikogi ni kik giting’ pesa kata chiemo. (Math. 10:9, 10) Kata kamano, bang’e nonyisogi ni giting’ gigo nikech nong’eyo ni koro ne gidhi yudo akwede kendo lendo nyaka e alwora maboyo. (Luka 22:36) Higni mia achiel mosekalo, riwruok mar oganda Jehova osebedo ka tiyo gi yore mopogore opogore mag lendo kaka kalatese mag chiwo neno (testimony cards), stesende mag redio, kod mtokni ma nigi spikni e wigi, kaluwore gi chal ma nitie. E kindegi, yo maduong’ ma watiyogo en lendo ot ka ot. Kata kamano, nikech ji mang’eny ok yudre mayot e utegi, osebed ka ijiwowa mondo walend kuonde ma ji mang’eny yudoree kaka e wang’ yore, kuonde ohala, kata seche ma wan e dijewa mamoko. Bende, osebed ka ijiwowa ni walend seche mag odhiambo kapo ni wan e alwora ma ji ok yudre e utegi godiechieng’. Be itemo kar nyaloni mondo itim lokruoge madwarore mondo idhi riat gi riwruok mar oganda Jehova?—Eze. 1:20, 21.
3. Ere kaka bedo joma oikore loko mbaka kaluwore gi chal mar weg udi nyalo miyo wayud nyak moloyo?
3 Yore mag Chako Mbaka: Gin weche kaka mage ma chando chuny ji ahinya e alwora midakie? Dibed ni gin chandruoge kaka mag yuto, mag joot, kata mahundu? Ber ka wang’eyo gik machando ji e alworawa nikech mano biro konyowa ng’eyo weche mwanyalo tiyogo e chako mbaka kodgi. (1 Kor. 9:20-23) Sama wuon ot onyisowa kata openjowa wach moro machando chunye, kar miye mana dwoko ma thech-thech kae to wadhi nyime nyise wach ma ne wasechano wuoyoe gi ji e odiechieng’no, donge nyalo bedo maber ka waloko mbaka mondo wawuo kuom wach machandeno?
4. Ang’o momiyo ma e kinde maberie moloyo ka watimo lokruok madwarore e tijwa mar lendo?
4 Machiegnini, masira maduong’ biro chakore kendo pinyni biro chopo e gikone. “Ndalo modong’ nok.” (1 Kor. 7:29) Omiyo, mano kaka ber ka wadhi nyime timo lokruok manyalo dwarore mondo wati maber gi ndalo modong’ manokgi e tij lendo!