NGIMAWA KAKA JOKRISTO

Gik Manyien e Chokruok ma Kor Juma

Kochakore Januar 2018, chokruoge mitimo e kor juma biro bedo gi kare mawuoyo kuom weche mag timo nonro kod vidio mag Muma mar New World Translation of the Holy Scriptures-gocho mar puonjruok (nwtsty) ma yudore e intanet, kata bed ni gochono pod ok oyudore e dhou. Onge kiawa ni sula manyienni biro konyou timo ikruok maber ne chokruoge. Gima duong’ moloyo, en ni obiro konyou sudo machiegni gi Wuonwa ma jahera, Jehova!

WECHE MAG TIMO NONRO

Weche moler nyiso kit ji gi timbegi, alwora miwuoye kod dhok ma ne ji wacho kindeno.

Mathayo 12:20

Kitambi maliel marach rach: Teyni ma ne itiyogo ne gin nyangile mochue gi lowo kae to iole mor zeituni. Kitambi molos gi tworo mar katani ema ywayo morno kendo miyo taya liel. E dho Grik wach motigo ni “kitambi maliel marach rach” inyalo tigo kiwuoyo kuom kitambi ma sim to pod nigi chuk mach ma golo iro. Weche mokor manie bug Isaiah 42:3 nyiso kaka Yesu ne en ng’at mang’won; ma ne nyiso ng’wono kod hera ne joma muol kod joma chunygi onyosore.

Mathayo 26:13

Adier: E dho-Grik, a·menʹ en wach mogol e dho Hibrania to tiende en “adier” kata “obed kamano.” Yesu nohero tiyo gi wachno ka ochako wuoyo, kotimo singo moro, kata e weche mokor, mondo onyis ni gima owacho en adier chuth. Wachore ni bedo ni Yesu notiyo gi weche kaka “adier,” kata amen, nyiso ni gin weche mayudore e Muma. Seche moko ka Yesu ne onwoyo amen nyadiriyo (a·menʹ a·menʹ) ilokega ni “adier” mana kaka ondik e bug injili mar Johana.—Joh 1:51.

PICHNI GI VIDIO

Pichni, kod vidio ma onge dwol lero tiend weche ma otigo e Muma.

Bethfage, Got Zeituni, gi Jerusalem

Vidio machuokni nyiso yo madhi Jerusalem, kochakore e gweng’ miluongo kindegi ni et-Tur, kendo wachore ni gweng’no e Bethfage miwuoyo kuome e Muma ma en achiel kuom alwora maboyo e Got Zeituni. Bethani yudore machiegni gi Bethfage e alwora mar yo wuok chieng’ mar Got Zeituni. Ka ne gin Jerusalem, Yesu gi jopuonjrene ne hinyo nindo Bethani, ma iluongo kindegi ni el-ʽAzariyeh (El ʽEizariya), e dho Arab tiend nyingni ma ni “Ka Lazaro”. Yesu ne dakga e od-gi Maritha, Maria, gi Lazaro. (Mat 21:17; Mar 11:11; Luk 21:37; Joh 11:1) Nyalo bedo ni ka ne Yesu dhi Jerusalem kowuok e od-gi Lazaro, noluwoga yo machal gi monyis e vidiono. E Nisan 9, higa mar 33 E Ndalowa, ka ne Yesu dhi Jerusalem koidho kanyna ka okalo Got Zeituni, nyalo bedo ni noluwo yo achielno kowuok Bethfage, kodhi Jerusalem.

Yo Moa Bethani kadhi Bethfage
Bethfage
Got Zeituni
Hoho mar Kidron
Alwora mar Hekalu

Musmal e chogo mar ofunj tielo

Ma en picha machalo gi mar musmal ma borne romo inch ang’wen gi nus, mochwo e chogo mar ofunj tiend dhano. Nonro nyiso ni chogo mokwongo mochwo e musmal noyud e higa mar 1968, ka ne okuny gik machon Jerusalem, kendo chogono en machon ma kinde Jo-Rumi. Pichano nyiso maler ni chon ne itiyo gi musmal e guro joma ne ong’ad ne buch tho e yath. Nyalo bedo ni musmalni chalo gi mane jolweny mag Rumi otiyogo e guro Yesu. Noyud chogono e sanduku moro molos gi kidi ma ne iluongo ni ossuary, kama ne ikete choke ng’at ma nogur mosetho bang’ ka dende osetow. Mano nyiso ni joma ne ogur ne iikoga.—Mat 27:35.