Odiechieng Yesu Mogik e Hekalu

Odiechieng’ mogik ma Yesu ni e hekalu, omedo elo kit jondiko gi Jo-Farisai. Oluongogi ayanga ni gin joma wuondore. Otiyo gi ranyisi kowachonegi kama: “Ulwoko ng’e okombe kod ng’e san, to igi opong’ gi ich-lach kod timo gik mokalo tong’. In Ja-Farisai ma muofu, kwong ilwok i okombe kod san mondi eka ng’eye bende obed maler.” (Mathayo 23:25, 26) Jo-Farisai ong’ere kaka joma luwo weche duto ma tindotindo ka luwore gi chikgi kodok korka gik ma nyalo chido ng’ato, kendo gijiwo ahinya kaka ng’ato nenore gi oko. Kata kamano, gima ok gitim en nono kaka gichalo gi yo ka igi kendo ok gimi chunygi obed maler e wang’ Nyasaye.

Timgi mar wuondruokno bende nenore ayanga e yo ma gichiworego e gero kendo buko liete mag jonabi. Kata kamano, mana kaka Yesu wacho, gin “nyithind joma nonego jonabi.” (Mathayo 23:31) Gisenyiso mano kuom temo nyading’eny mondo gineg Yesu.​—Johana 5:18; 7:1, 25.

Kae to Yesu nyiso gima biro timore ne jotend din-go ka ok giloko chunygi gia e richogi. Owachonegi kama: “Un thuonde kendo nyithind thuonde, ere kaka ubiro ringo bura mar Gehena?” (Mathayo 23:33) Gehena en nying mar dho Grik miluongogo Hoho mar Hinom man machiegni gi Jerusalem kama iwang’ogae yugi. To mano e ranyisi ma Yesu tiyogo konyisogo kaka ibiro keth jondiko gi Jo-Farisai nyaka chieng’.

Jopuonjre Yesu biro kawo kar Yesu ka gibedo kaka “jonabi gi joma riek kod joma puonjo ji.” Ere kaka ji biro timonegi? Yesu wacho ne jotend din-go niya: “Moko [kuom jopuonjrena] ununeg kendo unugurgi e yien to moko kuomgi unuchwad e sunagokeu mi nusandgi kowuok e taon moro nyaka e taon machielo, mondo eka remb ji duto makare ma ne ochuer e piny obi obed e wiu, chakre gi remb Abel ng’at makare nyaka e remb Zakaria . . . ma ne unego.” Osiemogi kama: “Adier awachonu ni, magi duto nobi e wi tieng’ni.” (Mathayo 23:34-36) Mano e gima timore adier e higa mar 70 kane jolweny mag Rumi oketho Jerusalem kendo onego gana mang’eny mag Jo-Yahudi.

Chuny Yesu chandore ahinya koparo gima lit ma dhi timore ne Jerusalem. Owacho gi lit kama: “Jerusalem, Jerusalem, in janeg jonabi kendo jachiel joma oor iri gi kite​—mano kaka nyading’eny ne adwaro choko nyithindi kanyachiel mana kaka gweno choko nyithinde e bwo buombene! To un ne ok udwar. Neuru! Odu osejwang’nu.” (Mathayo 23:37, 38) Nyaka bed ni joma winje wuoro ni to owuoyo kuom ‘ot’ mane. Be dibed ni owuoyo kuom hekalu moger malich man Jerusalem, ma nenore ni Nyasaye osebedo ka rito?

Kae to Yesu medo wacho kama: “Awachonu ni, ok ununena ngang’ chakre sani nyaka chop nuwach ni, ‘Ng’at moguedh en ng’atno ma biro e nying Jehova!’” (Mathayo 23:39) Yesu nwoyo weche ma yudore e Zaburi 118:26 ma wacho niya: ‘Jalo ojahawi ma biro e nying Jehova; waguedhou gi gueth moa e od Jehova.’ Kuom adier, bang’ ketho hekaluno, onge ng’ato ang’ata ma dhi biro kanyo e nying Nyasaye.

Koro Yesu sudo kamoro e i hekalu kama nitie sanduge mag pesa. Sandugego nigi otuchi moko matindo ma ji nyalo lutogo chiwogi. Yesu ng’icho to oneno ka mano e gima Jo-Yahudi ma nigi nyalo mopogore opogore timo. Oneno ka jomwandu luto “pesa mang’eny ma mingli” kaka chiwo. Kae to oneno ka chi liel moro modhier to luto “pesa ma mingli ariyo ma nigi nengo matin ahinya.” (Mariko 12:41, 42) Onge kiawa ni Yesu ong’eyo kaka Nyasaye mor gi chiwo ma chi lielno ogolo.

Yesu luongo jopuonjrene ire kae to owachonegi kama: “Adier awachonu ni, chi liel modhierni oseluto moloyo jogi duto ma a oluto pesa e sanduge mag kenogo.” E yo mane? Oleronegi niya: “Giduto giluto koa kuom gigegi momedore, to en, kata obedo ni odhier, oseluto duto ma dokonyrego e ngimane.” (Mariko 12:43, 44) Mano kaka chuny ma chi lielno nigo opogore ahinya gi ma jotend din-go nigo!

Pod en odiechieng’ mar Nisan 11 kendo seche koro oniang’ sama Yesu wuok e hekalu. Mano e odiechienge mogik e hekalu. Achiel kuom jopuonjrene wacho kama: “Japuonj, ne ane! kitego kod utego beyo miwuoro!” (Mariko 13:1) Kuom adier, moko kuom kite mogergo hekaluno dongo miwuoro kendo gimiyo onenore motegno ma ok nyal kethore. Kuom mano, weche ma Yesu wacho e wi hekaluno nyalo miyo ng’ato oparre. Owacho kama: “Ineno ute madongogi? Onge kidi ma biro dong’ e wi kidi wadgi ma ok nowit piny.”​—Mariko 13:2.

Bang’ wacho wechego, Yesu kod jootene ng’ado Hoho mar Kidron kae to giidho nyaka e Got Zeituni. Chopo kama Yesu ni mana gi jootene ang’wen ma gin Petro, Andrea, Jakobo, kod Johana. Ka gin e got kanyo, ginyalo ng’iyo piny mi gine kaka hekaluno en ot moger malich miwuoro.