Ang’o Momiyo Jopuonjre Yesu Ok Tue Chiemo?

Johana Jabatiso osebedo e jela kuom kinde nyaka ne Yesu dhi e sawo mar Pasaka ma higa mar 30. Johana ne dwaro ni jopuonjrene obed jolup Yesu. Kata kamano, dweye moko osekalo to moko kuomgi pok otimo kamano nyaka ne tue Johana e jela.

Sama Pasaka ma higa mar 31 chiegni, moko kuom jopuonjre Johana biro ir Yesu kendo gipenje niya: “Ang’o momiyo wan kod Jo-Farisai wajotueyo chiemo to jopuonjreni to ok tue?” (Mathayo 9:14) Jo-Farisai kawo wach tueyo chiemo mana kaka chik mar din ma nyaka ji luw. Kinde moko bang’e, Yesu tiyo gi ngero mar Ja-Farisai moro ma kawore owuon kaka ng’at makare. Ja-Farisaino lemo kama: ‘A Nyasaye, agoyoni erokamano ni ok achal gi jomamoko duto. An atueyo chiemo diriyo e juma.’ (Luka 18:11, 12) Nyalo bedo ni jopuonjre Johana bende osebedo ka tueyo chiemo mana nikech chik dwaro kamano. Kata nyalo bedo ni gisebedo ka gitueyo kaka yo ma ginyisogo ni gikuyo nikech Johana ni e jela. Jomoko wuoro gimomiyo jopuonjre Yesu to ok tue, nyalo bedo ni jogo dwaro ni jopuonjre Yesu onyis ni gin bende gin gi kuyo e wi gima otim ne Johana.

Yesu dwokogi kotiyo gi ranyisi kama: “Onge gimomiyo osiepe wuon kisera onego obed gi kuyo ka pod en kodgi, donge? To ndalo biro ma ibiro gol wuon kisera oa kuomgi, eka ginitue.”—Mathayo 9:15.

Johana owuon noluongo Yesu ni wuon kisera. (Johana 3:28, 29) Omiyo, nikech Yesu pod nitie, jopuonjre Yesu ok tue chiemo. Bang’e, ka Yesu biro tho, jopuonjrene biro ywage kendo ok gibi bedo gi gombo mar chiemo. Kata kamano, mano kaka gibiro bedo mamor kendo bang’ ka osechier Yesu! Kindego ok ginitue nikech kuyo.

Bang’ mano, Yesu chiwo ranyisi ariyo ma luwogi. Owacho kama: “Onge ng’at ma bawo law manyien e nanga moti, nikech rabaw manyienno biro ywayo nangano kendo obiro yieche moloyo. Kamano bende, ji ok ket divai manyien e chupni pien moti miting’oe divai. Ka gitimo kamano to chupnigo biro barore kendo divai biro pukore mi chupnigo kethre. To ji keto divai manyien e chupni pien manyien miting’oe divai.” (Mathayo 9:16, 17) Tiend gima Yesu wacho en ang’o?

Yesu temo konyo jopuonjre Johana Jabatiso mondo ging’e ni ok ochuno ni jolup Yesu oluw chike kod timbe din mar Jo-Yahudi, kaka wach tueyo chiemo mana ni nikech chik din dwaro. Yesu ne ok obiro miyo kit lamo machon mondo omed siko, ma chalo kaka bawo law manyien e nanga moti. Mano en nikech kit lamo machonno koro ne chiegni rumo. Kit lamo ma Yesu dwaro ni ji oluw ok winjre gi kit lamo mar Jo-Yahudi ma ndalogo, ma ne opong’ gi chike mag joma chon. Yesu ok tem bawo law manyien e nanga moti, kata keto divai manyien e chup pien moti miting’oe divai.