Ja-Samaria Moikore Konyo Wadgi

Ka Yesu pod ni machiegni gi Jerusalem, Jo-Yahudi moko dhi ire. Moko kuomgi dwaro ni opuonjgi, to moko to obiro mana mondo giteme. Achiel kuomgi molony ahinya e weche mag Chik penje niya: “Japuonj, en ang’o ma dwarore ni atim eka ayud ngima mochwere?”​—Luka 10:25.

Yesu fwenyo ni ng’atno ok penje mana nikech odwaro ng’eyo dwoko makare, to nyalo bedo ni oketo ne Yesu obadho mondo Yesu ochiw dwoko ma biro chwanyo Jo-Yahudi. Yesu fwenyo ni ng’atno nigi paro moro e chunye. Omiyo, Yesu dwoke e yo mariek ma elo paro ma ng’atno nigono.

Yesu penje kama: “Ondik nang’o e Chik? Isome nade?” Nikech ng’atno osepuonjore Chik Nyasaye, ochiwo dwoko kotiyo gi Chikno. Otiyo gi weche manie Rapar mar Chik 6:5 kod Tim Jo-Lawi 19:18, kowacho niya: “‘Nyaka iher Jehova Nyasachi gi chunyi duto, gi ngimani duto, gi tekoni duto, kendo gi pachi duto,’ kendo ‘iher wadu kaka iherori iwuon.’” (Luka 10:26, 27) Be mano e dwoko makare?

Yesu pwoyo ng’atno niya: “Idwoko kare; dhi nyime timo kamano to iniyud ngima.” Kata kamano, be mano miyo mbakagino rumo gi kanyo? Ooyo. Ng’atno ok dwar mana dwoko kende; to odwaro “nyisore ni en ng’at makare” mondo eka obed gadier ni paro ma en-go ni kare kendo ni kaka osebedo kotimo ne jomamoko ni kare. Omiyo, openjo Yesu kama: “Wadwa en ng’a?” (Luka 10:28, 29) Penjo ma nenore ni yotno oting’o puonj maduong’. E yo mane?

Jo-Yahudi paro ni joma onego giluong ni ‘jowetegi’ gin mana joma luwo timbe kod chike mag Jo-Yahudi kende, kendo nyalo nenore ni weche manie Tim Jo-Lawi 19:18 riwo pachgino lwedo. Adiera en ni Ja-Yahudi nyalo wacho ni “ok en gima owinjore gi chik” mondo oriwre gi ng’at ma ok en Ja-Yahudi. (Tich Joote 10:28) Omiyo, ng’at ma wuoyo gi Yesuni paro ni en ng’at makare sama onyiso Jo-Yahudi wetene ng’wono. Nenore ni kata mana jopuonjre Yesu bende nigi paro ma kamano. Kata kamano, nyalo bedo ni gitimo ne joma oa e ogendni mamoko e yo ma ok ng’won ka gineno ni jogo ok gin ‘jowetegi.’

Ere kaka Yesu nyalo rieyo paro ma ok kareno ma ok ochwanyo ng’atno kata Jo-Yahudi mamoko? Ochiwo dwoko kochiwo ranyisi moro kama: “Ng’at moro ne lor koa Jerusalem kodhi Jeriko, to nolwar e lwet jomecho mi ne gilonye ma gimaye gige duto kendo ne gigoye, mi ne giweye kochiegni tho.” Yesu medo wacho niya: “Jadolo moro bende ne lor e ndarano, to ka noneno ng’atno, nokalo e bath ndara komachielo. Kamano bende, Ja-Lawi moro ka nochopo kanyo moneno ng’atno, nokalo e bath ndara komachielo. To Ja-Samaria moro ma ne wuotho e ndarano nochopo ir ng’atno, to kane onene, ne okeche.”​—Luka 10:30-33.

Ng’at ma Yesu wuoyogono ong’eyo ni jodolo mang’eny kod Jo-Lawi ma konyoga tich e hekalu odak Jeriko. Ka giwuok e hekalu mondo gidog Jeriko, nyaka giwuoth e ndara moro ma kawogi kilomita ma dirom 23 kama. Ndarano jabedoga gi jomecho ma kiyo ji e kor yo. Kapo ni jadolo kata Ja-Yahudi oyudo Ja-Yahudi wadgi ka nie masira moro, be obiro kalo akala ma ok okonye? Ka luwore gi ranyisi ma Yesu chiwono, Yesu nyiso ni ne ok gitimo kamano. Ng’at ma ne okonyo Ja-Yahudino ne en Ja-Samaria, to Jo-Samaria gin joma Jo-Yahudi ochayoga ahinya.​—Johana 8:48.

Ere kaka Ja-Samaria nokonyo Ja-Yahudi ma jomecho nogoyono? Yesu medo wacho niya: “Nodhi ire motueyo adhondene, mi noolo mo kod divai kuomgi. Eka nokete e pundane owuon, kendo notere nyaka e od bworo mi ne orite maber. Kinyne notero dinari ariyo, mi nochiwogi ne jarit od bworono kowacho kama: ‘Rite maber, kendo gimoro amora mitiyogo mokalo mago, abiro chuli kaduogo.’”​—Luka 10:34, 35.

Bang’ chiwo ranyisino, Yesu ma en Japuonj mong’ith penjo ng’atno penjo moro ma miyo ng’atno paro matut. Openje niya: “En ng’a miparo ni ne otimo gima nyiso ni en wadgi ng’at ma ne olwar e lwet jomechono?” Nenore ni ng’atno wiye kuot dwoko achiel kachiel ni “Ja-Samaria” e ma ne onyiso ni en wadgi ng’atno. Omiyo, odwoko mana Yesu kama: “En ng’at ma ne okecheno.” Kae to Yesu jiwe gi puonj maduong’ manie ranyisino niya: “Dhiyo, kendo itim kamano in bende.”​—Luka 10:36, 37.

Donge mano en yo maber ahinya mar puonjo jomamoko? Dine bed ni Yesu owacho awacha ne ng’atno ni joma ok gin Jo-Yahudi bende gin jowetegi, be ng’atno kanyachiel gi Jo-Yahudi mamoko dorwako wachno? Samoro dine ok girwako. Kata kamano, notiyo gi ranyisi ma jowinjone ne nyalo winjo tiende e yo mayot kendo mapiyo. Mano nomiyo dwoko mar penjo ma ne openje ni, “Wadwa en ng’a?” nobedo mayot. Ng’at ma en wadgi ng’ato gadier en ng’at ma nyiso hera kod ng’wono mana kaka Ndiko chikowa ni watim.